ທຫລ ແກ້ດ່ວນການແລກປ່ຽນເງິນຕາເຂົ້າສູ່ລະບົບທະນາຄານ

ຂ່າວ: ຣັດສະໝີ ດວງສັດຈະ

   ພາຍຫຼັງທີ່ທ່ານຜູ້ວ່າການທະນາ ຄານແຫ່ງ ສປປ ລາວ (ທຫລ) ໄດ້ຊີ້ແຈງກ່ຽວກັບອັດຕາແລກປ່ຽນ, ການຄຸ້ມຄອງເງິນຕາຕ່າງປະເທດ ແລະການສົ່ງເສີມການເຂົ້າເຖິງແຫຼ່ງທຶນເພື່ອປະກອບສ່ວນແກ້ໄຂບັນຫາຂໍ້ຫຍຸ້ງຍາກທາງດ້ານເສດຖະກິດ-ການເງິນ ໃນວາລະແຫ່ງຊາດຕໍ່ກອງປະຊຸມສະໄໝວິສາມັນຄັ້ງທີ 1 ສະພາແຫ່ງຊາດ ຊຸດທີ IX (ວັນທີ 6 ສິງຫາ 2021) ໂດຍອັດຕາແລກປ່ຽນເປັນສິ່ງທ້າທາຍໜຶ່ງຕໍ່ເສດຖະກິດໂດຍສະເພາະໄລຍະເດືອນມິຖຸນາ ແລະເດືອນກໍລະກົດຜ່ານມາເງິນກີບໄດ້ອ່ອນຄ່າລົງຫຼາຍທຽບກັບເງິນໂດລາ ແລະເງິນບາດ ແລະມີຄວາມຫຼຸດໂຕນກັນຫຼາຍລະຫວ່າງອັດຕາແລກປ່ຽນຂອງທະນາຄານ ແລະອັດຕາຕະຫຼາດນອກລະບົບໂດຍສະເພາະອັດຕາເງິນກີບທຽບໂດລາຊຶ່ງກວ້າງອອກສູງສຸດເຖິງ 22,1% ໃນກາງເດືອນກໍລະກົດ, ຈາກນັ້ນຄ່ອຍໆ ແຄບລົງມາຢູ່ໃນລະດັບ 15,6% ໃນໄລ ຍະທ້າຍເດືອນກໍລະກົດ, ສະເລ່ຍ 7 ເດືອນ ຕົ້ນປີ 2021, ສ່ວນຕ່າງອັດຕາແລກປ່ຽນຂອງທະນາຄານ ແລະຂອງຕະຫຼາດນອກລະບົບຢູ່ໃນລະດັບ 9,98% ສໍາລັບອັດຕາກີບທຽບໂດລາແລະ 0,52% ສໍາລັບອັດຕາກີບທຽບບາດ.

