ອຸດົມໄຊ ພົບຜູ້ຕິດເຊື້ອພະຍາດໄຂ້ຍຸງລາຍ 62 ກໍລະນີ

ຂ່າວ: ແສງອາທິດ

    ພະຍາດໄຂ້ຍຸງລາຍເປັນພະຍາດທີ່ອັນຕະລາຍຮ້າຍແຮງ ແລະຮຸນແຮງເຮັດໃຫ້ຄົນເຮົາເສຍຊີວິດໄດ້ທັງເປັນການສົ່ງຜົນກະທົບແກ່ວຽກງານສາທາລະນະສຸກໃນທົ່ວປະເທດເວົ້າລວມເວົ້າສະເພາະແຂວງອຸດົມໄຊແຕ່ລະປີພະຍາດໄຂ້ຍຸງລາຍສົ່ງຜົນກະທົບຕໍ່ທຸກຊັ້ນຄົນ, ເພດໄວ, ທຸກໝວດອາຍຸ. ພະຍາດນີ້ມັກເກີດຂຶ້ນໃນໜ້າຝົນຂອງແຕ່ລະປີ ໂດຍອາໄສຍຸງລາຍເປັນຕົວແຜ່ເຊື້ອແກ່ຄົນເຮົາ, ຕໍ່ສະພາບການດັ່ງກ່າວທາງຂະແໜງການທີ່ກ່ຽວຂ້ອງຂອງພະແນກສາທາລະນະສຸກໄດ້ເອົາໃຈໃສ່ໃນການເຝົ້າລະວັງ ແລະຕິດຕາມໃນແຕ່ລະມື້ໃນລະບົບເຝົ້າລະວັງແຫ່ງຊາດ.
   ທ່ານ ບຸນຊູ ວິໄລສຸກ ຮອງຫົວໜ້າຂະແໜງຄວບຄຸມພະຍາດຕິດຕໍ່, ຮັບຜິດຊອບວຽກງານໄຂ້ຍຸງລາຍ, ພະແນກສາທາລະນະສຸກໄດ້ລາຍງານໃນວັນທີ 17 ສິງຫາ 2021 ວ່າ: ການເຝົ້າລະວັງ 18 ໝວດອາການຕໍ່ພະຍາດໃນລະບົບຖານຂໍ້ມູນສາທາລະນະສຸກທົ່ວແຂວງມີຢູ່ຂັ້ນແຂວງ 2 ແຫ່ງ, ໂຮງໝໍແຂວງ ແລະ ໂຮງໝໍທະຫານແຂວງ, ໂຮງໝໍເມືອງ 7 ເມືອງ ແລະໂຮງໝໍນ້ອຍ 53 ແຫ່ງ ແຕ່ລະສະຖານທີ່ເຝົ້າລະວັງແມ່ນຕິດຕາມ, ເຝົ້າລະວັງລາຍງານປະຈໍາວັນຜ່ານການຕິດຕາມ ເຝົ້າລະວັງພະຍາດດັ່ງກ່າວໃນທົ່ວແຂວງເຊິ່ງມີຈໍານວນກໍລະນີ ( ຕົວເລກສະສົມມີຜູ້ຕິດເຊື້ອພະຍາດດັ່ງກ່າວແຕ່ເດືອນມັງກອນ ຫາ ສິງຫາ 2021 ນີ້ມີຈຳນວນທັງໝົດ 62 ກໍລະນີ ແລະຍັງບໍ່ມີກໍລະນີເສຍຊີວິດ, ໃນນີ້ເມືອງໄຊ 51 ກໍລະນີ, ເມືອງຫຼາ 1 ກໍ່ລະນີ, ເມືອງນາໝໍ້ 1 ກໍລະນີ, ເມືອງງາ 1 ກໍລະນີ, ເມືອງແບງ 4 ກໍລະນີ ເມືອງຮຸນ 2 