ສຳເລັດການຊ້ອມຮົບຮ່ວມລົດຕັງ ລາວ-ລັດເຊຍ

ຂ່າວ: ຊາຍສົມສັກ ວິໄລສັນ
ພາບ: ສີປະພັນ ແກ້ວມະນີວົງ

     ການຊ້ອມຮົບຮ່ວມລົດຕັງ ລາວ-ລັດເຊຍ ຄັ້ງທີ 2 (LAROS 2021) ທີ່ສະຫະພັນລັດເຊຍເປັນເຈົ້າພາບໄດ້ສຳເລັດລົງຢ່າງຈົບງາມ, ພາຍຫຼັງໄດ້ດໍາເນີນການຝຶກຊ້ອມມາເປັນເວລາ 10 ວັນ, ໂດຍໄດ້ມິການຝຶກຊ້ອມປະສານຍິງລູກປືນແທ້ຄັ້ງສຸດທ້າຍໃນວັນທີ 18 ສິງຫາ 2021 ພາຍໃຕ້ຫົວຂໍ້ “ການເຄື່ອນໄຫວສູ້ຮົບຮ່ວມໃນ ການດຳເນີນການປະຕິບັດການປາບປາມຕ່າວໂຈມຕີກຸ່ມກໍ່ການຮ້າຍ” ແລະ ມາໃນຕອນເຊົ້າວັນທີ 19 ສິງຫາ 2021 ໄດ້ມີພິທີປິດການຊ້ອມຮົບຮ່ວມລົດຕັງລາວ-ລັດເຊຍ (ລາໂຣສ 2021) ຄັ້ງທີ 2 ຢ່າງເປັນທາງການຢູ່ທີ່ສະໜາມຝຶກແອບ 249 ເຊເຣເກສະກີ.
 ຝ່າຍລາວນໍາໂດຍສະຫາຍ ພົນຈັດຕະວາ ສາຍໃຈ ກົມມະສິດ ຮອງຫົວໜ້າກົມໃຫຍ່ເສນາທິການກອງທັບ, ທັງເປັນຫົວໜ້າຄະນະຊີ້ນໍາການຊ້ອມຮົບຮ່ວມລົດຕັງລາວ-ລັດເຊຍ ຄັ້ງທີ 2 (ລາໂຣສ 2021) ຂອງກອງທັບປະຊາຊົນລາວ. ຝ່າຍລັດເຊຍ ນໍາໂດຍ ພົນຕີ ເຊຍວາຣຸກ ກົບເຊຍຣເກ ມີຄາຍອີນໂລວິດຮອງຜູ້ບັນຊາການທະຫານ ເຂດຕາເວັນອອກກໍາລັງປະກອບອາວຸດແຫ່ງສະຫະພັນລັດເຊຍ ແລະ ມີບັນດາຄະນະນຳ, ນາຍ ແລະ ພົນທະຫານທີ່ເປັນຕົວແທນກໍາລັງເຫຼົ່າຮົບລົດຕັງ-ຍານເກາະກອງທັບປະຊາຊົນລາວ ແລະກຳລັງປະກອບອາວຸດລັດເຊຍເຂົ້າຮ່ວມ.
 ສະຫາຍ ພົນຈັດຕະວາ ສາຍໃຈ ກົມມະສິດ ກ່າວວ່າ: ການກະກຽມ ແລະດໍາເນີນການຊ້ອມຮົບຮ່ວມລົດຕັງລາວ-ລັດເຊຍ ຫຼື LAROS 2021 ພາຍໃຕ້ຫົວຂໍ້ “ການເຄື່ອນໄຫວສູ້ຮົບຮ່ວມໃນການປາບປາມກຸ່ມກໍ່ການຮ້າຍ” ໄດ້ດໍາເນີນມາເປັນເວລາ 10 ວັນ ດ້ວຍບັນຍາກາດອັນຟົດຟື້ນເຂັ້ມແຂງ ແລະ ປ່ຽມລົ້ນໄປດ້ວຍມິດຕະພາບ ແລະຄວາມສາມັກຄີກົມກຽວຂອງກຳລັງເຫຼົ່າຮົບລົດຕັງ-ຍານເກາະລາວ-ລັດເຊຍ. ຂ້າພະເຈົ້າພ້ອມດ້ວຍນາຍ ແລະພົນທະຫານ, ຊຶ່ງ ເປັນຕົວແທນຈາກກອງທັບປະຊາ ຊົນລາວ ຮູ້ສຶກຕື່ນເຕັ້ນ ແລະມີຄວາມ ພາກພູມໃຈເປັນຢ່າງຍິ່ງທີ່ໄດ້ມີໂອ ກາດເດີນທາງອັນຍາວໄກມາຊ້ອມ ຮົບຮ່ວມກັບກໍາລັງຂອງກອງທັບ ສ.