    ສາເຫດຕົ້ນຕໍທີ່ພາໃຫ້ເກີດສະພາບດັ່ງກ່າວຍ້ອນການແຂງຄ່າຂອງເງິນໂດລາທຽບກັບເງິນສະກຸນຫຼັກອື່ນ ແລະການແຂງຄ່າແຮງຂອງເງິນບາດທຽບເງິນໂດລາໃນຕະຫຼາດສາກົນໂດຍລວມເຖິງວ່າໃນໄລຍະທ້າຍເດືອນກໍລະກົດ-ຕົ້ນເດືອນສິງຫາຄ່າເງິນບາດໃນສາກົນໄດ້ອ່ອນຄ່າລົງກໍ່ຕາມ; ຄວາມຕ້ອງການເງິນຕາຕ່າງປະເທດຢູ່ພາຍໃນມີຫຼາຍກວ່າຄວາມສາມາດໃນການສະໜອງເງິນຕາ, ສະພາບການຂາດດູນດ້ານການຄ້າ-ການບໍລິການ, ພາລະໃນການຊໍາລະດອກເບ້ຍເງິນກູ້ຢືມກັບຕ່າງປະເທດທີ່ຍັງມີຫຼາຍ ແລະຕໍ່ເນື່ອງຍາວນານ, ຂະນະທີ່ລາຍຮັບຂອງປະເທດຫຼຸດລົງຫຼາຍຍ້ອນຜົນກະທົບຈາກພະຍາດໂຄວິດ-19; ຄວາມຈໍາເປັນໃນການສະໜອງເງິນຕາຕ່າງປະເທດໃຫ້ແກ່ການນໍາເຂົ້າສິນຄ້າບູລິມະສິດຍັງຢູ່ໃນລະດັບສູງແຕ່ສະພາບຄ່ອງດ້ານເງິນຕາຕ່າງປະເທດໃນທົ່ວລະບົບເສດຖະກິດພັດຝືດເຄືອງ, ຄວາມສາ ມາດໃນການດັດສົມຕະຫຼາດເງິນຕາຕ່າງ ປະເທດຂອງຂະແໜງທະນາຄານກໍ່ຫຼຸດ ລົງຫຼາຍບໍ່ພຽງພໍກັບຄວາມຕ້ອງການ ຂອງສັງຄົມທີ່ຍັງມີສູງ; ການຄຸ້ມຄອງເງິນຕາຕ່າງປະເທດຂອງທຸກພາກສ່ວນຍັງບໍ່ທັນກົມກຽວ ແລະຮັດກຸມເທົ່າທີ່ ຄວນເຮັດໃຫ້ຍັງມີການເຄື່ອນໄຫວທຸ ລະກໍາທີ່ຕິດພັນກັບເງິນຕາຕ່າງປະເທດທີ່ບໍ່ສອດຄ່ອງກັບລະບຽບກົດໝາຍຈໍານວນບໍ່ໜ້ອຍ, ໃນນີ້ສະພາບທີ່ຄວາມຕ້ອງການເງິນຕາຕ່າງປະເທດຂອງສັງຄົມມີຫຼາຍກວ່າຄວາມສາມາດໃນການສະໜອງຂອງລະບົບໄດ້ມີຮ້ານແລກປ່ຽນເງິນຕາຈໍານວນໜຶ່ງບໍ່ປະຕິບັດຕາມລະບຽບການ, ມີການກໍານົດອັດຕາແລກປ່ຽນທີ່ບໍ່ສອດຄ່ອງກັບຂອບອັດຕາແລກປ່ຽນທີ່ທາງການກໍານົດໃຫ້. 

   ຕໍ່ສະພາບການດັ່ງກ່າວ; ໃນຕອນບ່າຍວັນທີ 12 ສິງຫາ 2021, ທຫລ ໄດ້ຈັດຕັ້ງກອງປະຊຸມສະເພາະເຜີຍແຜ່ການປະຕິບັດມາດຕະການໃນການຄຸ້ມຄອງເງິນຕາຕ່າງປະເທດໂດຍຫັນເອົາການຊື້-ຂາຍເງິນຕາຕ່າງປະເທດເຂົ້າສູ່ລະບົບທະນາຄານເຮັດໃຫ້ການຄຸ້ມຄອງເງິນຕາຕ່າງປະເທດມີປະສິດທິຜົນໃຫ້ໄວກ່ວາເກົ່າຢ່າງຊ້າສຸດບໍ່ໃຫ້ກາຍວັນທີ 31 ສິງຫາ 2021.

   ທ່ານ ນາງ ຂັນແກ້ວ ຫຼ້າມະນີເງົາ ຫົວໜ້າກົມນະໂຍບາຍເງິນຕາ ທຫລ ໄດ້ ແຈ້ງວ່າ: ຜ່ານການຕິດຕາມແລະປະເມີນຜົນການຈັດຕັ້ງປະຕິບັດແຈ້ງການການໂຈະຮັບເອກະສານຄໍາຮ້ອງ ແລະການອອກໜັງສືອະນຸຍາດດໍາເນີນທຸລະກິດແລກປ່ຽນເງິນຕາໃນຂອບເຂດທົ່ວປະເທດສະບັບເລກທີ 122/ຫກ, ລົງວັນທີ 18 ມິຖຸນາ 2021 ແລະແຈ້ງການກ່ຽວກັບການຫັນຮ້ານແລກປ່ຽນເງິນຕາໄປເປັນຮ້ານຕົວແທນຂອງທະນາຄານທຸລະກິດ (ທທກ) ໃນການດໍາເນີນທຸລະກິດແລກປ່ຽນເງິນຕາສະບັບເລກທີ 758/ ກນງ, ລົງວັນທີ 12 ກໍລະກົດ 2021 ແລະຄໍາແນະນໍາກ່ຽວຂ້ອງເຫັນວ່າ: ການຫັນຮ້ານແລກປ່ຽນເງິນຕາທີ່ໄດ້ຮັບອະນຸຍາດໄປເປັນຕົວເເທນຂອງ ທທກ ຍັງຊັກຊ້າ, ບໍ່ທັນກັບສະພາບຄວາມຮຽກຮ້ອງຕ້ອງການຂອງວຽກງານ.

