ເພື່ອຄວາມປອດໄຟປະຊາຊົນ ກຽມສ້າງສູນວັດແທກເຕືອນໄຟພິບັດເຂື່ອນໃນລາວ

   ລັດຖະບານກຳລັງກະກຽມເພື່ອສ້າງສູນວັດແທກເຕືອນໄພຂອງເຂື່ອນໄຟຟ້າໃນລາວຊຶ່ງເວລານີ້ພວມຮ່ວມມືກັບພາກເອກະຊົນໃນການດຳເນີນສຶກສາຄວາມເປັນໄດ້ຂອງໂຄງການທັງນີ້ກໍເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມໃນການແກ້ໄຂປາກົດການຫຍໍ້ທໍ້ແລະປົກປ້ອງປະຊາຊົນລາວໃຫ້ຮັບປະກັນຄຸນນະພາບ ແລະຖືກຕ້ອງຕາມ ມາດຕະຖານແຫ່ງຊາດ ແລະມາດຕະຖານສາກົນໂດຍປະຈຸບັນທົ່ວປະເທດມີແຫຼ່ງຜະລິດໄຟຟ້າແລ້ວ  61 ແຫ່ງ.

   ຕາມຂໍ້ມູນຈາກ ກວຕ ປີດເຜີຍໃຫ້ຮູ້ວ່າ:ວັນທີ 18 ທັນວາຜ່ານມາທີ່ນະຄອນຫຼວງວຽງຈັນໄດ້ມີພິທີເຊັນບົດບົດບັນທຶກຄວາມເຂົ້າໃຈ (MOU) ກ່ຽວກັບການສຶກສາຄວາມເປັນໄປໄດ້ໃນການສ້າງສູນວັດແທກເຕືອນໄພພິບັດຂອງເຂື່ອນໄຟຟ້າຢູ່ ສປປ ລາວຕາງໜ້າລົງນາມໃນບົດບັນທຶກຂອງທ່ານວຽງທອງວົງທະວິໄລຫົວໜ້າກົມມາດຕະຖານແລະວັດແທກ,ກະຊວງວິທະຍາສາດແລະເຕັກໂນໂລຊີ (ກວຕ) ທ່ານ ກະດິງທອງສິງດາລາຫົວໜ້າສູນວັດແທກແລະທ່ານອາລີວັນສີທາລາປະທານບໍລິສັດອິນເຕີເນເຊິນນໍ ອິນເຕີເກລດຊິດສ໌ເຕັມລາວຈໍາກັດໂດຍເຂົ້າຮ່ວມເປັນສັກຂີພິຍານຂອງທ່ານບັນດິດ ສຈ. ບໍ່ວຽງຄໍາວົງດາລາລັດຖະມົນຕີ ກວຕ ພ້ອມນີ້ກໍມີບັນດາທ່ານຮອງລັດຖະມົນຕີ ກວຕ, ຫົວໜ້າຫ້ອງການ,ກົມ,ສະຖາບັນ,ພະນັກງານວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.

    ທ່ານ ວຽງທອງວົງທະວິໄລ ຫົວໜ້າ ກົມມາດຕະຖານ ແລະວັດແທກໃຫ້ຮູ້ ວ່າ: ໃນການຈັດພິທີເຊັນບົດບັນທຶກ ຄວາມເຂົ້າໃຈ (MOU)ໃນຄັ້ງນີ້ເພື່ອ ຕອບສະໜອງຄວາມຮຽກຮ້ອງຕ້ອງການຂອງສັງຄົມໃນການແກ້ໄຂປາກົດການຫຍໍ້ທໍ້ແລະປົກປ້ອງປະຊາຊົນຢູ່ໃນ ສປປ ລາວ ໃຫ້ຮັບປະກັນຄຸນນະພາບແລະຖືກຕ້ອງຕາມມາດຕະຖານແຫ່ງຊາດແລະມາດຕະຖານສາກົນ,ການຈັດຕັ້ງປະຕິບັດວຽກງານດັ່ງກ່າວນີ້ເປັນການປະກອບສ່ວນຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກແລະແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII (2016-2020) ຂອງ ສປປ ລາວ ໃຫ້ປາກົດຜົນເປັນຈິງ.

   ດັ່ງນັ້ນ,ກົມມາດຕະຖານແລະວັດແທກຈິ່ງໄດ້ປະສານສົມທົບກັບບັນດາພາກສ່ວນທີ່ກ່ຽວຂ້ອງກະກຽມເງື່ອນໄຂຄື:ດ້ານນິຕິກຳແມ່ນໃຫ້ມີການສ້າງສູນວັດແທກເຕືອນໄພພິບັດຂອງເຂື່ອນໄຟຟ້າຢູ່ ສປປ ລາວ;ການພັດທະນາຊັບພະຍາກອນມະນຸດແລະສ້າງວິຊາການໄດ້ມີການຈັດຝຶກອົບຮົມກ່ຽວກັບວຽກງານດັ່ງກ່າວແລະເຜີຍແຜ່ໃຫ້ພາກລັດແລະເອກະຊົນຮັບຊາບ;ມີການຈັດຫາວິຊາການ,ອຸປະກອນແລະຄູ່ມືຢ່າງມີປະສິດທິພາບໃນການຮັບຮອງວຽກງານດັ່ງກ່າວ.

   ປະຈຸບັນ ສປປ ລາວມີແຫຼ່ງຜະລິດພະລັງງານໄຟຟ້າແລ້ວທັງໝົດ 61 ແຫ່ງ ລວມກຳລັງການຕິດຕັ້ງ 7,20 ພັນ ເມກາວັດໃນນີ້ເປັນເຂື່ອນຂະໜາດກາງຫາໃຫຍ່ 32 ແຫ່ງ,ຂະໜາດນ້ອຍ 15 ເມກາວັດລົງມາ 21 ແຫ່ງເຫຼືອຈາກ ນັ້ນແມ່ນແຫຼ່ງຜະລິດໄຟຈາກພະລັງງານ ທົດແທນ ແລະແສງຕາເວັນ ນອກຈາກນັ້ນຍັງມີໂຄງການທີ່ພວມດຳເນີນກໍ່ສ້າງແລະຈະສຳເລັດໃນປີ 2019- 2020 ມີ 36 ໂຄງການລວມກຳລັງການຕິດຕັ້ງ 4,18 ພັນເມກາວັດ.

แชร์