ຣັດເຊຍ. ການເດີນທາງມາຄັ້ງນີ້, ບໍ່ພຽງແຕ່ເຂົ້າຮ່ວມກິດຈະກໍາຊ້ອມຮົບຮ່ວມເທົ່ານັ້ນ, ຍັງໄດ້ໄປທັດສະນະສຶກສາຢູ່ເມືອງວະ ລາດີໂວສະຕົກ, ຢ້ຽມຢາມໂຮງ ຮຽນທະຫານ, “ທົ່ງມໍລະກົດ”, ຢ້ຽມຢາມຫໍພິພິທະພັນ, ເຮັດກິດຈະກໍາແຂ່ງຂັນກີລາມິດຕະພາບ, ຊົມການສະແດງສິລະປະວັນນະຄະດີ, ຊຶ່ງເຮັດໃຫ້ບັນຍາກາດຂອງການຊ້ອມຮົບຮ່ວມ LAROS 2021 ຄັ້ງນີ້, ເຕັມໄປດ້ວຍຄວາມສຳເລັດສູງ ແລະມີບັນຍາກາດແຫ່ງໄມຕີຈິດມິດຕະພາບອັນຟົດຟື້ນມ່ວນຊື່ນ. ຜ່ານການກະກຽມ, ການຫັດແອບປະສານກໍາລັງ ແລະການຈັດຕັ້ງຊ້ອມສະແດງຕົວຈິງ, ຂ້າພະເຈົ້າຕີລາຄາໄດ້ວ່າພວກເຮົາສາມາດບັນລຸຄາດໝາຍຂອງແຜນການດ້ວຍຄຸນນະພາບທີ່ສູງ.
  ໂອກາດດຽວກັນ, ສະຫາຍ ພົນຕີ ເຊຍວະຣຸກກົບ ເຊຍຣເກ ມີຄາຍ ອີວໂລວິດ ກ່າວວ່າ: ການຊ້ອມຮົບຮ່ວມເຫລົ່າຮົບລົດຕັງໃນຄັ້ງນີ້, ສາມາດຢັ້ງຢືນໄດ້ວ່ານາຍ ແລະພົນທະຫານມີຄວາມຊຳນິຊຳນານ, ມີທັກສະການນຳໃຊ້ອາວຸດໃນລະດັບສູງ ແລະນໍາເອົາຜົນສໍາເລັດອັນງົດງາມມາສູ່ປະເທດຊາດຂອງພວກເຮົາ. ຂ້າພະເຈົ້າຂໍອວຍພອນ ໃຫ້ບັນດານາຍ ແລະພົນທະຫານລັດເຊຍ-ລາວ ຈົ່ງປະສົບຜົນສໍາເລັດໃນວຽກງານປ້ອງກັນຊາດ ແລະໃນວຽກງານອົບຮົມສູ້ຮົບ.
ໃນພິທີດັ່ງກ່າວ, ຝ່າຍລາວໄດ້ປະດັບຫຼຽນກາມິດຕະພາບຂອງກະຊວງປ້ອງກັນປະເທດແຫ່ງ ສປປ ລາວ ໃຫ້ຄະນະຊີ້ນໍາ ແລະພະນັກງານ-ນັກຮົບ ຝ່າຍລັດເຊຍຈໍານວນ 21 ສະຫາຍ ແລະຝ່າຍລັດເຊຍກໍ່ໄດ້ປະດັບຫຼຽນກາມິດຕະພາບກະຊວງປ້ອງກັນປະເທດແຫ່ງສະຫະພັນລັດເຊຍໃຫ້ຄະນະຊີ້ນໍາ ແລະພະນັກງານ-ນັກຮົບ ກອງທັບປະຊາຊົນລາວ ຈໍານວນ 20 ສະຫາຍ ແລະຮ່ວມກັນເປີດຫົວຂໍ້ການຊ້ອມຮົບ ທີ່ສະລັກບົນແຜ່ນຫີນເພື່ອເປັນສັນຍາລັກແຫ່ງການຊ້ອມຮົບຮ່ວມລົດຕັງລາວ-ລັດເຊຍ ຄັ້ງທີ 2 (ລາໂຣສ 2021) ຕື່ມອີກ.

แชร์