ກົມພາສີ ທົດລອງໃຫ້ 11 ບໍລິສັດນຳເຂົ້າສິນຄ້າໂດຍບໍ່ຂໍສິດພິເສດ

   ກົມພາສີ, ກະຊວງການເງິນເຫັນດີມອບສິດໃຫ້ດ່ານພາສີສາກົນຊາຍແດນໃນຂອບເຂດທົ່ວປະເທດເປັນຜູ້ພິຈາລະນາການໄດ້ຮັບສິດທິພິເສດດ້ານອັດຕາພາສີຕາມກອບສັນຍາການຄ້າດ້ານສິນຄ້າອາຊຽນ ATIGA ຫລືຟອມ D ຊຶ່ງເປັນເອກະສານປະກອບການແຈ້ງພາສີເປັນລາຍລະອຽດທີ່ໄດ້ກໍານົດໄວ້ໃນມາດຕາ 27 (ປັບປຸງ) ຂອງກົດໝາຍວ່າດ້ວຍພາສີ ສະບັບເລກທີ 81/ສພຊ ລົງວັນທີ 29 ມິຖຸນາ 2020 ຊຶ່ງມີ 11 ບໍລິສັດທີ່ບໍ່ຈໍາເປັນຕ້ອງຂໍໃບຢັ້ງຢືນສິດທິພິເສດດ້ານອັດຕາພາສີຈາກ ກົມພາສີໃນໄລຍະ 6 ເດືອນ ນັບແຕ່ ວັນທີ 30 ກໍລະກົດ 2021 ເປັນຕົ້ນໄປ.

   ອີງຕາມຂໍ້ຕົກລົງວ່າດ້ວຍສືບຕໍ່ການທົດລອງມອບສິດໃຫ້ດ່ານພາສີຊາຍແດນຮັບຮອງການໄດ້ຮັບສິດທິພິເສດດ້ານອັດຕາພາສີຕາມກອບສັນຍາການຄ້າດ້ານສິນຄ້າອາຊຽນ (ATIGA-FORM D) ສໍາລັບການນໍາເຂົ້າສິນຄ້າຂອງ 11 ບໍລິສັດ, ເລກທີ 03682/ກພສ, ລົງວັນທີ 30 ກໍລະກົດ 2021. ນອກຈາກພາຫະນະກົນຈັກ, ນໍ້າມັນເຊື້ອໄຟທຸກຊະນິດ, ເຄື່ອງດື່ມທີ່ມີທາດເຫຼົ້າ ແລະຢາສູບ.

 ຊຶ່ງວ່າການພິຈາລະນາການໄດ້ຮັບສິດທິພິເສດດ້ານອັດຕາພາສີຕາມກອບສັນຍາ ATIGA ຫຼື ຟອມ D ສະບັບນີ້ເປັນການທົດລອງຈັດຕັ້ງປະຕິບັດຊົ່ວຄາວສໍາລັບບໍລິສັດ ແລະຜູ້ປະກອບການທີ່ໄດ້ຮັບອະນຸຍາດເທົ່ານັ້ນ. ຊຶ່ງມີຜົນບັງຄັບໃຊ້ພາຍໃນກໍານົດ 6 ເດືອນ ນັບແຕ່ມື້ລົງລາຍເຊັນເປັນຕົ້ນໄປ.

 ສໍາລັບບໍລິສັດ ແລະຜູ້ປະກອບການ ຈໍານວນ 11 ບໍລິສັດ ໂດຍບໍ່ຈໍາເປັນຕ້ອງຂໍໃບຢັ້ງຢືນສິດທິພິເສດດ້ານອັດຕາພາສີຈາກກົມພາສີເພື່ອເປັນການທົດລອງໃນການກໍານົດເງື່ອນໄຂຂອງຜູ້ປະກອບການທີ່ໄດ້ມາດຕະຖານ AEO ໃນຕໍ່ໜ້າຕາມລາຍຊື່ລຸ່ມນີ້:

  1. 2. ບໍລິສັດ ສຸວັນນີໂຮມເຊັນເຕີ ມະຫາຊົນ;
  2. 2. ບໍລິສັດ ເບຍລາວ ຈໍາກັດ;
  3. 3. ບໍລິສັດ ນິວຈິບເຊັງ ຈໍາກັດ;
  4. 4. ບໍລິສັດ ໂຄຄາ-ໂຄລາວ (ລາວ) ບອ໊ຕຕລິງ ຈໍາກັດ;
  5. 5. ບໍລິສັດ ລາວຟອດຊິຕີ ຈໍາກັດ;
  6. 6. ບໍລິສັດ ເອັກເປຣດຟູ໊ດ ກຣຸບ (ລາວ) ຈໍາກັດ;
  7. 7. ບໍລິສັດ ລາວໂມບາຍກຣຸບ ຈໍາກັດ;
  8. 8. ບໍລິສັດ ຢູນິລິເວີ ເຊີວິດ (ລາວ) ຈໍາກັດ;
  9. 9. ບໍລິສັດ ທິບໂກ້ ອັດສະຟັນ (ລາວ) ຈໍາກັດ;
  10. 10. ບໍລິສັດ ໂຕໂຢຕ້າລາວ ຈໍາກັດ; ແລະ 11. ບໍລິສັດ ຊີໄອການຄ້າ ຂາອອກຂາເຂົ້າ ຈໍາກັດ.

แชร์