ກອງທຶນພັດທະນາບ້ານ ເພື່ອອະນຸຮັກຊັບພະຍາກອນທຳມະຊາດ

ໂດຍ: ຣັດສະໝີ ດວງສັດຈະ

   ທ່ານ ບຸນມາ ພົມມີໄຊ ຜູ້ປະສານງານການເງິນຊົນນະບົດສະມາຄົມການເງິນຈຸລະພາກ (ສມກຈ) ປະຈຳແຂວງສາລະວັນໄດ້ແຈ້ງວ່າ: ກອງທຶນພັດທະນາບ້ານເພື່ອການອະນຸຮັກເປັນກອງທຶນບ້ານທີ່ໄດ້ຮັບການສ້າງຕັ້ງຂຶ້ນໂດຍໂຄງການ Carbon and Biodi versity ຫຼື CarBi ໄລຍະ II ຂອງອົງການກອງທຶນອະນຸຮັກທໍາມະຊາດໂລກປະຈໍາ ສປປ ລາວ (W WF-Laos) ຊຶ່ງມີຈຸດປະສົງສ້າງກອງທຶນພັດທະນາບ້ານເພື່ອການອະນຸຮັກ, ເພີ່ມການມີສ່ວນຮ່ວມຂອງຊຸມຊົນໃນການຄຸ້ມຄອງ ແລະປົກປັກຮັກສາຊັບພະຍາກອນທໍາມະຊາດຢ່າງມີປະສິດທິພາບ ແລະຍືນຍົງ, ສົ່ງເສີມໃຫ້ມີກິດຈະກໍາສ້າງລາຍຮັບເພື່ອປັບປຸງຊີວິດການເປັນຢູ່ຂອງປະຊາຊົນໃນຊຸມຊົນໃຫ້ດີຂຶ້ນ; ວຽກງານນີ້, ສມກຈ ໃນນາມເປັນອົງກອນທີ່ເຮັດວຽກງານນີ້ໂດຍກົງ ແລະທັງເປັນຕົວແທນຂະແໜງການເງິນຈຸລະພາກໃນ ສປປ ລາວ.

   ດັ່ງນັ້ນຈຶ່ງໄດ້ຮ່ວມມືກັນເພື່ອສະໜັບສະໜູນໃຫ້ການບໍລິການດ້ານວິຊາການ ແລະ ສມກຈ ກໍ່ມີຄວາມພາກພູມໃຈທີ່ໄດ້ເປັນສ່ວນໜຶ່ງໃນການອອກແບບຄູ່ມື, ລະບົບ ບັນຊີ ແລະແບບຟອມຕ່າງໆ ເພື່ອນໍາໃຊ້ເຂົ້າໃນການສ້າງ ແລະ ການບໍລິຫານກອງທຶນ ແລະ ພ້ອມນີ້ທັງເປັນຜູ້ຝຶກໃຫ້ທີມງານຂອງໂຄງການ CarBi ໄລຍະ II; ໃນໄລຍະຕົ້ນມີຈໍານວນ 6 ບ້ານເປົ້າໝາຍຢູ່ໃນເຂດປ່າສະຫງວນແຫ່ງຊາດເຊຊັບ ກວມເອົາ 3 ເມືອງ ຄື: ເມືອງກະລຶມ, ແຂວງ ເຊກອງ; ເມືອງສະໝ້ວຍ ແລະເມືອງຕະໂອ້ຍ, ແຂວງສາລະວັນ.

   ການເຄື່ອນໄຫວໃນໄລຍະລະຍາດໂຄວິດ-19 ຮອບ 2 ໄດ້ສໍາເລັດຂັ້ນຕອນ 1 ກອງປະຊຸມປະຖົມນິເທດເພື່ອກະກຽມການສ້າງກອງທຶນພັດທະນາບ້ານເພື່ອການອະ ນຸຮັກຢູ່ 3 ເມືອງເປົ້າໝາຍຂອງ ແຂວງສາລະວັນ ແລະແຂວງເຊກອງ; ສໍາເລັດຂັ້ນຕອນ 2 ຈັດກອງປະຊຸມນໍາສະເໜີຈຸດປະສົງ ແລະຮູບແບບການສ້າງຕັ້ງກອງທຶນ ພັດທະນາບ້ານ ແລະກະກຽມຄະນະກອງທຶນຂັ້ນບ້ານ ແລະໄດ້ສໍາເລັດຂັ້ນຕອນ 3 ຈັດກອງປະຊຸມ ຄັດເລືອກຄະນະຄຸ້ມຄອງກອງທຶນ ແລະເລືອກຄະນະກໍາມະການ ເພື່ອເປີດບັນຊີທະນາຄານບ້ານຫຼັງຈາກນັ້ນຈະໄດ້ຝຶກອົບຮົມໃຫ້ຄະນະກຳມະການກອງທຶນໃນການຄຸ້ມຄອງບໍລິຫານກອງທຶນບ້ານ.

