ສສງ ນາກາຍ ມາຈາກປະຊາຊົນເພື່ອປະຊາຊົນ

ຂ່າວ: ຣັດສະໝີ ດວງສັດຈະ 

   ໃນຫວ່າງມໍ່ໆມານີ້; ຜູ້ສື່ຂ່າວພວກເຮົາໄດ້ສໍາພາດທ່ານ ບຸນມາ ພົມມີໄຊ ຜູ້ປະສານງານການເງິນຊົນນະບົດປະຈໍາສະຫະກອນສິນເຊື່ອ ແລະເງິນຝາກປະຢັດນາກາຍ (ສສງ ນາກາຍ) ໄດ້ໃຫ້ ຮູ້ວ່າ: ສສງ ນາກາຍ ພວກເຮົາໄດ້ໃຫ້ການສະໜັບສະໜູນກອງທຶນ 24 ຄຸ້ມບ້ານພາຍໃຕ້ການຊີ້ນໍາຂອງທີ່ປຶກສາກິດຕິມະສັກຂອງເມືອງນາກາຍ, ແຂວງຄໍາມ່ວນ ໂດຍການນໍາພາ ແລະຕິດຕາມຢ່າງໃກ້ຊິດທາງວິຊາການຈາກສະມາຄົມການເງິນລະພາກແຫ່ງ ສປປ ລາວ; ພ້ອມນັ້ນ, ຍັງຮັບການສະໜັບສະ ໜູນໂດຍບໍລິສັດນໍ້າເທີນ 2 ແລະອົງກອນ ADA ລຸກຊໍາບວກຊຶ່ງ ສສງ ນາກາຍເປັນ ສສງ ມີເອກະລັກພິເສດ, ເພາະສະພາ ແລະຄະນະບໍລິຫານງານແມ່ນມາຈາກປະຊາຊົນໃນ 16 ຄຸ້ມບ້ານທີ່ຖືກຍົກຍ້າຍຈັດສັນ ແລະພວກເຂົາເຈົ້າໄດ້ມີຄວາມກະຕືລືລົ້ນ ແລະໝາຍໝັ້ນຕັ້ງໃຈທີ່ຈະສ້າງ ສສງ ໃຫ້ຍືນຍາວເພື່ອສະໜັບສະໜູນກອງທຶນບ້ານໃນ 24 ຄຸ້ມບ້ານ.

   ຍຸດທະສາດຂອງ ສສງ ໃນອະນາຄົດກໍ່ເພື່ອຄວາມຍືນຍົງໂດຍຈະໄດ້ເປີດໃຫ້ບໍລິການໃນບ້ານອື່ນໆພາຍໃນເມືອງນາກາຍ ເເລະເມືອງອ້ອມຂ້າງ; ໃນໂອກາດນີ້, ທ່ານ ນາງ ປະມວນ ເພັດທານີ ຜູ້ອໍານວຍການສະມາຄົມການເງິນລະພາກແຫ່ງ ສປປ ລາວ ໄດ້ຢືນຢັນວ່າ: ສມກຈ ເປັນຜູ້ຊີ້ນໍາ ແລະໃຫ້ຄໍາປຶກສາດ້ານວິຊາການ, ພວກເຮົາໝັ້ນໃຈວ່າ: ສສງ ນາກາຍຈະມີໂອກາດຫຼາຍທີ່ຈະຂະຫຍາຍການບໍລິການ, ສາເຫດໜຶ່ງທີ່ຈະ ຂະຫຍາຍໄດ້ກໍ່ແມ່ນຍ້ອນທິມງານມີ ຄວາມເຂັ້ມແຂງ; ປະຈຸບັນ ສສງ ນາກາຍ ຈະສາມາດໃຫ້ບໍລິການດ້ານການເງິນແບບທົ່ວເຖິງ ແລະຈະມີສະມາຊິກທີ່ເປັນກອງທຶນບ້ານ 24 ກອງທຶນ ແລະມີແຜນຂະຫຍາຍກອງທຶນບ້ານອອກຕື່ມຢ່າງໜ້ອຍ 35 ກອງທຶນພາຍໃນປີ 2021.

  ການເຄື່ອນໄຫວໃນໄລຍະການລະບາດພະຍາດໂຄວິດ 19 ຮອບ 2 ຊຶ່ງ ພວກເຮົາໄດ້ສໍາເລັດການຈັດຕັ້ງຂຶ້ນຫ້ອງການ ສສງ ນາກາຍ ຫຼັງໃໝ່ໃນທ້າຍເດືອນກໍລະກົດ 2021. ຂະນະດຽວກັນກໍ່ສໍາເລັດແຜນປະຕິບັດເບື້ອງຕົ້ນໃນການຂະຫຍາຍກອງທຶນບ້ານຢູ່ເມືອງຍົມມະລາດ, ແຂວງຄໍາມ່ວນ ເຊັ່ນ: ໄດ້ມີການແຕ່ງຕັ້ງຄະນະຮັບຜິດ ຊອບ ແລະ ຄະນະຊີ້ນໍາຂັ້ນເມືອງປະຈໍາຢູ່ ເມືອງຍົມມະລາດ;ສໍາເລັດກອງປະຊຸມເຜີຍແຜ່ປະຫວັດຄວາມເປັນມາ,ລະບຽບການພາຍໃນ,ນະໂຍບາຍ ແລະ ຜະລິດຕະພັນຂອງ ສສງ ນາກາຍ ໃຫ້ເເກ່ຫົວໜ້າ/ຄະນະຫ້ອງການທີ່ກ່ຽວຂ້ອງຂອງເມືອງຍົມມະລາດໃນທ້າຍເດືອນກໍລະກົດ 2021 ແລະ ສໍາເລັດກອງປະຊຸມໃຫຍ່ວິສາມັນປະຈໍາປີ 2020 ເພື່ອປັບປຸງກົດລະບຽບພາຍໃນຂອງກອງທຶນບ້ານ, ຂອງ ສສງ ໃນບາງມາດຕາເພື່ອໃຫ້ເທດເໝາະກັບການປະຕິບັດຕົວຈິງໃນຕົ້ນເດືອນສິງຫາ 2021.

แชร์