ທຫລ ສະຫຼຸບວຽກບັນຊີ ແລະການເງິນ

   ວັນທີ 17 ສິງຫາ 2021 ທີ່ສະຖາບັນການທະນາຄານ ນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບວຽກງານບັນຊີ ແລະການເງິນທະນາຄານ ແຫ່ງ ສປປ ລາວ (ທຫລ) ປີ 2021 ໂດຍໃຫ້ກຽດການເປັນປະທານຂອງ ທ່ານ ນາງ ວັດທະນາ ດາລາລອຍ ຮອງຜູ້ວ່າການ ທຫລ, ມີທ່ານ ນາງ ນະຄອນສີ ມະໂນທັມ ວ່າການຫົວໜ້າກົມບັນຊີ ແລະການເງິນພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ນາງ ວັດທະນາ ດາລາລອຍ ກ່າວວ່າ: ກອງປະຊຸມຄັ້ງນີ້ແມ່ນເພື່ອສະຫຼຸບການເຄື່ອນໄຫວວຽກງານບັນຊີ ແລະການເງິນຂອງ ທຫລ ໃນໄລຍະ 5 ປີ ຜ່ານມາ (2016-2020) ແລະທິດທາງແຜນການໃນ 5 ປີ ຕໍ່ໜ້າ, ການຈັດ ຕັ້ງປະຕິບັດວຽກງານບັນຊີ ແລະການເງິນ ທຫລ, ແກ້ໄຂຂໍ້ຄົງຄ້າງວຽກງານບັນຊີ ແລະການເງິນຢູ່ກົມບໍລິການ, ການກວດກາວຽກງານບັນຊີ ແລະ ການເງິນຂອງ ທຫລ, ການປະກອບຄຳເຫັນຂອງບັນດາຫົວໜ່ວຍງົບປະມານ-ບັນຊີ ແລະ ປຶກສາຫາລືການກະກຽມຈັດກອງປະຊຸມວຽກງານບັນ ຊີ ແລະການເງິນຂອງ ທຫລທ ແລະເພື່ອເປັນການກວດກາຄືນກ່ຽວກັບການຈັດຕັ້ງປະຕິບັດວຽກງານຂອງຕົນໃນໄລຍະຜ່ານມາເພື່ອຊອກໃຫ້ເຫັນດ້ານດີ, ດ້ານອ່ອນ ແລະຂໍ້ຄົງຄ້າງທີ່ຈະໄດ້ພ້ອມກັບສືບຕໍ່ແກ້ໄຂໃຫ້ດີຂຶ້ນໃນຕໍ່ໜ້າເພື່ອໃຫ້ບັນລຸຕາມເປົ້າໝາຍ ແລະແຜນການທີ່ວາງໄວ້.

    ຕໍ່ມາ ທ່ານ ນາງ ນະຄອນສີ ມະໂນທັມ ໄດ້ຍົກໃຫ້ເຫັນຫຼາຍຜົນງານພົ້ນເດັ່ນທີ່ຍາດມາໄດ້ໃນໄລະຍະຜ່ານມາເປັນຕົ້ນ: ໄດ້ຄົ້ນຄວ້າສ້າງນິຕິກໍາຫຼາຍສະບັບໃນການນໍາໃຊ້ເຄື່ອນໄຫວວຽກງານເປັນລະບົບຂຶ້ນກວ່າເກົ່າເຊັ່ນ: ສຳເລັດການສ້າງດຳລັດວ່າດ້ວຍການເງິນ ແລະ ບັນຊີ, ຮ່າງຂໍ້ຕົກລົງວ່າດ້ວຍການບັນຊີສຳລັບ ທຫລ, ຮ່າງຂໍ້ຕົກລົງວ່າດ້ວຍງົບປະມານ ທຫລ; ຄົ້ນຄວ້າຜັນຂະຫຍາຍບັນດານິຕິກຳຕ່າງໆກ່ຽວກັບວຽກງານບັນຊີ-ການເງິນ ອອກເປັນລະບຽບ, ບົດແນະນຳ, ຄູ່ມືການນໍາໃຊ້ໃຫ້ບັນດາກົມ-ທຽບ ເທົ່າກົມ ແລະສາຂາຫຼາຍກວ່າ 33 ສະບັບ, ໄດ້ເອົາໃຈໃສ່ຄົ້ນຄວ້າສ້າງແຜນງົບປະມານປະຈໍາປີບົນຫຼັກການປະຢັດ ແລະນໍາໃຊ້ເງິນຢ່າງມີປະສິດທິຜົນເປັນຕົ້ນ: ໄດ້ລິເລີ່ມແຍກແຜນງົບປະມານເປັນກົມ, ກົງຈັກວິຊາການທຽບເທົ່າກົມ ແລະສາຂາ ທຫລ ຕາມພາລະບົດບາດໜ້າທີ່ຂອງແຕ່ລະພາກສ່ວນ, ໄດ້ດໍາເນີນການກວດກາຫຼັງການບັນທຶກບັນຊີຂອງບັນດາຫົວໜ່ວຍບັນຊີທາງລະບົບໂປຣແກຣມ ແລະທາງເອກະສານ.

   ສັງລວມຂໍ້ມູນທາງບັນຊີເພື່ອສ້າງເອກະສານລາຍງານການເງິນຂອງ ທຫລ ເປັນແຕ່ລະເດືອນ, ງວດ ແລະປີພ້ອມທັງສະໜອງແກ່ການກວດກາພາຍໃນ-ພາຍນອກໄດ້ຄົບຖ້ວນ ແລະທັນເວລາພໍສົມຄວນ, ເປັນເຈົ້າແຕ່ງຕັ້ງຄະນະຮັບຜິດຊອບ ແລະນຳພາປະຕິບັດວຽກງານກວດນັບຊັບສິນທາງບັນຊີທຽບກັບຊັບສິນທີ່ມີຈິງກ່ອນການປິດບັນຊີໃນແຕ່ລະປີເພື່ອຮັບປະກັນການສ້າງເອກະສານລາຍງານການເງິນປະຈຳປີຖືກຕ້ອງສອດຄ່ອງກັບຕົວຈິງ ແລະໄດ້ຄົ້ນຄວ້າຜັນຂະຫຍາຍກົດໝາຍວ່າດ້ວຍການບັນຊີ ແລະມາດຕະຖານສາກົນດ້ານການລາຍງານການເງິນມາສ້າງລະບຽບ, ບົດແນະນຳຕ່າງໆ, ສ້າງຜັງບັນຊີໃຫ້ທະນາຄານທຸລະກິດ ແລະ ສະຖາບັນການເງິນຫຼາຍກວ່າ 62 ສະບັບ.

แชร์