   ການຮ່ວມມືຂອງອົງການປົກຄອງທ້ອງຖິ່ນ/ຂະແໜງການທີ່ຕິດພັນກັບອໍານາດການປົກຄອງແຕ່ລະຂັ້ນໃຫ້ຄວາມສະດວກຕາມພາລະບົດບາດ ແລະໃຫ້ທິດຊີ້ນໍາເປັນ ຢ່າງດີ, ບໍ່ວ່າຈະເປັນທີມງານຄະນະບໍລິຫານ ແລະວິຊາການຈາກ ສມກຈ, ຄະນະຊີ້ນໍາຂັ້ນແຂວງຈາກພະແນກກະສິກຳ ແລະປ່າໄມ້, ພະເເນກແຜນການ ແລະການລົງທຶນ, ສະຫະພັນແມ່ຍິງແຂວງ,ຄະນະທີ່ປຶກສາແຜນງານຂັ້ນເມືອງຈາກຫ້ອງການກະສິກຳ ແລະປ່າໄມ້ເມືອງ,ຫ້ອງການແຜນການ ແລະການລົງທຶນເມືອງ, ສະຫະ ພັນແມ່ຍິງເມືອງ ເເລະອົງການຈັດຕັ້ງຂັ້ນບ້ານໄດ້ເອົາໃຈໃສ່ໃນການຈັດຕັ້ງປະຕິດບັດວຽກກອງທຶນບ້ານເພື່ອການອະນຸຮັກມີການຊີ້ນໍາ, ປະສານສົມທົບຮ່ວມການເຄື່ອນ ໄຫວໂດຍສະເພາະສະຫະພັນວິຊາການຈາກກະສີກຳເມືອງ ແລະແມ່ຍິງເມືອງທີ່ລົງຕິດຕາມການເຄື່ອນໄຫວຢູ່ໃນບັນດາບ້ານເປົ້າໝາຍ, ສ່ວນອົງການປົກຄອງຂັ້ນບ້ານ ແມ່ນໃຫ້ຄວາມສໍາຄັນຕໍ່ວຽກກອງທຶນສະແດງອອກໃນການລະດົມປະຊາຊົນເຂົ້າຮ່ວມການປະຊຸມ; ພ້ອມກັນນັ້ນ, ທາງຄະນະຮັບຜິດຊອບວຽກກອງທຶນບ້ານກໍ່ມີການ ເຄື່ອນໄຫວວຽກຕາມພາລະບົດບາດທີ່ໄດ້ຮັບຜິດຊອບຂອງແຕ່ລະບ້ານເຮັດໃຫ້ການດໍາເນີນງານສໍາເລັດໄດ້ຕາມຈຸດປະສົງ ແລະເປົ້າໝາຍ, ບັນຫາທີ່ກ່າວມານີ້ຊ່ວຍເຮັດໃຫ້ວຽກງານພາກໜາມຂອງກອງທຶນບ້ານດໍາເນີນໄປຢ່າງສະດວກ ແລະເປັນລະບົບ.

