ປາກແຊງຕັ້ງເປົ້າຜົນຜະລິດເຂົ້າ 717 ໂຕນ

ຂ່າວ: ສີສຸວັນ

   ເມືອງປາກແຊງ ແຂວງຫຼວງພະບາງ ໄດ້ຕັ້ງເປົ້າຜົນການຜະລິດເຂົ້າໃນປີ 2021 ນີ້ ໃຫ້ບັນລຸໄດ້ 717 ໂຕນ, ຜະລິດຕະພາບ 4,5 ໂຕນຕໍ່ເຮັກຕາ ໂດຍໄດ້ເລັ່ງລົງຊຸກຍູ້ ແລະຕິດຕາມການຜະລິດເຂົ້າໃນລະດູຝົນຂອງພໍ່ແມ່ປະຊາຊົນແນໃສ່ເຮັດໃຫ້ບັນລຸຕາມຄວາມຄາດຫວັງ.

   ທ່ານ ສຸກດາວັນ ພັນຈັກຂັນ ເຈົ້າເມືອງໆປາກແຊງໄດ້ລາຍງານຕໍ່ສື່ຂ່າວພວກເຮົາຜ່ານກອງປະຊຸມຄົບຄະນະບໍລິຫານງານພັກເມືອງປາກແຊງເປີດກວ້າງຄັ້ງທີ 5 ສະໄໝ VI ວ່າງບໍ່ດົນນີ້ຮູ້ວ່າ: ສໍາລັບວຽກງານກະສິກໍາແມ່ນໄດ້ເອົາໃຈໃສ່ລົງຊຸກຍູ້ ແລະ ຕິດຕາມການຜະລິດລະດູຝົນຕາມທ່າແຮງຂອງປະຊາຊົນໃນນັ້ນໄດ້ປູກເຂົ້າໄຮ່ ເນື້ອທີ່ 2.627 ເຮັກຕາ, ຄາດວ່າຜົນຜະລິດໃຫ້ໄດ້ 3.415,10 ໂຕນ,ຜະລິດຕະພາບ 1,3 ໂຕນຕໍ່ເຮັກຕາ, ເນື້ອທີ່ປູກເຂົ້ານາ 159,47 ເຮັກຕາ ແລະຜົນຜະລິດຈະໃຫ້ໄດ້ 717 ໂຕນ, ຜະລິດຕະພາບ 4,5 ໂຕນຕໍ່ເຮັກຕາ.

    ຄຽງຄູ່ການປູກເຂົ້າແລ້ວຍັງໄດ້ລົງຊຸກຍູ້ຕິດຕາມການປູກຜັກໃນເຮືອນຮົ່ມຈໍານວນ 10 ບ້ານ 18 ຫຼັງ ມີເນື້ອທີ່ 0,22 ເຮັກຕາ ແລະໄດ້ຝຶກອົບຮົມເຕັກນິກການລ້ຽງສັດ 3 ກຸ່ມ 15 ບ້ານຄື: ກຸ່ມຫາດພວນ 8 ບ້ານ, ກຸ່ມ ບ້ານໜອງ 4 ບ້ານ, ກຸ່ມບວມກອກ 3 ບ້ານ, ຊຸກຍູ້, ຕິດຕາມການລ້ຽງສັດປີກໃຫ້ໄດ້ 5 ບ້ານ; ຊຸກຍູ້, ຕິດຕາມການລ້ຽງ ປາ ແລະປ່ອຍປາໃສ່ໜອງປະຊາ ຊົນໃຫ້ໄດ້ 3 ບ້ານ 15 ໜອງ, ສືບ ຕໍ່ລົງສ້າງວັງສະຫງວນໃຫ້ໄດ້ 2 ວັງ 2 ບ້ານ, ສືບຕໍ່ສັກຢາປ້ອງກັນ ພະຍາດສັດລ້ຽງໃນທົ່ວເມືອງເປັນຕົ້ນແມ່ນງົວ, ຄວາຍ, ໝູ ແລະສັດປີກ ແລະຂຶ້ນທະບຽນພິມສັດໃຫ່ຍໃນທົ່ວເມືອງ; ລົງກວດກາຄືນການຈັດສັນເຂດລ້ຽງສັດ, ການປ່ອຍສັດຊະຊາຍຢູ່ພາຍໃນກຸ່ມສົບແຈກ ແລະບ້ານໃຫ່ຍປາກແຊງ,ຕິດຕາມການເກັບກ່ຽວຜົນຜະລິດການປູກພືດເປັນສິນຄ້າພາຍໃນເມືອງໃນເນື້ອທີ່ 1.655,95 ເຮັກຕາ, ຄາດ ຄະເນຜົນຜະລິດໃຫ້ໄດ້ 3.591,23 ໂຕນ.

   ເມືອງປາກແຊງ ແຂວງຫຼວງພະບາງ ເປັນເມືອງພູດອຍເນື້ອທີ່ຂອງເມືອງເປັນພູສູງຊັນກວມ 91% ຂອງເນື້ອທີ່ທັງໝົດເປັນເມືອງໜຶ່ງໃນ 47 ເມືອງທຸກຍາກຂອງທົ່ວປະເທດ ແລະເປັນໜຶ່ງໃນ 4 ເມືອງທຸກຍາກຂອງແຂວງຫຼວງພະບາງຫ່າງຈາກເທສະບານແຂວງປະມານ 84 ກິໂລແມັດ ທົ່ວເມືອງມີເນື້ອທີ່ທັງໝົດ 1.663,93 ກິໂລຕາແມັດ, ປະກອບມີ 52 ບ້ານ, ມີຄອບຄົວທັງໝົດ 4.342 ຄອບຄົວ, ມີພົນລະເມືອງທັງໝົດ 23.457 ຄົນ, ຍິງ 11.515 ຄົນ, ໃນນັ້ນເຜົ່າລາວລຸ່ມ 2.869 ຄົນ,ຍິງ 1.397 ຄົນ, ເຜົ່າກຶ່ມມຸ 19.438 ຄົນ, ຍິງ 9.590 ຄົນ, ເຜົ່າມົ້ງ 1.149 ຄົນ, ຍິງ 522 ຄົນ.

แชร์