ໂລກ້າ-ບໍລິສັດສະຕາດອັບລາວທຳອິດທີ່ຖືກຈັດເຂົ້າໃນລາຍຊື່ 100 ບໍລິສັດທີ່ໜ້າຈັບຕາຂອງ ຟອບ ເອເຊຍ.
ເມື່ອວັນທີ 10 ສິງຫາ 2021, ວາລະສານ ຟອບ ເອເຊຍ Forbes Asia ມີການປະກາດລາຍຊື່ຂອງ 100 ບໍລິສັດທີ່ໜ້າຈັບຕາໃນຂົງເຂດພາກພື້ນອາຊີປາຊີຟິກ ໃນນັ້ນລວມມີບໍລິສັດໂລກ້າຊຶ່ງເປັນບໍລິສັດສະຕາດອັບຈາກປະເທດລາວທີ່ບໍລິຫານໂດຍ ທ່ານ ສຸລິໂຍ ວົງດາລາ ຈາກການຄັດເລືອກ ແລະພິຈາລະນາຈາກຈໍານວນ 900 ກວ່າບໍລິສັດຂົງເຂດພາກພື້ນອາຊີປາຊີຟິກ. ສຳລັບລາຍລະອຽດ ແລະຂໍ້ມູນເພີ່ມເຕີມສາມາດເບິ່ງຕື່ມໄດ້ທີ່
www.forbes.com/100towatch ນອກຈາກນີ້ຍັງສາມາດຕິດຕາມໄດ້ໃນວາລາລະສານ ຟອບ ເອເຊຍ Forbes Asia ທີ່ຈະຕີພິມໃນເດືອນສິງຫານີ້.
ການປະກາດລາຍຊື່ຄັ້ງນີ້ໄດ້ຄັດເອົາລາຍຊື່ຂອງສະຕາດອັບ ແລະທຸລະກິດຂະໜາດນ້ອຍທີ່ໄດ້ມີການເຕີບໂຕຢູ່ໃນຂົງເຂດພາກພື້ນອາຊີປາຊີຟິກ ແລະເຖິງວ່າຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ບັນດາບໍລິສັດທີ່ຢູ່ໃນລາຍຊື່ນີ້ກໍຍັງມີການຂະຫຍາຍຕົວຢ່າງຕໍ່ເນື່ອງ.
ບໍລິສັດໂລກ້າໄດ້ສ້າງຕັ້ງຂຶ້ນໃນປີ 2018 ຊຶ່ງເປັນແພລັດຟອມທຳອິດທີ່ໃຫ້ບໍລິການເອີ້ນລົດແທັກຊີອອນລາຍຂອງປະເທດລາວ, ໃນປະຈຸບັນກໍຍັງໄດ້ເພີ່ມບໍລິການຕ່າງໆເຂົ້າໃນແພລັດຟອມຂອງໂລກ້າເຊັ່ນ: ບໍລິການປ້າຍໂຄສະນາເຄື່ອນທີ່, ບໍລິການແທັກຊີທີ່ມີລົດຫຼາກຫຼາຍປະເພດໃຫ້ເລືອກໃຊ້ບໍລິການ ແລະບໍລິການສັ່ງຊື້ສິນຄ້າອອນລາຍ. ກ່ອນການແຜ່ລະບາດຂອງພະຍາດໂຄວິດ-19 ລູກຄ້າສ່ວນໃຫຍ່ຂອງໂລກ້າແມ່ນນັກທ່ອງທ່ຽວ, ແຕ່ໃນໄລຍະທີ່ມີການແຜ່ລະບາດພະຍາດໂລກ້າໄດ້ສົ່ງເສີມໃຫ້ບໍລິການພາຍໃນສາມາດດຳເນີນທຸລະກິດຕໍ່ໄປໄດ້ຊຶ່ງເຮັດໃຫ້ອັດຕາການໃຊ້ບໍລິການພາຍໃນປະເທດຂອງໂລກ້າເພີ່ມຂຶ້ນເຖິງ 30% ຕໍ່ເດືອນ.
ໂລກ້າເປັນບໍລິການທີ່ມີຄວາມປອດໄພ, ໂປ່ງໃສ ແລະໃຫ້ບໍລິການຕະຫຼອດ 24 ຊົ່ວໂມງ ມີປະກັນໄພຄຸ້ມຄອງໃນຖ້ຽວສູງສຸດເຖິງ 500 ລ້ານກີບ ປະຈຸບັນໂລກ້າໄດ້ມີການຂະຫຍາຍບໍລິການໄປທີ່ ນະຄອນປາກເຊ, ແຂວງຈຳປາສັກ ເປັນແຂວງທີ 3 ຕໍ່ຈາກ ນະຄອນຫຼວງວຽງຈັນ ແລະ ຫຼວງພະບາງ.
