ລາວມີແຫຼ່ງຜະລິດໄຟ 86 ແຫ່ງ

   ສປປ ລາວ ເປັນປະເທດທີ່ມີແມ່ນໍ້ານ້ອຍໃຫຍ່ຫຼາຍສາຍຊຶ່ງເໝາະສົມແກ່ການສ້າງແຫຼ່ງຜະລິດໄຟຟ້າໄວ້ຊົມໃຊ້ພາຍໃນ ແລະສົ່ງອອກໄປຂາຍຕ່າງປະເທດໂດຍເວລານີ້ມີແລ້ວ 86 ແຫ່ງ ລວມກຳລັງການຕິດຕັ້ງ 10.448 ເມກາວັດ ທີ່ສ່ວນຫຼາຍແມ່ນພະລັງງານໄຟຟ້ານໍ້າຕົກຂະນະທີ່ມີອີກເກືອບ 20 ໂຄງການກຳລັງກໍ່ສ້າງ ແລະ 3 ໂຄງການຈະສຳເລັດໄວນີ້.

  ຕາມການເປີດເຜີຍຂໍ້ຂໍ້ມູນໃນໂອກາດທີ່ທ່ານ ບົວເທບ ມາໄລຄຳ ຫົວໜ້າກົມຄຸ້ມຄອງພະລັງງານພ້ອມດ້ວຍຄະນະວິຊາການ ແລະຄະນະວິຊາການພະແນກພະລັງງານ ແລະບໍ່ແຮ່ແຂວງບໍລິຄຳໄຊໄດ້ລົງຕິດຕາມກວດກາການດຳເນີນງານການຜະລິດ ແລະບຳລຸງຮັກສາ, ວຽກງານຄວາມປອດໄພຂອງເຂື່ອນ, ການບໍລິຫານຈັດການອ່າງນໍ້າ ແລະແຜນຮັບມືສຸກເສີນຂອງໂຄງການເຂື່ອນໄຟຟ້ານໍ້າງຽບ 1 ເມື່ອວັນທີ 16 ສິງຫາຜ່ານມາຮູ້ວ່າ: ມາຮອດເດືອນມິຖຸນາ 2021 ທົ່ວປະເທດມີແຫຼ່ງຜະລິດໄຟຟ້າທີ່ມີກຳລັງຕິດຕັ້ງ 1 ເມກາວັດ ຂຶ້ນໄປທັງໝົດມີ 86 ແຫ່ງ ໃນນີ້ເປັນພະລັງງານໄຟຟ້ານໍ້າຕົກ 73 ແຫ່ງ, ແສງຕາເວັນ 8 ແຫ່ງ,ຊິວະມວນ 4 ແຫ່ງ ແລະພະລັງງານຄວາມຮ້ອນຖ່ານຫີນ 1 ແຫ່ງ ລວມກຳລັງຕິດຕັ້ງ 10.448 ເມກາວັດ, ຄວາມອາດສາມາດຜະລິດພະລັງງານໄຟຟ້າໄດ້ 54.05 ລ້ານກິໂລວັດ ໂມງຕໍ່ປີ ແລະອັດຕາການຊົມໃຊ້ໄຟຟ້າຂອງຄົວເຮືອນໄດ້ 95 ເມກາວັດ. 

ນອກຈາກນີ້ຍັງມີໂຄງການຢູ່ໃນໄລຍະການກໍ່ສ້າງອີກ 19 ໂຄງການລວມກຳລັງຕິດຕັ້ງ 2.584 ເມກາວັດ ແລະຈະມີ 3 ໂຄງການ ທີ່ຈະສຳເລັດໃນໄວໆນີ້ຄື: ໂຄງການເຂື່ອນໄຟຟ້ານໍ້າກົງ 1 ທີ່ຈະສຳເລັດໃນເດືອນສິງຫາ 2021 ນີ້, ໂຄງການເຂື່ອນໄຟຟ້ານໍ້າອູ 7 ຈະສຳເລັດໃນເດືອນກັນຍາ 2021 ແລະ ຈະສຳເລັດໃນເດືອນຕຸລາ 2021 ແມ່ນໂຄງການເຂື່ອນໄຟຟ້ານໍ້າກົງ 3.

   ແນວໃດກໍ່ດີແຫຼ່ງພະລິດໄຟຟ້າໃນລາວແມ່ນໄດ້ປະກອບສ່ວນສຳຄັນໃນການແກ້ໄຂຊີວິດການເປັນຂອງປະຊາຊົຍລາວບັນດາເຜົ່າໂດຍສະເພາະແມ່ນການແກ້ໄຂຄວາມທຸກຍາກຂອງປະຊາຊົນທີ່ສຳຄັນຄືສາມາດຊ່ວຍໃຫ້ພົນລະເມືອງໄດ້ຊົມໃຊ້ໄຟຟ້າຖາວອນຫຼາຍຂຶ້ນ ແລະທົ່ວເຖິງເປັນຕົ້ນແມ່ນເຂດຫ່າງໄກສອກຫຼີກພ້ອມດຽວກັນນັ້ນຍັງສາມາດເປັນສິນຄ້າສົ່ງອອກໄປຂາຍໄປຍັງຕ່າງປະເທດເອົາເງິນຕາເຂົ້າມາໄດ້ເປັນຈຳນວນຫຼາຍໃນແຕ່ລະປີ.

  ສະເພາະ 6 ເດືອນປີ 2021 ການສົ່ງອອກໄຟຟ້າແມ່ນໄດ້ປະກອບສ່ວນສຳຄັນໃນມູນຄ່າການຄ້າຂອງລາວກັບຕ່າງປະເທດທີ່ບັນລຸໄດ້ທັງໝົດປະມານ 6.784 ລ້ານໂດລາສະຫະລັດ ເກີນດູນການຄ້າ 735 ລ້ານໂດລາສະຫະລັດ ແຕ່ຖ້າຫາກບໍ່ລວມຕົວເລກນຳເຂົ້າ ແລະສົ່ງອອກໄຟຟ້າແມ່ນຍັງຈະຂາດດຸນປະມານ 85 ລ້ານໂດລາສະຫະລັດ.

แชร์