ເຈົ້າແຂວງໄຊສົມບູນ ຊຸກຍູ້ວຽກງານເຕັກໂນໂລຊີ ແລະການສື່ສານ

    ໃນວັນທີ 18 ສິງຫາຜ່ານມາ, ທ່ານ ພົນຕີ ຄຳລຽງ ອຸທະໄກສອນ ເຈົ້າແຂວງໄຊສົມບູນໄດ້ລົງພົບປະໂອ້ລົມ ແລະຊຸກຍູ້ຕິດຕາມການຈັດຕັ້ງປະຕິບັດວຽກງານຮອບດ້ານປະຈຳປີ 2021 ຂອງພະແນກເຕັກໂນໂລຊີ ແລະການສື່ສານແຂວງໂດຍໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2021 ຈາກ ທ່ານ ພູແກ້ວ ອິນທະວົງ ຫົວໜ້າພະແນກເຕັກໂນໂລຊີ ແລະການສື່ສານແຂວງ.
    ໂອກາດດັ່ງກ່າວທ່ານເຈົ້າແຂວງໄຊສົມບູນໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດຫລາຍດ້ານທີ່ສາມາດຍາດມາໄດ້ເປັນຕົ້ນວຽກງານເຕັກໂນໂລຊີເປັນວຽກງານໜຶ່ງທີ່ສຳຄັນເນື່ອງຈາກວ່າປະຈຸບັນເປັນຍຸກແຫ່ງການສື່ສານ, ເຕັກໂນໂລຊີຂະຫຍາຍຕົວຢ່າງວ່ອງໄວ ແລະ ທັນສະໄໝຈຶ່ງມີຄວາມຈຳເປັນຕ້ອງໄດ້ນຳໃຊ້ເຄື່ອງມືອຸ ປະກອນທີ່ທັນສະໄໝເຂົ້າໃນການຮັບໃຊ້ວຽກງານໃນດ້ານຕ່າງໆ, ວຽກງານການເງິນສາມາດຈັດເກັບລາຍຮັບເຂົ້າຄັງເງິນແຫ່ງຊາດໄດ້ໃນແຕ່ລະປີ, ຂະຫຍາຍເສົາຮັບ-ສົ່ງສັນຍານຢ່າງເປັນລະບົບເພື່ອໃຫ້ບັນລຸຕາມເປົ້າໝາຍ.
   ເພື່ອຮັບປະກັນການຈັດຕັ້ງປະຕິບັດວຽກງານດັ່ງກ່າວດຳເນີນໄປຢ່າງມີປະສິດທິຜົນນັ້ນ, ຂະແໜງການກ່ຽວຂ້ອງຕ້ອງໄດ້ຮັບການຊີ້ນຳ-ນຳພາຈາກຄະນະນຳໃນການສ້າງພັກ, ພະນັກງານຫລັກແຫລ່ງຕະຫຼອດຮອດພະນັກງານວິຊາການໃຫ້ມີການພັດທະນາທາງດ້ານຄວາມຮູ້-ຄວາມສາມາດ, ເອົາໃຈໃສ່ບຸກບືນປະຕິບັດໜ້າທີ່ຕາມ ຄວາມຮັບຜິດຊອບຂອງຕົນໃຫ້ມີຜົນສຳເລັດ, ພ້ອມກັນນັ້ນຍັງຕ້ອງສຸມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກ, ແຜນພັດທະນາເສດຖະ ກິດ-ສັງຄົມຄັ້ງທີ 2 ຂອງແຂວງ ເຊິ່ງຕິດພັນກັບການຈັດຕັ້ງປະຕິບັດຕາມດໍາລັດ 414 ຂອງລັດຖະບານໃຫ້ປາກົດຜົນເປັນຈິງ.

แชร์