   ເຖິງຢ່າງໃດກໍ່ຕາມມັນໄດ້ສົ່ງຜົນປະໂຫຍດໂດຍກົງຂອງໂຄງການຕໍ່ປະຊາຊົນໂດຍຫຼັງຈາກທີ່ມີກອງທຶນຢູ່ພາຍໃນບ້ານເຫັນວ່າ: ປະຊາຊົນສາມາດເຂົ້າເຖິງແຫຼ່ງທຶນໄດ້ຫຼາຍຂຶ້ນສາມາດນໍາເງິນໃນຮ່ວງນີ້ມາພັດທະນາ-ປັບປຸງ ເສດຖະກິດຂອງຄອບຄົວໃຫ້ດີຂຶ້ນກວ່າເກົ່າສະແດງອອກບໍ່ວ່າຈະລ້ຽງສັດ ຫຼື ປູກຝັງຈາກທີ່ບໍ່ມີທຶນເລີຍ ຫຼືມີທຶນນ້ອຍກໍ່ສາມາດນໍາໃຊ້ເງິນຮ່ວງດັ່ງກ່າວນໍາໄປຕໍ່ຍອດສ້າງອາຊີບ ແລະລາຍໄດ້ໃຫ້ປະຊາຊົນພາຍໃນບ້ານ, ອີກຢ່າງໜຶ່ງຄື: ປະຊາຊົນສາມາດກູ້ສິນເຊື່ອທີ່ມີດອກເບ້ຍຕໍ່າ ແລະນໍາໃຊ້ໃນກິດຈະກໍາທີ່ຕະຫຼາດມີຄວາມຕ້ອງການຫຼາຍເພື່ອຊ່ວຍແກ້ໄຂບັນຫາທາງດ້ານການເງິນໃນຄອບຄົວໃນກໍລະນີສຸກເສີນເປັນຕົ້ນຈ່າຍຄ່າຮຽນ ຫຼືສົ່ງໃຫ້ລູກ; ພ້ອມນັ້ນກໍ່ເຮັດໃຫ້ປະຊາຊົນມີລະບຽບວິໃນການໃຊ້ເງິນ, ມີການແບ່ງສ່ວນໃຊ້ຈ່າຍ, ບັນດາກິດຈະກໍາຕ່າງໆ ທີ່ປ່ອຍສິນເຊື່ອໄປແລ້ວສາມາດເສີມຂະຫຍາຍລາຍຮັບ ແລະກໍາໄລຈາກການລົງທຶນ, ສາມາດຈ່າຍຄືນເງິນກູ້ພ້ອມດອກເບ້ຍໃຫ້ກອງທຶນສິນເຊື່ອບ້ານ ແລະ ຈໍານວນເງິນກອງທຶນສິນເຊື່ອບ້ານຈະໄດ້ຮັບການຂະຫຍາຍໂຕເພື່ອໃຫ້ບ້ານມີຄວາມເຂັ້ມແຂງ, ກອງທຶນສິນເຊື່ອບ້ານມີຄວາມຍືນຍົງໃຫ້ເປັນແຫຼ່ງທຶນຂອງປະຊາຊົນພາຍໃນບ້ານນັບມື້ນັບເພີ່ມຂຶ້ນ.

   ການຕິດຕາມ ແລະສະໜັບສະໜູນແບບໃກ້ຊິດຕິດແທດທາງດ້ານວິຊາການເຮັດໃຫ້ຄະນະຄຸ້ມຄອງກອງທຶນເພື່ອພັດທະນາການບັນທຶກ, ການລົງບັນຊີ, ການສະຫຼຸບ ລາຍງານ, ການນໍາມາຈັດຕັ້ງປະຕິບັດເປັນໄປຕາມລະບຽບການ ແລະເປັນລະບົບ, ດ້ວຍເຫດນີ້ຈຶ່ງອາດຈະມີຄວາມເປັນໄປໄດ້ທີ່ກອງທຶນບ້ານຈະໄດ້ມີການເຕີບໂຕຈົນກາຍ ເປັນທະນາຄານຂະໜາດນ້ອຍໃນທ້ອງຖິ່ນດັ່ງກ່າວ.

   ໃນຜ່ານມາກໍ່ຍັງມີສີ່ງທ້າທ້າຍເປັນຕົ້ນໄລຍະການປະຕິບັດຕາມມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ເຮັດ ໃຫ້ການປະຕິບັດວຽກງານແກ່ຍາວບໍ່ເປັນໄປຕາມແຜນທີ່ວາງໄວ້; ການຕິດຕໍ່ປະສານງານນໍາການຈັດຕັ້ງບ້ານ, ຄະນະກອງທຶນບ້ານບາງຄັ້ງຍັງບໍ່ສະດວກເຮັດວຽກບໍ່ສໍາເລັດຕາມເປົ້າໝາຍທີ່ກໍານົດ; ລາຍຮັບຂອງປະຊາຊົນໃນບ້ານສະເລ່ຍໂດຍລວມແມ່ນຍັງຕໍ່າ ແລະການເຮັດກິດຈະກໍາບາງຢ່າງຍັງບໍ່ທັນມີຕະຫຼາດຮອງຮັບຊັດເຈນ; ການຕິດຕໍ່ສື່ສານເນື່ອງຈາກວ່າບາງ ບ້ານຍັງບໍ່ມີສັນຍານອິນເຕີເນັດ ຫຼື ບໍ່ມີສັນຍານໂທລະສັບເຮັດໃຫ້ມີບັນຫາໃນການສື່ສານ ແລະ ບໍ່ສະດວກເທົ່າທີ່ຄວນ; ປະຊາຊົນຍັງມີຂໍ້ຈໍາກັດການສື່ສານດ້ານພາສາ ທ້ອງຖິ່ນ ແລະລະດັບວັດທະນະທໍາ; ສະພາບຖະໜົນຫົນທາງບໍ່ເອື້ອອໍານວຍໂດຍສະເພາະໃນໄລຍະລະດູຝົນມີທາງຂາດ, ທາງມື່ນບ່ອນເປັນພູຄ້ອຍຊັນ, ນໍ້າຖ້ວມ, ດິນເຈື່ອນ ແລະອື່ນໆ.

แชร์