ບໍລິຄຳໄຊ ສະຫຼອງວັນສ້າງຕັ້ງແຂວງຄົບຮອບ 35 ປີຢ່າງຍິ່ງໃຫຍ່

  ງານສະເຫຼີມສະຫຼອງວັນສ້າງຕັ້ງ ແຂວງບໍລິຄໍາໄຊ ຄົບຮອບ 35 ປີ (6 ມີນາ 1984-6 ມີນາ 2019) ໄດ້ຈັດຂຶ້ນຢ່າງຍິ່ງໃຫຍ່ໃນຕອນແລງຂອງວັນທີ 6 ມີນານີ້ທີ່ເດ່ີນສວນອານຸສາວະລີ ທ່ານ ສີສົມພອນ ລໍວັນໄຊ, ເຊິ່ງໃຫ້ກຽດເຂົ້າຮ່ວມໃນງານທີ່ມີຄວາມໝາຍຄວາມສຳຄັນໃນຄັ້ງນີ້ໂດຍທ່ານ ພັນຄໍາ ວິພາວັນ ຮອງປະທານປະເທດ, ມີຄະນະພັກອໍານາດການປົກຄອງແຂວງ, ພະເຖລານຸເຖລະ, ພະນັກງານອາວຸໂສບຳນານ, ວິລະຊົນແຫ່ງຊາດ, ພະນັກງານ, ທະຫານ, ຕໍາຫຼວດ, ນັກຮຽນ, ນັກສຶກສາພ້ອມດ້ວຍພໍ່ແມ່ປະຊາຊົນຊາວແຂວງບໍລິຄຳໄຊ ແລະບັນດາແຂກຖືກເຊີນຈາກສູນກາງ-ທ່ອງຖິນເຂົ້າຮ່ວມຢ່າງເປັນຂະບວນຟົດຟື້ນ.

ພາຍໃນງານໄດ້ຮັບຊົມການສະແດງສີລະປະວັນນະຄະດີຈາກບັນດາໂຮງຮຽນແຫ່ງຕ່າງໆພາຍໃນແຂວງ ແລະໃນໂອກາດອັນສະຫງ່າລາສີນີ້ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ ໄດ້ຂຶ້ນກ່າວຕໍ່ງານໂຮມຊຸມນຸມຄັ້ງນີ້ວ່າ: ພາຍຫຼັງປະເທດຊາດໄດ້ຮັບການປົດປ່ອຍມາຮອດເດືອນເມສາປີ 1976 ແຂວງບໍລິຄໍາໄຊ ໄດ້ຖືກຍຸບເມືອງຄໍາເກີດ ແລະເມືອງຫີນບູນໃຫ້ຂຶ້ນກັບແຂວງຄໍາມ່ວນສ່ວນເມືອງປາກເຈົ້າ,ເມືອງປາກຊັນ,ເມືອງບໍລິຄັນ ແລະເມືອງທ່າໂພນສັນຖືກໂຮມເຂົ້າເປັນເມືອງໜຶ່ງເອີ້ນວ່າເມືອງປາກຊັນ ໄປຂຶ້ນກັບແຂວງວຽງຈັນ ຊຶ່ງເປັນປ້ອມດ້ານໜ້າ ແລະປະເຊີນໜ້າໂດຍກົງກັບກົນອຸບາຍມ້າງເພທໍາລາຍຢ່າງຮອບດ້ານຂອງຈັກກະພັດ ແລະລູກແຫຼ້ງ ຕີນມືຂອງພວກເຂົາ, ຄະນະພັກ-ອົງການ ປົກຄອງພວກເຮົາ ໄດ້ຕັ້ງໜ້າທໍາບາດ ແຜສົງຄາມປົວແປງຊິວິດການເປັນຢູ່ ແລະແກ້ໄຂສັງຄົມອັນເປື່ອຍເຍື່ອຍທີ່ລະບອບເກົ່າໄດ້ປະໄວ້ໃນເວລານັ້ນອາດເວົ້າໄດ້ວ່າເປັນໄລຍະທົດສອບທ້າທາຍຢ່າງຫຼວງຫຼາຍລະຫວ່າງກໍາລັງປະຕິວັດ ແລະພວກຝືນປະຕິວັດໃຜຈະເອົາຊະນະໃຜແຕ່ດ້ວຍຄວາມສາມັກຄີ ແລະຄວາເດັດດຽ່ວໄດ້ຜ່ານຜ່າທຸກອຸປະສັກນາໆປະການສາມາດຍາດໄດ້ໄຊຊະນະເປັນກ້າວໆມາ ແລະໄດ້ສ້າງພື້ນຖານຈໍານວນໜຶ່ງ.

