ຈອມເພັດ ຫາລືເດີນສຳຫຼວດຫົວໜ່ວຍທຸລະກິດ ພາຍໃນເມືອງ

  ວັນທີ 10 ສິງຫາ 2021 ຢູ່ສູນຝຶກອົບຮົມ ເມືອງຈອມເພັດ ແຂວງຫຼວງພະບາງຫ້ອງການເງິນເມືອງໄດ້ຈັດກອງປະຊຸມຫາລືວຽກງານການເດີນສຳຫຼວດຫົວໜ່ວຍທຸລະກິດຢູ່ພາຍໃນເມືອງໂດຍ ການເປັນປະທານຂອງທ່ານ ສອນເພັດ ພົງສຸທິ ຮອງເຈົ້າເມືອງຈອມເພັດ, ທ່ານ ຄຳມົນ ຈັນມະວົງ ຫົວໜ້າສ່ວຍສາອາກອນແຂວງຫຼວງ ພະບາງ, ທ່ານ ເຢ່ຍເລົ່າ ໄຊຍະວົງ ຫົວໜ້າຫ້ອງການເງິນເມືອງ, ມີຫົວໜ້າ-ຮອງຫົວໜ້າຫ້ອງການກ່ຽວຂ້ອງພ້ອມດ້ວຍວິຊາການ ແລະຄະນະຮັບຜິດຊອບລົງຊຸກ ຍູ້ ແລະເກັບກຳຖານຂໍ້ມູນຂອງ ແຂວງ-ເມືອງເຂົ້າຮ່ວມ.

  ກອງປະຊຸມໄດ້ມີການຜ່ານດຳລັດຂອງລັດຖະບານ ສະບັບເລກທີ 25/ລບ ລົງວັນທີ 16 ມັງກອນ 2017 ວ່າດ້ວຍການຈັດແບ່ງຂະໜາດວິສາຫະກິດຂະໜາດນ້ອຍ ແລະກາງ, ຜ່ານຂໍ້ຕົກລົງຂອງທ່ານຫົວໜ້າພະແນກການເງິນ ແຂວງຫຼວງພະບາງສະບັບເລກທີ 62/ກງຂ ລົງວັນທີ 30 ມິຖຸນາ 2021 ວ່າດ້ວຍການແບ່ງຄວາມຮັບພິຊອບໃຫ້ຄະນະຊີ້ນຳລົງສຳຫຼວດເກັບກຳຂໍ້ມູນຫົວໜ່ວຍທຸລະກິດຢູ່ບັນດາເມືອງ, ນະຄອນ ແລະຂໍ້ຕົກລົງຂອງທ່ານເຈົ້າເມືອງຈອມເພັດສະບັບເລກທີ 197/ ຈມ-ຈພ ລົງວັນທີ 5 ສິງຫາ 2021 ວ່າດ້ວຍການແຕ່ງຕັ້ງຄະນະກຳມະການລົງຊຸກຍູ້ເກັບກຳຖານຂໍ້ມູນນຳຫົວໜ່ວຍທະລະກິດທີ່ມີລາຍຮັບ 50 ລ້ານກີບລົງມາ, ຫົວໜ່ວຍທຸລະກິດ 50-400 ລ້ານກີບ ແລະຫົວໜ່ວຍທຸລະກິດ 400 ລ້ານກີບຂຶ້ນໄປ ແລະລົງກວດກາສິນຄ້າ, ນໍ້າມັນເຊື້ອໄຟ, ອາຍແກັດ ຈາກການນຳເຂົ້າ, ຈຳໜ່າຍ, ເຄື່ອນຍ້າຍຂອງບັນດາບໍລິສັດພາຍໃນເມືອງຈອມເພັດ, ສໍາລັບການລົງສຳຫຼວດຄັ້ງນີ້ມີຄະນະຊີ້ນຳລວມ 9 ທ່ານ, ຍິງ 1 ທ່ານ, ມີຄະນະຮັບພິຊອບລົງຊຸກຍູ້ ແລະເກັບກຳຖານຂໍ້ມູນລາຍຮັບຕົວຈິງ 12 ທ່ານ, ຍິງ 3 ທ່ານ, ໄດ້ແບ່ງອອກເປັນ 2 ຈຸ ໂດຍມີເປົ້າໝາຍໃນການລົງເກັບກຳທັງໝົດ 399 ຫົວໜ່ວຍ, ໃນນັ້ນ, ຫົວໜ່ວຍດ້ານການຄ້າ-ການຜະລິດ 143 ຫົວໜ່ວຍ ແລະຫົວໜ່ວຍດ້ານການບໍລິການ 256 ຫົວໜ່ວຍ.

  ຈາກນັ້ນ, ຄະນະປະທານ ແລະຜູ້ເຂົ້າຮ່ວມກໍ່ໄດ້ແລກປ່ຽນຄວາມຄິດຄຳເຫັນຢ່າງກົງໄປກົງມາເພື່ອຊອກຫາຈຸດດີ ແລະຂໍ້ຄົງຄ້າງໃນການປະຕິບັດໜ້າທີ່ໃນ ໄລຍະຜ່ານມາ ແລະຊອກຊ່ອງທາງໃນການແກ້ໄຂໃຫ້ຖືກຈຸດ ແລະຖືກຕ້ອງ, ພ້ອມດຽວກັນນັ້ນຄະນະປະທານກໍ່ໄດ້ເນັ້ນໃຫ້ບັນດາຄະນະລົງຊຸກຍູ້ ແລະເກັບກຳຖານຂໍ້ມູນໃນຄັ້ງນີ້ເພີ່ມທະວີຄວາມຮັບພິດຊອບຕໍ່ໜ້າທີ່ໆຕົນໄດ້ຮັບມອບໝາຍຢ່າງເຂັ້ມງວດ ແລະມີຜົນສຳເລັດ.

----

ໜັງສືພິມ ເສດຖະກິດ-ສັງຄົມ

แชร์