ຄະນະ ສຟລ ເຂົ້າພົບປະຢ້ຽມຢາມລັດຖະມົນຕີກະຊວງ ກປ

  ເມື່ອວັນທີ 19 ສິງຫາ 2021 ທີ່ກະຊວງກະສິກຳ ແລະປ່າໄມ້ (ກະຊວງ ກປ ) ຄະນະສະມາຄົມເຟີນິເຈີລາວ (ສຟລ) ສະໄໝທີ IV ນຳພາໂດຍທ່ານ ກອງມາລາ ພົມມາໄລ ປະທານ ສຟລ ໄດ້ເຂົ້າພົບປະຢ້ຽມຢາມທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະປ່າໄມ້ເນື່ອງໃນໂອາກາດທີ່ຄັດເລືອກໄດ້ຄະນະ ສຟລ ຊຸດໃໝ່ ແລະຫາລືແລກປ່ຽນວຽກງານໃນຜ່ານມາພ້ອມກັບການແກ້ໄຂບັນຫາຂໍ້ຄົງຄ້າງໃນຕໍ່ໜ້າໂດຍສະເພາະແມ່ນເລື່ອງວັດຖຸດິບໄມ້.

    ໃນໂອກາດເຂົ້າພົບປະຢ້ຽມຢາມດັ່ງກ່າວກ່ອນອື່ນທ່ານ ກອງມາລາ ພົມມະໄລ ໄດ້ລາຍງານໃຫ້ທ່ານລັດຖະມົນຕີກະຊວງກະສິກຳ ແລະປ່າໄມ້ຊາບວ່າ: ສຟລ ແມ່ນອົງການຈັດຕັ້ງໜຶ່ງທາງດ້ານທຸລະກິດໄມ້ຢູ່ພາຍໃຕ້ການຊີ້ນຳຂອງສະພາການຄ້າ ແລະ ອຸດສາຫະກຳແຫ່ງຊາດຖືກສ້າງຕັ້ງຂຶ້ນໃນປີ 2003 ໂດຍມີສະມາຊິກ 100 ກວ່າໂຮງງານຂອບເຂດທົ່ວປະເທດເພື່ອຮັກສາ ແລະສົ່ງເສີມສິດຜົນປະໂຫຍດອັນຊອບທຳຂອງສະມາຊິກຕາມກົດໝາຍວາງອອກ ແລະ ເພື່ອເປັນເສນາທິການໃຫ້ແກ່ ອົງການຈັດຕັ້ງຂອງລັດຖະບານທີ່ກ່ຽວຂ້ອງໃນການຄຸ້ມຄອງອຳນວຍຄວາມສະດວກ ແລະຊຸກການເຄື່ອນໄຫວຂອງສະມາຄົມໃຫ້ຖືກຕ້ອງຕາມລະບຽບກົດໝາຍສົ່ງເສີມໃຫ້ສະມາຄົມປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະລຶບລ້າງຄວາມທຸກຍາກຂອງປະຊາຊົນ.

    ປະຈຸບັນສະມາຄົມເຟີນີເຈີລາວຍັງໄດ້ເຂົ້າເປັນສະມາຊິກຂອງສະພາອຸດສາຫະກຳເຟີນີເຈີອາຊຽນ ແລະສະມາຄົມທຸລະກິດອາຊຽນ-ຈີນ ນຳອີກ.

    ໃນການພົບປະດັ່ງກ່າວຄະນະ ສຟລ ໄດ້ສະເໜີເຖິງລັດຖະບານຜ່ານທ່ານລັດຖະມົນຕີກະຊວງກະສິກຳ ແລະປ່າໄມ້ບາງບັນຫາສຳຄັນຄື: 1. ວັດຖຸດິບກໍ່ຄືໄມ້ (ການເຂົ້າເຖິງວັດຖຸດິບ: ການປະມູນໄມ້ຂອງກະຊວງ ຫຼືລັດຖະບານຈາກແຫຼ່ງຕ່າງໆ; 2. ສະຖານທີ່ຈັດງານວາງສະແດງສິນຄ້າ ແລະຕະຫຼາດຈຳໜ່າຍຜະລິດຕະພັນໄມ້; 3. ມາດຕະຖານຜະລິດຕະພັນໄມ້ເພື່ອສົ່ງອອກ; 4. ການຕະຫຼາດທັງພາຍໃນ ແລະຕ່າງປະເທດສຳລັບພາຍໃນແມ່ນຂໍສິດທິພິເສດໃນການເຂົ້າເຖິງການປະມູນວຽກເຟີນິເຈີທີ່ນຳໃຊ້ງົບປະມານລັດຖະບານສ່ວນຕ່າງປະເທດຂໍໃຫ້ພາກລັດສ້າງເງື່ອນໄຂຊ່ວຍເຈລະຈາກັບຕ່າງປະເທດໃນການຊື້-ຂາຍເຟີນີເຈີຈາກລາວ.

    ຫຼັງຈາກນັ້ນທ່ານ ເພັດ ພົມພິພັກ ລັດຖະມົນຕີກະຊວງກະສິກຳ ແລະປ່າໄມ້ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານຂອງຄະນະສະມາຄົມເຟີນິເຈີລາວໃນຕະຫຼອດໄລຍະຜ່ານມາໂດຍສະເພາະແມ່ນການສ້າງອາຊີບ ແລະວຽກເຮັດງານທຳໃຫ້ກັບແຮງງານກຳມະກອນລາວ, ສ້າງຊື່ສຽງຂອງຜະລິດຕະພັນໄມ້ລາວໃນຕະຫຼາດຕ່າງປະເທດຕະຫຼອດຮອດພາກພື້ນ ແລະປະກອບສ່ວນສ້າງລາຍຮັບໃຫ້ແກ່ລັດຖະບານໃນແຕ່ລະປີຈາກການສະເໜີຂອງຄະນະ ສຟລ ກະຊວງກະສິກຳ ແລະປ່າໄມ້ກໍ່ຈະປະກອບສ່ວນໃຫ້ຮ່ວມມືໃນການພັດທະນາວຽກງານຂອງ ສຟລ ໃນຕໍ່ໜ້າໂດຍສະເພາະແມ່ນເລື່ອງວັດຖຸດິບໄມ້ທີ່ຈະນຳໃຊ້ເຂົ້າຂະບວນການຜະລິດຂອງສະມາຊິກສະມາ ຄົມແຕ່ທັງນີ້ຈະໄດ້ມີການຄົ້ນຄວ້າປຶກສາຫາລືກັບພາກສ່ວນທີ່ກ່ຽວຂ້ອງເພື່ອໃຫ້ທຸກຢ່າງໄປຕາມຂັ້ນຕອນຂອງກົດໝາຍ.

   ແນວໃດກໍດີທ່ານລັດຖະມົນຕີຍັງໄດ້ແນະນຳໃຫ້ເຫັນເຖິງຄວາມສຳຄັນໃນການປູກໄມ້ເສດຖະກິດເພື່ອເປັນວັດຖຸດິບປ້ອນຂະບວນການຜະລິດ ແລະເພື່ອຄວາມຍືນຍົງຂອງທຸລະກິດໄມ້ໄລຍະຍາວໃນຕໍ່ໜ້າຕື່ມອີກ.

แชร์