  ດ້ວຍຄວາມເປັນຫວ່ງເປັນໄຍຂອງສູນກາງພັກເພື່ອເຮັດໃຫ້ການຊີ້ນໍາໆ-ນໍາພາ ມີຄວາມສະດວກແທດເຖິງຕອບສະໜອງຮອງຮັບ 2 ໜ້າທີ່ຍຸດທະສາດປົກປັກຮັກສາ ແລະສ້າງສາພັດທະນາປະເທດຊາດ, ກົມການເມືອງສູນກາງພັກຈຶ່ງໄດ້ອອກມີມະຕິ ເລກທີ 03/ກມສພ ລົງວັນທີ 6 ມີນາ 1984 ວ່າດ້ວຍການ ສ້າງຕັ້ງແຂວງບໍລິຄໍາໄຊ ຊຶ່ງລົງນາມໂດຍ ທ່ານ ໄກສອນ ພົມວິຫານ ເລຂາທິການໃຫຍ່ພັກປະຊາຊົນປະຕິວັດລາວພ້ອມທັງໄດ້ແຕ່ງຕັ້ງຄະນະຮັບຜິດຊອບ-ຊີ້ນໍາ ແຂວງບໍລິຄໍາໄຊ ນໍາພາໂດຍສະຫາຍ ບຸນທອນ ລໍໄຊປັນຍາ ແລະມີຄະນະປະ ຈໍານວນໜຶ່ງໃນເວລານ້ັນແຂວງບໍລິຄໍາໄຊ ໄດ້ລວມເອົາບັນດາເມືອງທີ່ຢູ່ຫາງໄກຊອກຫຼີກຂອງແຂວງວຽງຈັນ ແລະ ແຂວງຄໍາມ່ວນ.

   ເລີ່ມແຕ່ນັ້ນເປັນຕົ້ນມາຄະນະນໍາຂອງແຂວງໄດ້ອອກແຮງເຄື່ອນໄຫວຊີ້ນໍາ-ນໍາພາ ໃນທຸກຂົງເຂດວຽກງານໂດຍສະເພາະການລົງກໍ່ສ້າງຮາກຖານເມືອງໄດ້ ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບ,ກໍ່ສ້າງປັບປຸງພັກອົງການປົກຄອງໃຫ້ເຂັ້ມແຂງໜັກແໜ້ນຕິດພັນກັບການພັດທະນາເສດຖະກິດແກ້ ໄຂຊິວິດການເປັນຢູ່ຂອງພະນັກງານ ປະຊາຊົນບັນດາເຜົ່າສ້າງ ແລະ ປັບປຸງກໍາ ລັງຫຼວງ ທະຫານລາບກອງຫຼອນເຄື່ອນໄຫວແກ້ໄຂກຸ່ມຄົນບໍ່ດີອັນເຮັດໃຫ້ທ້ອງ ຖິ່ນພວກເຮົາມີຄວາມສະຫງົບການພັດທະນາຊິວິດການເປັນຢູ່ຂອງປະຊາຊົນດີຂຶ້ນເປັນກ້າວໆທັງເປັນປັດໄຈໃນການປະກອບສ່ວນສ້າງເງື່ອນໄຂໃຫ້ແກ່ການ ເປີດກອງປະຊຸມໃຫຍ່ຄັ້ງທີ I ຂອງອົງຄະນະພັກແຂວງບໍລິຄໍາໄຊ ໄຂຂຶ້ນຢ່າງເປັນທາງການໃນລະຫວ່າງວັນທີ 13-16 ຕຸລາ ປີ 1986.

