ສະພາແຫ່ງຊາດລາວ ແລະກຳປູເຈຍ ເສີມຂະຫຍາຍການຮ່ວມມື

ພາບ ແລະຂ່າວ: ອານຸສອນ ພູມມີທອນ

    (ສພຊ) ເພື່ອເປັນການສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການພົວພັນແບບຄູ່ຮ່ວມມືຍຸດທະສາດຮອບດ້ານ ແລະໝັ້ນຄົງຍາວນານ ລະຫວ່າງລາວ-ກໍາປູເຈຍ ກໍ່ຄືລະຫວ່າງສອງອົງການນິຕິບັດຍັດຂອງສອງປະເທດໃນຕອນເຊົ້າວັນທີ 19 ສິງຫາ 2021 ທ່ານ ໄຊສົມພອນ ພົມວິຫານ ປະທານສະ ພາແຫ່ງຊາດ ແຫ່ງ ສປປ ລາວ ພົບປະທາງໄກກັບສົມເດັດອັກຄະມະຫາໂປເຢຍ ຈັກກຼີ ເຮັງ ຊໍາຣິນ ປະທານສະພາແຫ່ງຊາດແຫ່ງລາຊະອານາຈັກກໍາປູເຈຍ.

   ການພົບປະຄັ້ງນີ້ສອງຝ່າຍໄດ້ສະແດງຄວາມຂອບໃຈ ແລະຊົມເຊີຍເຊິ່ງັນ ແລະກັນທີ່ໄດ້ຮັບເລືອກຕັ້ງເປັນປະທານສະພາແຫ່ງຊາດກຳປູເຈຍ ແລະປະທານສະພາແຫ່ງຊາດໃນໄລຍະທີ່ຜ່ານມາ. ພ້ອມທັງແຈ້ງໃຫ້ກັນຊາບສະພາບການພົ້ນເດັ່ນຂອງແຕ່ລະປະເທດເປັນຕົ້ນສະພາບການທາງດ້ານການພັດທະນາເສດຖະກິດ-ສັງຄົມ, ການປ້ອງກັນ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ຢູ່ ສປປ ລາວ ແລະລາຊະອານາຈັກກໍາປູເຈຍໃນປະຈຸບັນ; ຮ່ວມກັນຕີລາຄາຄືນການພົວພັນຮ່ວມມືລະຫວ່າງ ສປປ ລາວ ແລະລາຊະອານາຈັກກໍາປູເຈຍເຊິ່ງປີນີ້ເປັນປີຄົບຮອບ 65 ປີ ແຫ່ງການສ້າງຕັ້ງສາຍພົວພັນທາງການທູດລາວ-ກໍາປູເຈຍ, ການຈັດຕັ້ງປະຕິບັດບັນດາເອກະສານ ແລະ ຂໍ້ຕົກລົງຕ່າງໆ ທີ່ສອງຝ່າຍໄດ້ລົງນາມຮ່ວມກັນລວມທັງຜົນການຕົກລົງຮ່ວມກັນລະຫວ່າງສອງນາຍົກລັດຖະມົນຕີລາວ-ກຳປູເຈຍໃນໄລຍະຜ່ານມາໃຫ້ເປັນຮູບປະທຳ, ໃຫ້ມີການສຶບຕໍ່ແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງຈົນຮອດຂັ້ນວິຊາການນັບແຕ່ຂັ້ນສູນກາງຮອດຂັ້ນທ້ອງຖິ່ນຢ່າງເປັນປົກກະຕິ. ໃນໂອກາດນີ້, ສອງປະທານສະພາແຫ່ງຊາດລາວ ແລະກຳປູເຈຍກໍໄດ້ຮ່ວມກັນທົບທວນຄືນການພົວພັນຮ່ວມມືລະຫວ່າງສອງອົງການນິຕິບັນຍັດໃນໄລຍະຜ່ານມາໂດຍໄດ້ຈັດຕັ້ງປະຕິບັດບົດບັນທຶກຊ່ວຍຈຳວ່າດ້ວຍການຮ່ວມມືລະຫວ່າງສອງສະພາແຫ່ງຊາດລາວ ແລະກຳປູເຈຍເຊິ່ງສະແດງອອກມີການ ແລກປ່ຽນຢ້ຽມຢາມລະຫວ່າງສະພາປະຊາຊົນຂັ້ນແຂວງທີ່ມີຊາຍແດນຕິດຈອດນຳກັນ, ມີການຈັດສຳມະນາເພື່ອແລກປ່ຽນບົດຮຽນກ່ຽວກັບການຈັດຕັ້ງປະຕິບັດພາລະບົດບາດດ້ານນິຕິບັນຍັດ, ມີການແລກປ່ຽນຂໍ້ມູນຂ່າວສານ, ແລກປ່ຽນສານຊົມເຊີຍໃນໂອກາດວັນສຳຄັນຂອງຊາດ; ໃນໄລຍະການລະບາດຂອງພະຍາດໂຄວິດ-19, ກໍ່ໄດ້ມີການຊ່ວຍເຫຼືອເຊິ່ງກັນ ແລະກັນ, ມີການສະໜັບສະໜູນ ແລະຮ່ວມມືກັນໃນເວທີລັດຖະສະພາພາກພື້ນ ແລະສາກົນ. ໃນຕໍ່ໜ້າສອງຝ່າຍເຫັນດີສືບຕໍ່ເພີ່ມທະວີການພົວພັນຮ່ວມມືນຳກັນໂດຍມີການສຶບຕໍ່ຈັດຕັ້ງປະຕິບັດບົດບັນທຶກຄວາມເຂົ້າໃຈວ່າດ້ວຍການຮ່ວມມືທີ່ທັງສອງອົງການນິຕິບັນຍັດໄດ້ລົງນາມຮ່ວມກັນໃນປີ 2019 ໃຫ້ໄດ້ຮັບຫມາກຮັບຜົນຕົວຈິງແນໃສ່ນຳເອົາຜົນປະໂຫຍດຕົວຈິງມາສູ່ປະຊາຊົນທັງສອງຊາດລາວ ແລະກຳປູເຈຍ.

   ໃນການພົບປະຄັ້ງນີ້, ທ່ານປະທານສະພາແຫ່ງຊາດລາວໄດ້ສະແດງຄວາມຂອບໃຈຕໍ່ລັດຖະບານ, ສະພາແຫ່ງຊາດ ແລະປະຊາຊົນກໍາປູເຈຍທີ່ໄດ້ໃຫ້ການຊ່ວຍເຫຼືອອຸປະກອນການແພດທີ່ຈໍາເປັນເປັນຕົ້ນ: ຜ້າອັດປາກ ຈໍານວນ 2 ລ້ານອັນ, ຊຸດ PPE ຈໍານວນ 20.000 ຊຸດ ແລະອຸປະກອນອື່ນໆຈໍານວນໜຶ່ງໃຫ້ແກ່ ສປປ ລາວ ໃນໄລຍະຜ່ານມາ.

   ສອງທ່ານປະທານສະພາແຫ່ງຊາດລາວ-ກໍາປູເຈຍ ໄດ້ອວຍພອນ ແລະເຊື້ອເຊີນກັນ ແລະກັນໄປຢ້ຽມຢາມສັນຖະວະໄມຕີຢ່າງເປັນທາງການໃນເວລາອັນໝາະສົມຫາກສະພາບການແຜ່ລະບາດຂອງພະຍາດໂຄວິດ-19 ຜ່ອນຄາຍລົງ. 

แชร์