ຈີນລົງທຶນເປັນອັນດັບໜຶ່ງເຖິງ 16 ຕື້ໂດລາ ໃນລາວ

    ສປ ຈີນ ເປັນປະເທດທີ່ມາລົງທຶນໃນລາວຫຼາຍກວ່າໝູ່ເປັນອັນດັບໜຶ່ງ, ນັບແຕ່ປີ 1989 ເຖິງປະຈຸບັນການລົງທຶນສະສົມມີເຖິງ 813 ໂຄງການ, ໂດຍມີມູນຄ່າລົງທຶນທັງໝົດປະມານ 16 ຕື້ໂດລາ, ໃນນັ້ນນັກລົງທຶນພາຍໃນຂອງລາວໄດ້ປະກອບສ່ວນຮ່ວມທຶນລວມເປັນມູນຄ່າ 2,9 ຕື້ໂດລາ ຂະນະທີ່ປີ 2020, ທ່າມກາງການແຜ່ລະບາດຂອງພະຍາດໂຄວິດ-19 ການລົງທຶນຈາກ ສປ ຈີນ ຍັງສືບຕໍ່ມີບັນຍາກາດທີ່ດີມີການອະນຸມັດໂຄງການລົງທຶນຈາກຈີນຈຳນວນ 21 ໂຄງການມູນຄ່າການລົງທຶນ 2,5 ຕື້ໂດລາ, ໃນນັ້ນສ່ວນໃຫຍ່ແມ່ນການລົງທຶນໃນຂະແໜງບໍ່ແຮ່, ບໍລິການ, ພະລັງງານໄຟຟ້າ, ກະສິກຳ ແລະ ຂະແໜງການອື່ນໆ.

     ເມື່ອວັນທີ 13 ສິງຫາຜ່ານມາທີ່ນະຄອນຫຼວງວຽງຈັນໄດ້ມີກອງປະຊຸມພົບປະແລກປ່ຽນລະຫວ່າງພາກລັດຖະບານລາວ ແລະນັກທຸລະກິດຈີນຄັ້ງທີ 5 ໄດ້ຈັດຂຶ້ນໂດຍການເປັນປະທານຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລັດຖະມົນຕີກະຊວງແຜນການ ແລະການລົງທຶນ ແລະ ທ່ານ ຈ່ຽງ ຈ້າຍຕົ່ງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ; ມີຜູ້ຕາງໜ້າຈາກບັນດາກະຊວງ, ອົງການ ແລະພາກສ່ວນກ່ຽວຂ້ອງເຂົ້າຮ່ວມ.

   ທ່ານ ສອນໄຊ ສີພັນດອນ ກ່າວວ່າ: ກອງປະຊຸມຄັ້ງນີ້, ເປັນເວທີພົບປະແລກປ່ຽນຄຳຄິດເຫັນໂດຍສະເພາະລັດຖະບານລາວຈະໄດ້ຮັບຟັງການສະເໜີຄໍາຄິດເຫັນ, ບັນຫາຂໍ້ຫຍຸ້ງຍາກຈາກຝ່າຍທຸລະກິດຂອງຈີນຢ່າງກົງໄປກົງມາ ແລະເປັນເວທີໃຫ້ພາກລັດຖະບານລາວໄດ້ແຈ້ງຕໍ່ບັນຫາທີ່ຝ່າຍຈີນສະເໜີມາໃຫ້ມີຄວາມກະຈ່າງແຈ້ງ ແລະມີຄວາມເຂົ້າໃຈກັນເພື່ອພ້ອມກັນຊອກວິທີທາງແກ້ໄຂ ແລະພ້ອມກັນພັດທະນາ.

   ພວກເຮົາຮູ້ດີວ່າ ສປ ຈີນ ເປັນປະເທດທີ່ມາລົງທຶນໃນລາວຫຼາຍກວ່າໝູ່ເປັນອັນດັບໜຶ່ງ, ນັບແຕ່ປີ 1989 ເຖິງປະຈຸບັນການລົງທຶນສະສົມມີເຖິງ 813 ໂຄງການ, ໂດຍມີມູນຄ່າລົງທຶນທັງໝົດປະມານ 16 ຕື້ໂດລາ, ໃນນັ້ນນັກລົງທຶນພາຍໃນຂອງລາວໄດ້ປະກອບສ່ວນຮ່ວມທຶນລວມເປັນມູນຄ່າ 2,9 ຕື້ໂດລາ, ຂົງເຂດການລົງທຶນກໍກວ້າງຂວາງ ແລະຫຼາກຫຼາຍ, ຂະໜາດຂອງຜູ້ລົງທຶນກໍມີທັງຂະໜາດນ້ອຍ, ຂະໜາດກາງ ແລະຂະໜາດໃຫຍ່ແຕກຕ່າງກັນ, ມີທັງມາຈາກລັດວິສາຫະກິດ ແລະມີທັງພາກເອກະຊົນ. 

