ສະຫວັນຈັດຄາລາວານລົດທ່ອງທ່ຽວ-ການກຸສົນ

 ໃນລະຫວ່າງວັນທີ 2-3 ມີນາ 2019 ແຂວງສະຫວັນນະເຂດ ໂດຍສະເພາະພະແນກຖະແຫຼງຂ່າວ-ວັດທະນະທຳ ແລະທ່ອງທ່ຽວແຂວງຮ່ວມກັບກຸ່ມທຸລະກິດທ່ອງທ່ຽວພາຍໃນແຂວງ, ສະໂມສອນອ໊ອຟໂຣດ ແລະຫ້ອງການຖະແຫຼງຂ່າວ-ວັດທະນະທຳເມືອງພີນໄດ້ຈັດກິດຈະກຳຄາລາວານລົດທ່ອງທ່ຽວເພື່ອການກຸສົນ ໃນໂອກາດລະນຶກວັນສ້າງຕັ້ງ ກອງທັບປະຊາຊົນລາວ ຄົບຮອບ 70 ປີ ທີ່ໄດ້ຜ່ານໄປຫວ່າງມໍ່ໆນີ້, ໂດຍໄດ້ມີກິດຈະກຳທ່ຽວຊົມແຫຼ່ງທ່ອງທ່ຽວທາງທຳມະຊາດ ແລະແຫຼ່ງທ່ອງທ່ຽວທາງປະຫວັດສາດຕາມສາຍທາງຍຸດທະສາດໝາຍເລກ 9 ແລະອັນສຳຄັນໃນງານຄັ້ງນີ້ກໍ່ຍັງໄດ້ນຳເອົາອຸປະກອນການສຶກສາ, ກີລາ, ເຄື່ອ ງນຸ່ງຫົ່ມມອບໃຫ້ກັບນ້ອງນັກຮຽນ, ພໍ່ແມ່ປະຊາຊົນທີ່ດ້ອຍໂອກາດໃນເຂດຫ່າງໄກສອກຫຼີກນຳອີກ.

 ຄາລາວານລົດທ່ອງທ່ຽວຄັ້ງນີ້ໂດຍການນຳໜ້າພາທາງຂອງ ທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ, ມີທ່ານ ສີຫາ ພັນນະວົງ ຮອງຫົວໜ້າພະແນກ ຖວທ ແຂວງ, ທ່ານ ພັທ ວິລະວົງ ມະນີແສງ ຮອງຫົວໜ້າກອງ ບັນຊາການທະຫານແຂວງ, ມີບັນດາ ພະແນກການອ້ອມຂ້າງແຂວງ, ນັກທຸລະ ກິດພາຍໃນແຂວງ ພ້ອມດ້ວຍນັກທ່ອງ ທ່ຽວພາຍໃນແຂວງຮ່ວມເດີນທາງໃນ ຄັ້ງນີ້ ຈຳນວນ 160 ຄົນ ແລະມີລົດຮ່ວມ ໃນຄາລາວານ ຈຳນວນ 60 ຄັນ.

  ຊຶ່ງໃນຕອນເຊົ້າຂອງວັນທີ 2 ມີນາ ເວລາ 7 ໂມງເຊົ້າ, ບັນດານັກທ່ອງທ່ຽວກໍ່ໄດ້ມາເຕົ້າໂຮມກັນຢູ່ທີ່ເດີ່ນສູນການຄ້າສະຫວັນ-ໄອເຕັກໃນເວລາຕໍ່ມາລົດທັງ ໝົດກໍ່ໄດ້ເຄື່ອນອອກຈາກບໍລິເວນດັ່ງກ່າວແລ່ນຕາມສາຍທາງເລກ 9 ຊຶ່ງເປັນເສັ້ນທາງຍຸດທະສາດຜ່ານເຊໂນ ເມືອງອຸທຸມພອນ,ຜ່ານດົງເຫັນເມືອງອາດສະ ພັງທອງ ຮອດເມືອງພະລານໄຊ ກໍ່ໄດ້ແວ່ ຢ້ຽມຊົມແຫ່ງທ່ອງທ່ຽວແກ້ງຫຼວງເຊຊັງຊອຍເບິ່ງຮອຍຕີນໄດໂນເສົາ ຊ່ຶງ ເປັນສັດໂລກຮ້ອຍລ້ານປີ, ໃນນີ້ນັກທ່ອງ ທ່ຽວສ່ວນຫຼວງຫຼາຍກໍ່ໄດ້ໃຫ້ຄວາມ ສົນໃຈໃນແຫຼ່ງທ່ອງທ່ຽວແຫ່ງນີ້. ຕໍ່ ຈາກນັ້ນ ອອກຈາກເມືອງພະລານໄຊ ກໍ່ ໄດ້ແວ່ຮັບປະທານອາຫານທ່ຽງທີ່ເມືອງພີນ ແລະກໍ່ໄດ້ເຂົ້າຢ້ຽມຊົມພ້ອມວາງກະຕ່າດອກໄມ້ຢູ່ທີ່ອານຸສາວະລີນັກຮົບນິລະນາມ ລາວ-ຫວຽດນາມເມືອງພີນ.ຕໍ່ຈາກນັ້ນບັນດາລົດຄາລາວານກໍ່ໄດ້ເດີນທາງເຂົ້າສູ່ປ່າສະຫງວນດົງພູວຽງໂດຍນຳໃຊ້ເສັ້ນທາງໝາຍເລກ 23 ຊຶ່ງເປັນເສັ້ນທາງຍຸດທະສາດອີກເສັ້ນໜຶ່ງທີ່ມີທຳມະຊາດທີ່ອຸດົມສົມບູນ, ພໍໄປຮອດກິໂລ ແມັດທີ 30 ກໍ່ໄດ້ແວ່ທ່ຽວຊົມ ທຳມະຊາດແກ້ງສາມມັດແຕກ ຊຶ່ງເປັນ ອີກແຫຼ່ງທ່ອງທ່ຽວທຳມະຊາດອີກແຫ່ງ ໜຶ່ງຂອງເມືອງພີນທີ່ມີຕຳນານ ແລະມີທິວ ທັດທີ່ສວຍງາມ, ເປັນແກ້ງຫີນທີ່ມະ ຫັດສະຈັນ ແລະມີນ້ຳໄຫຼຕະຫຼອດປີເໝາະ ແກ່ພັກຜ່ອນແບບຄອບຄົວ-ໝູ່ຄະນະ. ຫ່າງຈາກນັ້ນ 5 ກິໂລແມັດກໍ່ໄດ້ເຖິງຈຸດໝາຍທີ່ພັກແຮມກໍ່ຄືຂົວຕາດໄຮຊຶ່ງຂົວແຫ່ງນີ້ເປັນຂົວເບຕົງເສີມເຫຼັກແຫ່ງທຳອິດທີ່ປະທານ ສຸພານຸວົງ ຜູ້ນຳຮຸ່ນທຳອິດຂອງລາວເປັນຜູ້ຄິດໄລ່, ອອກແບບ ແລະກໍ່ສ້າງ ແລະຕໍ່ມາໄດ້ຖືກຝີມືຈັກກະ ພັດອາເມລິກາໃຊ້ຍົນຖິ້ມລະເບີດໃສ່ໃນ ປາງສົງຄາມ ເຮັດໃຫ້ຂົວແຫ່ງດັ່ງກ່າວ ເປ້ເພເສຍຫາຍ. ປະຈຸບັນ ລັດຖະບານກຳລັງລົງມືກໍ່ສ້າງຂົວແຫ່ງໃໝ່ຂຶ້ນຢູ່ໃກ້ກັບຂົວເກົ່າແຕ່ບໍ່ທັນສຳເລັດ.

