ປັບປຸງບໍລິການຂົນສົ່ງ ຢ່າງມີປະສິດທິພາບໃນລາວ

 ສະພາການຄ້າ ແລະອຸດສາຫະກໍາແຫ່ງຊາດລາວຮ່ວມກັບສະມາຄົມສົ່ງເສີມການຮ່ວມມືດ້ານວິຊາການແບບຢືນຍົງແຫ່ງປະເທດຍີ່ປຸ່ນ (AOTS) ປະຈໍາພາກພື້ນ ແລະສະພາຂົນສົ່ງແຫ່ງປະເທດໄທໄດ້ຈັດງານສໍາມະນາພາຍໃຕ້ຫົວຂໍ້ການປັບປຸງການບໍລິການການຂົນສົ່ງຢ່າງມີປະສິດທິພາບຂຶ້ນໃນລະຫວ່າງວັນທີ 11-13 ມີນາ 2019 ທີ່ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ດາວວອນ ພະຈັນທະວົງ ຮອງປະທານສະພາການຄ້າ ແລະອຸດສາຫະກໍາແຫ່ງ ຊາດລາວ, ທ່ານ ນາງ ໂທໂມະ ວາຕານາເບະຫົວໜ້າຜູ້ປະສານງານ ແລະສະມາຄົມສົ່ງເສີມການຮ່ວມມືດ້ານວິຊາການແບບຢືນຍົງແຫ່ງປະເທດຍີ່ປຸ່ນ (AOT S) ປະຈໍາພາກພື້ນ, ທ່ານ ກ້ອງກຣິດ ຈັນທຣິກ ຜູ້ອໍານວຍການບໍລິຫານສະພາຂົນສົ່ງແຫ່ງປະເທດໄທ, ທ່ານ ຣາຊັນ ໄຊວັດທະນານົນ ຊ່ຽວຊານອາວຸໂສຈາກສະພາຂົນສົ່ງແຫ່ງປະເທດໄທ, ທ່ານ ສຸວັດ ຈັນຍາບູນ ວິທະຍາກອນດ້ານການຂົນສົ່ງຈາກມະຫາວິທະຍາໄລສີປະທູມ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ດາວວອນ ພະຈັນທະວັງ ກ່າວວ່າ: ການປັບປຸງການບໍລິການການຂົນສົ່ງຢ່າງມີປະສິດທິພາບເຊິ່ງມີຄວາມສໍາຄັນ ແລະຈໍາເປັນຫຼາຍຕໍ່ກັບການດໍາເນີນ ທຸລະກິດໃນຍຸກປະຈຸບັນ. ນັບຕັ້ງແຕ່ ສປປ ລາວ ໄດ້ເຂົ້າເປັນສະມາຊິກຂອງອົງການຄ້າໂລກສະມາຊິກປະຊາຄົມອາຊຽນ, ອາຊຽນບວມສາມ ແລະ ອື່ນໆເຮັດໃຫ້ເສດຖະກິດຂອງ ສປປ ລາວ ນັບມືນັບເຕີບໃຫຍ່ຂະຫຍາຍຕົວເຊິ່ງສິ່ງຕ່າງເຫຼົ້ານີ້ແມ່ນໄດ້ຕິດພັນໂດຍກົງຕໍ່ວຽກງານດ້ານການສົ່ງເສີມສິນຄ້າ ແລະ ເປັນປັດໃຈຫຼັກໃນການຊຸກຍູ້ ແລະປະກອບສ່ວນໃນການພັດທະນາເສດຖະກິດຂອງຊາດ.

  ການຝຶກອົບຮົມຄັ້ງນີ້ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບວຽກງານຂົນສົ່ງໃນຂັ້ນພື້ນຖານເຊັ່ນ: ຄວາມຮັບຮູ້ທົ່ວໄປກ່ຽວກັບການຂົນສົ່ງພາຍໃນສາກົນ,ລະບຽບການ ແລະ ນິຕິກໍາທີ່ຕິດພັນກັບການຂົນສົ່ງ, ການບໍລິຫານ ແລະ ການຈັດການ, ຕ່ອງໂສ້ການຜະລິດຕໍ່ກັບການຂົນສົ່ງ, ການຫຸ່ມຫໍ່ວັດສະດຸ, ການວັດວາງການການຂົນສົ່ງ ແລະການບໍລິຫານຕົ້ນທຶນການຂົນສົ່ງ.

ຂ່າວ: ວົງມະນີ     

แชร์