   ກອງປະຊຸມໄດ້ຮັບຟັງການສະເໜີສະພາບການລົງທຶນຂອງ ສປປ ລາວ ແລະສະພາບການລົງທຶນຂອງນັກລົງທຶນຈີນໃນ ສປປ ລາວ ໂດຍທ່ານ ນາງ ຄຳຈັນ ວົງແສນບູນ ຮອງລັດຖະມົນຕີກະຊວງແຜນການ ແລະການລົງທຶນຊຶ່ງສະເພາະ ປີ 2020, ທ່າມກາງການແຜ່ລະບາດຂອງພະຍາດໂຄວິດ-19 ການລົງທຶນຈາກ ສປ ຈີນ ຍັງສືບຕໍ່ມີບັນຍາກາດທີ່ດີມີການອະນຸມັດໂຄງການລົງທຶນຈາກຈີນຈຳນວນ 21 ໂຄງການ ແລະມີມູນຄ່າການລົງທຶນ 2,5 ຕື້ໂດລາ.

   ໃນນັ້ນສ່ວນໃຫຍ່ແມ່ນການລົງທຶນໃນຂະແໜງບໍ່ແຮ່, ບໍລິການ, ພະລັງງານໄຟຟ້າ, ກະສິກຳ ແລະຂະແໜງການອື່ນໆ ກໍຍັງມີການລົງທຶນໃນການສ້າງພື້ນຖານໂຄງລ່າງ, ການລົງທຶນໃນກິດຈະການທົ່ວໄປເຊັ່ນຮ້ານຄ້າ, ຮ້ານອາຫານ ແລະ ທຸລະກິດຄ້າຂາຍທົ່ວໄປຈຳນວນຫຼາຍ. ນອກນັ້ນ ສປ ຈີນ ໄດ້ມີບົດບາດສຳຄັນໃນການລົງທຶນຢູ່ໃນບັນດາເຂດເສດຖະກິດພິເສດຊຶ່ງໄດ້ຮັບການອະນຸມັດຈຳນວນ 89 ຫົວໜ່ວຍ ແລະມີມູນຄ່າອະນຸມັດທັງໝົດຫຼາຍກວ່າ 215 ລ້ານໂດລາ.

   ຈາກນັ້ນ, ກອງປະຊຸມກໍໄດ້ຮັບຟັງການສະເໜີສະພາບເຄື່ອນໄຫວວຽກງານ ແລະຂໍ້ຫຍຸ້ງຍາກທີ່ພົບຢູ່ໃນວຽກງານການລົງທຶນໂດຍລວມຂອງນັກທຸລະກິດຈີນໂດຍຜູ້ຕາງໜ້າສະພາການຄ້າຈີນ ແລະສະພາການຄ້າປະຈໍາທ້ອງຖິ່ນ; ຮັບຟັງຜູ້ຕາງໜ້າວິສາຫະກິດຈີນຈາກ 9 ຂະແໜງການຂຶ້ນລາຍງານ ແລະແລກປ່ຽນຄໍາຄິດເຫັນນໍາຂະແໜງການຂອງຝ່າຍລາວຊຶ່ງປະກອບມີຄື: ຂະແໜງພື້ນຖານໂຄງລ່າງດ້ານຄົມມະນາຄົມ, ຂະແໜງການເງິນ, ຂະແໜງການພັດທະນາເຂດເສດຖະກິດພິເສດ, ຂະແໜງໄຟຟ້າ, ຂະແໜງຮັບເໝົາການກໍ່ສ້າງ ແລະຮ່ວມມືດ້ານແຮງງານ, ຂະແໜງພັດທະນາບໍ່ແຮ່, ຂະແໜງຮ່ວມມືດ້ານກະສິກຳ, ຂະແໜງປຸງແຕ່ງ ແລະການຜະລິດ ແລະຂະແໜງການພັດທະນາອະສັງຫາລິມະຊັບ.

แชร์