ກໍລະນິ, ເມືອງປາກແບງ 2 ກໍລະນີ, ເຊີ່ງທັງໝົດນີ້ເປັນກໍລະນີໂຕເລກສະສົມ. ຕໍ່ສະພາບການດັ່ງກ່າວທາງຂະແໜງການສາທາລະນະສຸກພວກເຮົາໄດ້ເອົາໃຈໃສ່ດັ່ງນີ້: ໄດ້ອອກຄຳສັ່ງຂອງທ່ານເຈົ້າແຂວງວ່າດ້ວຍການເພີ່ມທະວີເອົາໃຈໃສ່ຕ້ານ ແລະສະກັດກັ້ນພະຍາດລະດູການລວມທັງພະຍາດໂຄວິດ-19 ໄດ້ອອກແຈ້ງການແນະນໍາໃນດ້ານວິຊາການຂອງທ່ານຫົວໜ້າພະແນກສາທາລະນະສຸກແຂວງແຕ່ລະໄລຍະເພີ່ມທະວີການໃຫ້ຄວາມຮູ້ແກ່ຊຸມຊົນທາງລະບົບໂທລະໂຄ່ງ, ວິທະຍຸຊຸມຊົນຢູ່ແຕ່ລະເມືອງ, ຈັດຕັ້ງໜ່ວຍໂຄສະນາເຄື່ອນທີ່ຂອງວິຊາການແພດລົງເຄື່ອນໄຫວໃຫ້ຄວາມຮູ້ແກ່ຊຸມ ຊົນຢູ່ແຕ່ລະບ້ານ ແລະສະຖານທີ່ຊຸມຊົນທີ່ມີຄວາມສ່ຽງຂອງແຕ່ລະເມືອງເປັນປະຈຳແຕ່ລະເດືອນຈັດຕັ້ງທີມງານວິຊາການຂັ້ນເມືອງລົງເດີນສຳຫຼວດໜອນນໍ້າຍຸງລາຍແຕ່ລະເດືອນເພື່ອປະເມີນຄວາມໜາແໜ້ນໜອນນໍ້າຍຸງລາຍຢູ່ແຕ່ລະບ້ານເປົ້າໝາຍຕິດພັນກັບຂະບວນການທຳລາຍແຫຼ່ງເພາະພັນໜອນນໍ້າຍຸງໃນບ້ານທີ່ມີຄວາມສ່ຽງເຫັນວ່າມີອັດຕາການພົບໜອນນໍ້າສູງເກີນມາດຕະຖານທີ່ອົງການອານາໄມໂລກກຳນົດຢູ່ແຕ່ລະບ້ານໃນແຕ່ລະເມືອງຢ່າງເປັນປະຈຳແຕ່ລະອາທິດແຕ່ລະເດືອນຕິດພັນກັບການແຈກຍາຍຢາຂ້າໜອນນໍ້າຍຸງລາຍໃຫ້ແຕ່ລະຄົວເຮືອນ.
ໂອກາດດັ່ງກ່າວ ທ່ານ ບຸນຊູ ວິໄລສຸກ ໄດ້ຮຽກຮ້ອງມາຍັງປະຊາຊົນບັນດາເຜົ່າທຸກຊັ້ນຄົນຖ້າຮູ້ສຶກເປັນໄຂ້ໃຫ້ຮີບຮ້ອນໄປຫາແພດຢູ່ບັນດາໂຮງໝໍໃກ້ບ້ານຂອງທ່ານ ເຊັ່ນ: ໂຮງໝໍນ້ອຍ, ໂຮງໝໍເມືອງ ແລະໂຮງໝໍແຂວງ ເພື່ອໃຫ້ທ່ານໝໍກວດ ແລະປິ່ນປົວທັນເວລາປາສະຈາກການຕິດເຊື້ອພະຍາດໄຂ້ຍຸງໃນຊ່ວງລະດູຝົນນີ້.

แชร์