   ພໍໄປເຖິງຈຸດທີ່ໝາຍບັນດາລົດນັກທ່ອງທ່ຽວກໍ່ໄດ້ລົງໄປຈອດຢູ່ແຄມນ້ຳເຊບັ້ງຫຽງ, ພັກຜ່ອນ-ຢ່ອນກາຍຕາມ ໂງ່ນຫີນ ແລະຫາທີ່ກາງເຕັນໃນການພັກ-ນອນຢູ່ທີ່ນັ້ນ, ບາງຄົນກໍ່ໄດ້ລົງອາບນໍ້າເຊ ທີ່ໃສເຢັນໄຫຼພັດຜ່ານຫີນເປັນຈຸ້ມ-ເປັນໂງ່ນ, ປະຊາຊົນບ້ານຕາດໄຮພ້ອມດ້ວຍພະນັກງານພວກເຮົາຈຳນວນໜຶ່ງ ກໍ່ພາກັນກໍ່ກອງໄຟເພື່ອໜຶ້ງເຂົ້າ, ແຕ່ງກິນໄວ້ຕ້ອນຮັບນັກທ່ອງທ່ຽວທີ່ມາຢ້ຽມຢາມ. ຊຶ່ງເມນູມື້ນັ້ນກໍ່ເປັນອາຫານພື້ນບ້ານຄື: ໝູນ້ອຍ (ມີທັງຕົ້ມ ແລະປີ້ງ) ອີກເມນູໜຶ່ງທາງບ້ານກໍ່ໄດ້ນຳເອົາປາຈາກວັງສະຫງວນຂອງບ້ານເປັນປາ ໃຫຍ່ໂຕໜຶ່ງປະມານ 30 ກິໂລ, ມາຕ້ອນຮັບເປັນອາຫານທີ່ແຊບຊ້ອຍສຳລັບ ຄາບແລງມື້ນັ້ນ ແລະຈາກນັ້ນກໍ່ໄດ້ຈັບກຸ່ມມ່ວນຊື່ນຕາມອັດທະຍາໃສ.

  ຕອນເຊົ້າຂອງວັນຕໍ່ມາພາຍຫຼັງເກັບມ້ຽນອຸປະກອນຕ່າງໆເປັນທີ່ຮຽບຮ້ອຍແລ້ວ. ກໍ່ໄດ້ຮ່ວມກັນຮັບປະທານອາຫານເຊົ້າ. ຈາກນັ້ນບັນດານັກທ່ອງທ່ຽວກໍ່ໄດ້ນຳເອົາເຄື່ອງເປັນຕົ້ນ: ອຸປະກອນການສຶກສາ,ອຸປະກອນກີລາ,ເຄື່ອງນຸ່ງຫົ່ມ ແລະເຄື່ອງໃຊ້ໃນຄອບຄົວເຮືອນໄປມອບໃຫ້ແກ່ນ້ອງນັກຮຽນ ແລະພໍ່ແມ່ປະຊາ ຊົນຊຶ່ງປະກອບມີ: ໂຮງຮຽນປະຖົມຕາດໄຮໂຄກ, ປະຖົມຕາດໄຮເຊ, ປະຖົມບ້ານຍາງ, ປະຖົມວົງສີແກ້ວ, ປະຖົມຕັງອາໄລ, ປະຖົມແກ້ວກວະ, ປະຖົມບ້ານບົກ, ປະຖົມນາຫຼັງຄຳ ແລະກອງບັນຊາການ ປກສ ເມືອງພີນ, ນອກນັ້ນຍັງໄດ້ຖວາຍເຄື່ອງໃຫ້ວັດນຳອີກ.

ຂ່າວ: ນສພ ເສດຖະກິດ-ສັງຄົມ

แชร์