  ມາເຖິງປະຈຸບັນກອງປະຊຸມໃຫຍ່ຂອງອົງຄະນະພັກແຂວງບໍລິຄໍາໄຊ ໄດ້ເປີດຂຶ້ນເປັນຄັ້ງທີ່ VI ເຖິງວ່າມີຄວາມຫຍຸ້ງຫຍາກ ແລະສິ່ງທ່າທ້າຍກໍ່ຕາມເສດຖະ ກິດຂອງແຂວງ ໄດ້ຮັບການພັດ ທະນາ ແລະຂະຫຍາຍຕົວຢ່າງຕໍ່ເນື່ອງ ປີ 2018 ອັດຕາການຂະຫຍາຍຕົວຂອງ ເສດຖະກິດແມ່ນ 6,05% ມູນຄ່າເພີ່ມລວມຍອດຜະລິດຕະພັນພາຍໃນ ບັນລຸ 5.252 ຕື້ກີບ ສະເລ່ຍໃສ່ຫົວຄົນ 2.152 ໂດລາ ຫຼືເທົ່າກັບ 18 ລ້ານກວ່າກີບ ການ ເກັບລາຍຮັບເຂົ້າງົບປະມານບັນລຸໄດ້ 900 ກວ່າຕື້ກີບລື່ນແຜນປີ 10,48%.

  ພ້ອມນີ້ຍັງໄດ້ປະດັບຫຼຽນໄຊແຮງງານຊັ້ນ 1 ຂອງລັດຖະບານ ໃຫ້ແກ່ແຂວງບໍລິຄໍາໄຊ ໃຫ້ກຽດປະດັບໂດຍທ່ານ ພັນຄໍາ ວິພາວັນ ແລະທ່ານຍັງໄດ້ມີຄໍາເຫັນຕໍ່ງານໂຮມຊຸມນຸມມິດຕິງໃນຄັ້ງນີ້ຢ່າງມີຄວາມໝາຍ, ເຊິ່ງທ່ານໄດ້ຍ້ອງຍໍຊົມເຊີຍຕໍ່ຜົນງານ ແລະຜົນສໍາເລັດຂອງອົງຄະນະພັກແຂວງບໍລິຄໍາໄຊຍາດມາໄດ້ໃນໄລ ຍະ 35 ປີຜ່ານມາ ພ້ອມນີ້ພາຍໃນງານ ຍັງມີກິດຈະກໍາຕ່າງໆເປັນຕົ້ນການວາງສະແດງຂາຍສິນຄ້າຜະລິດຕະພັນຕ່າງໆ, ການສະແດງສີລະປະວັນນະຄະດີ, ການ ປະກວດເທດສະການອາຫານພື້ນບ້ານ ຈາກຮ້ານອາຫານຕ່າງໆ ແລະກຸ່ມບ້ານພາຍໃນເມືອງ ແລະຕ່າງເມືອງໄດ້ເຮັດໃຫ້ການສະເຫຼີມສະຫຼອງວັນສ້າງຕັ້ງ ແຂວງບໍລິຄຳໄຊ ຄົບຮອບ 35 ປີ ມີບັນ ຍາກາດເບີກບານມ່ວນຊື່ນ ແລະມີຄວາມ ໝາຍ-ຄວາມສຳຄັນບັນດາທ່ານທີ່ເຂົ້າຮ່ວມຍັງໄດ້ຮັບຊົມການຍິງດອກໄມ້ໄຟຈຳນວນ 35 ຊຸດ.

ຂ່າວ: ວຽງສະຫວັນ   

แชร์