ກະຊວງການເງິນລາວ-ຫວຽດນາມ ແລກປ່ຽນບັນຫາສຳຄັນຜ່ານປະຊຸມທາງໄກ

    ໃນວັນທີ 13 ສິງຫາ 2021, ທີ່ກະຊວງການເງິນ, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ແຫ່ງ ສປປ ລາວ, ໄດ້ປະຊຸມພົບປະແລກປ່ຽນທ່ານ ປອ ໂຮ ດຶກ ເຝິກ ລັດຖະມົນຕີກະຊວງການເງິນແຫ່ງ ສສ ຫວຽດນາມ, ເພື່ອເປັນການຕີລາຄາສູງຕໍ່ການຮ່ວມມືລະຫວ່າງສອງກະຊວງການເງິນລາວ ແລະຫວຽດນາມ ທີ່ໄດ້ມີແຜນການຮ່ວມມືກັນ, ໂດຍສະເພາະໄດ້ມີການແລກປ່ຽນບົດຮຽນ, ຝຶກອົບຮົມວຽກງານວິຊາສະເພາະໃຫ້ແກ່ພະນັກງານການເງິນລາວ, ການສ້າງ-ປັບປຸງນິຕິກໍາ ແລະກົງຈັກການຈັດຕັ້ງກໍ່ຄືການຊ່ວຍເຫຼືອເຄື່ອງອຸປະກອນ ແລະກໍ່ສ້າງໂຄງລ່າງພື້ນຖານອື່ນໆ.

   ໃນກອງປະຊຸມ, ທ່ານ ບຸນໂຈມ ອຸບົນປະເສີດ ໄດ້ລາຍງານໂດຍຫຍໍ້ສະພາບເສດຖະກິດ-ການເງິນຂອງ ສປປ ລາວ ໃນປີ 2020 ແລະ 6 ເດືອນຕົ້ນປີ 2021 ຜ່ານມາ. ພ້ອມນັ້ນ, ຍັງໄດ້ແລກປ່ຽນສະພາບການເງິນຂອງ ສປປ ລາວ ແລະ ແລກປ່ຽນການຮ່ວມມືລະຫວ່າງສອງກະຊວງ, ນັບແຕ່ມື້ເຊັນສັນຍາຮ່ວມມືກັນຄັ້ງທຳອິດລະຫວ່າງສອງກະຊວງການເງິນໃນປີ 2004 ເຫັນໄດ້ຮັບຜົນສໍາເລັດໃນຫຼາຍດ້ານ, ໂດຍສະເພາະແມ່ນການຊ່ວຍເຫຼືອຂອງກະຊວງການເງິນຫວຽດນາມໃຫ້ແກ່ກະຊວງການເງິນ ລາວ, ໃນວຽກງານຍົກສູງຄວາມສາມາດດ້ານວິຊາສະເພາະ, ເພື່ອເປັນການເພີ່ມພູນຄູນສ້າງຕໍ່ສາຍສຳພັນຄວາມສາມັກຄີແບບພິເສດລະຫວ່າງສອງຊາດລາວ-ຫວຽດນາມ, ຕອບສະໜອງຄວາມຮຽກຮ້ອງຕ້ອງການດ້ານການຄຸ້ມຄອງພື້ນຖານເສດຖະກິດໃນຕໍ່ໜ້າ, ຊຶ່ງມັນໄດ້ຊ່ວຍໃຫ້ພະນັກງານ-ລັດຖະກອນລະ ຫວ່າງສອງຂະແໜງການເງິນສປປ ລາວ ແລະ ສສ ຫວຽດນາມ ໄດ້ເພີ່ມທະວີຄວາມເຂົ້າອົກເຂົ້າໃຈ ແລະ ຊ່ວຍເຫຼືອເຊິ່ງກັນ ແລະ ກັນ, ປະກອບສ່ວນເຂົ້າໃນການ ເພີ່ມພູນຄູນສ້າງສາຍພົວພັນສາມັກຄີມິດຕະພາບແບບພິເສດ, ສາຍພົວພັນຮ່ວມມືແບບຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ. 

   ໂອກາດດັ່ງກ່າວ, ທ່ານລັດຖະມົນຕີກະຊວງການເງິນ ແຫ່ງ ສປປ ລາວ ຍັງໄດ້ກ່າວຂໍສະແດງຄວາມຂອບໃຈຢ່າງລົ້ນເຫຼືອຕໍ່ການຮ່ວມມືຢ່າງຮອບດ້ານ, ກໍ່ຄືການຊ່ວຍ ເຫຼືອຂອງກະຊວງການເງິນຫວຽດນາມໃຫ້ກະຊວງການເງິນລາວໃນການສ້າງແຜນຍຸດທະສາດ, ວາງແຜນນະໂຍບາຍ, ສ້າງ-ປັບປຸງນິຕິກຳ, ວຽກງານຈັດຕັ້ງພະນັກ ງານ, ບຳລຸງກໍ່ສ້າງພະນັກງານ, ລວມທັງການຊ່ວຍເຫຼືອອຸປະກອນເຄື່ອງມື ແລະກໍ່ສ້າງພື້ນຖານໂຄງລ່າງເຊັ່ນ: ໂຄງການກໍ່ສ້າງປັບປຸງຍົກລະດັບວິທະຍາໄລການເງິນພາກເໜືອ, ໂຄງການກໍ່ສ້າງປັບປຸງຍົກລະດັບວິທະຍາໄລການເງິນພາກໃຕ້ ແລະໂຄງການກໍ່ສ້າງພື້ນຖານໂຄງລ່າງສະຖາບັນເສດຖະກິດການເງິນດົງຄໍາຊ້າງແຕ່ໄລຍະ 1 ຮອດ ໄລຍະ 3, ຊຶ່ງໄລຍະ 3 ມີຄວາມຄືບໜ້າປະມານ 80% ຄາດວ່າຈະສໍາເລັດໃນທ້າຍປີ 2021 ນີ້.

 ພ້ອມກັນນັ້ນ, ລັດຖະມົນຕີກະຊວງການເງິນແຫ່ງ ສປປ ລາວ ຍັງໄດ້ສະເໜີໃຫ້ລັດຖະມົນກະຊວງການເງິນ ສສ ຫວຽດນາມ ຊ່ວຍສືບຕໍ່ຊ່ວຍໃຫ້ການສະໜັບສະໜູນໂຄງການລົງທຶນກໍ່ສ້າງພື້ນຖານໂຄງລ່າງຢູ່ວິທະຍາໄລການເງິນພາກເໜືອຢູ່ແຂວງຫຼວງພະບາງຕື່ມ, ເນື່ອງຈາກໂຄງການດັ່ງກ່າວແມ່ນຢູ່ໃນແຜນການຊ່ວຍຂອງລັດຖະ ບານ ສສ ຫວຽດນາມ ແລະກະຊວງການເງິນລາວຈະຫັນມະຫາວິທະຍາໄລດັ່ງກ່າວ, ເປັນສູນຝຶກວຽກງານການເງິນໃຫ້ແກ່ພະນັກງານການເງິນໃນທົ່ວປະເທດ ແລະສະເໜີໃຫ້ມີການຈັດກອງປະຊຸມແລກປ່ຽນໃນລະດັບການນໍາປີລະຄັ້ງອີກດ້ວຍ.

แชร์