   ດັ່ງນັ້ນ; ທຫລ ຈຶ່ງອອກແຈ້ງການ ສະບັບເລກທີ111 /ທຫລ, ວັນທີ 12 ສິງຫາ 2021 ໂດຍໃຫ້ບັນດາ ທທກ, ຮ້ານແລກປ່ຽນເງິນຕາ ແລະບຸກຄົນນິຕິບຸກຄົນທີ່ກ່ຽວຂ້ອງຮັບຮູ້ ແລະຈັດຕັ້ງປະຕິບັດໃຫ້ເປັນຈິງເພາະແມ່ນຄວາມຈໍາເປັນຮີບດ່ວນຕ້ອງຈັດຕັ້ງປະຕິບັດໃຫ້ສໍາເລັດໂດຍໄວເພື່ອຫັນເອົາການຊື້-ຂາຍ ເງິນຕາຕ່າງປະເທດເຂົ້າສູ່ລະບົບທະນາຄານຫຼາຍຂຶ້ນເຮັດໃຫ້ການຄຸ້ມຄອງເງິນຕາຕ່າງປະເທດມີປະສິດທິຜົນສາມາດປະກອບສ່ວນເຂົ້າໃນການພັດທະນາ ແລະແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ເງິນຕາໄດ້ດີ ແລະ ທັນສະພາບກວ່າເກົ່າ. ສະນັ້ນ, ໃຫ້ບັນດາຮ້ານແລກປ່ຽນເງິນຕາທີ່ໄດ້ຮັບອະນຸຍາດຈາກທຫລສືບຕໍ່ເປັນເຈົ້າການ ຮີບຮ້ອນປະສານສົມທົບກັບ ທທກ,ໃຫ້ ທທກ ເພີ່ມທະວີຄວາມເອົາໃຈໃສ່ໃນການພິຈາລະນາຄັດເລືອກຮ້ານແລກປ່ຽນເງິນຕາທີ່ຈະເປັນຕົວແທນຂອງຕົນ ແລະດໍາເນີນການເຊັນສັນຍາໃຫ້ສໍາເລັດພາຍໃນວັນທີ 31 ສິງຫາ 2021; ຕໍ່ກັບກໍລະນີທີ່ໄດ້ສະເໜີຂໍອະນຸຍາດດໍາເນີນທຸລະກິດແລກປ່ຽນເງິນຕາກ່ອນອອກແຈ້ງການສະບັບເລກທີ 122/ຫກ, ລົງວັນທີ 18 ມິຖຸນາ 2021 ແຕ່ຍັງບໍ່ໄດ້ຮັບໃບອະນຸຍາດດໍາເນີນທຸລະກິດນັ້ນ, ທຫລ ຈະບໍ່ສືບຕໍ່ພິຈາລະນາອີກ.

   ນອກຈາກການເຜີຍແຜ່-ແນະນຳແຈ້ງການນີ້ແລ້ວ, ທີ່ປະຊຸມຍັງໄດ້ມີການປຶກສາຫາລື, ແລກປ່ຽນຄຳເຫັນ ແລະຖາມຕອບບັນຫາຕ່າງໆຕິດພັນກັບວິທີການຈັດຕັ້ງປະຕິບັດຕົວຈິງຕື່ມອີກ, ສຳລັບແຈ້ງການສະບັບນີ້ແມ່ນໃຫ້ທະນາຄານທຸລະກິດລັດ, ທະນາຄານທຸລະກິດຮ່ວມທຶນ, ທະນາຄານທຸລະກິດເອກະຊົນ, ທະນາຄານທຸລະກິດທີ່ເປັນບໍລິສັດລູກຂອງທະນາຄານຕ່າງປະເທດ, ຮ້ານແລກປ່ຽນເງິນຕາແລະທຸກພາກສ່ວນກ່ຽວຂ້ອງປະຕິບັດແຈ້ງການສະບັບນີ້ຢ່າງເຂັ້ມງວດ, ເນື້ອໃນແຈ້ງການ ແລະຄໍາແນະນໍາທີ່ບໍ່ສອດຄ່ອງກັບແຈ້ງການສະບັບນີ້ລ້ວນແຕ່ຖືກຍົກເລີກ.

แชร์