ໂຮມຊຸມນຸມສະຫຼອງ 30 ປີ ວັນລັດຖະທຳມະນູນແຫ່ງຊາດ

   ໃນວັນທີ 13 ສິງຫາຜ່ານມາທີ່ຫໍສະພາແຫ່ງຊາດໄດ້ມີພິທີໂຮມຊຸມນຸມສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 30 ປີ (15 ສິງຫາ 1991-15 ສິງຫາ 2021) ໂດຍໃຫ້ກຽດເຂົ້າຮ່ວມໃນພິທີຂອງທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ; ມີບັນດາການນໍາພັກ-ລັດ, ອະດີດການນໍາພັກ-ລັດ, ບັນດານັກປະຕິວັດອາວຸໂສ, ອະດີດສະມາຊິກສະພາແຫ່ງຊາດ, ອະດີດຄະນະກຳມະການຮ່າງລັດຖະທຳມະນູນ, ອົງການຈັດຕັ້ງແນວລາວສ້າງຊາດ, ສະຫະພັນນັກຮົບເກົ່າ ແລະອົງການຈັດຕັ້ງມະຫາຊົນຂັ້ນສູນກາງ, ຜູ້ຊົງຄຸນວຸດທິ, ນັກທຸລະກິດທັງພາກລັດ ແລະເອກະຊົນ, ຜູ້ຕາງໜ້າອົງການຈັດຕັ້ງຕ່າງໆອ້ອມຂ້າງສູນກາງ ແລະນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.

    ໃນພິທີ, ທ່ານ ໄຊສົມພອນ ພົມວິຫານປະທານສະພາແຫ່ງຊາດໄດ້ຂຶ້ນກ່າວປາໄສທີ່ມີຄວາມໝາຍສຳຄັນບາງຕອນວ່າ: ກ່ອນໜ້ານີ້ 30 ປີ ຄື: ວັນທີ 13 ສິງຫາ 1991, ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນສູງສຸດ ຊຸດທີ II ໄດ້ໄຂຂຶ້ນຢ່າງສະຫງ່າຜ່າເຜີຍຢູ່ຫໍສະພາແຫ່ງຊາດ (ຫຼັງເກົ່າ) ໃນສະຖານທີ່ແຫ່ງນີ້, ກອງປະຊຸມໄດ້ພ້ອມກັນພິຈາລະນາຮ່າງລັດຖະທຳມະນູນທີ່ຄະນະກຳມະການຮ່າງລັດຖະທຳມະນູນແຫ່ງຊາດໄດ້ສະເໜີຕໍ່ກອງປະຊຸມ,ຜ່ານການຄົ້ນຄວ້າພິຈາລະນາຢ່າງຖີ່ຖ້ວນ ແລະເລິກເຊິ່ງ, ມາໃນວາລະປະຊຸມຕອນບ່າຍວັນທີ 14 ສິງຫາ 1991 ກອງປະຊຸມໄດ້ຮັບຮອງເອົາລັດຖະທຳມະນູນ ແຫ່ງ ສປປ ລາວ ສະບັບທຳອິດຢ່າງເປັນເອກະສັນ ແລະໃນວັນຕໍ່ມາທ່ານ ພູມີ ວົງວິຈິດ ຮັກສາການປະທານປະເທດໃນເວລານັ້ນກໍ່ໄດ້ອອກລັດຖະດຳລັດ ສະບັບເລກທີ 55/ປທປທ, ລົງວັນທີ 15 ສິງຫາ 1991 ປະກາດໃຊ້ລັດຖະທຳມະນູນສະບັບດັ່ງກ່າວຢ່າງເປັນທາງການ. 

ພາຍຫຼັງລັດຖະທຳມະນູນ ແຫ່ງ ສປປ ລາວ ສະບັບທຳອິດໄດ້ຖືກປະກາດໃຊ້ເປັນເວລາ 4 ປີ, ມາຮອດທ້າຍປີ 1995 ໂດຍໄດ້ຮັບຄຳເຫັນດີຈາກກົມການເມືອງສູນກາງພັກ ສະໄໝທີ V, ສະພາແຫ່ງຊາດ ຊຸດທີ III ຈຶ່ງໄດ້ຕົກລົງກຳນົດເອົາວັນປະກາດໃຊ້ລັດຖະທຳມະນູນ (ວັນທີ 15 ສິງຫາ 1991) ເປັນວັນລັດຖະທຳມະນູນແຫ່ງຊາດແນໃສ່ເພື່ອສະຫຼຸບຕີລາຄາການປະຕິບັດລັດ ຖະທຳມະນູນ ແລະກົດໝາຍ ໃນແຕ່ລະ ປີ, ສ້າງສະຕິເຄົາລົບ ແລະປະຕິບັດລັດ ຖະທຳມະນູນ ແລະກົດໝາຍໃນທົ່ວສັງຄົມໃຫ້ສູງຂຶ້ນ.

   ໃນຕະຫຼອດໄລຍະ 30 ປີ ທີ່ຜ່ານມາ, ພວກເຮົາມີຄວາມພາກພູມໃຈທີ່ເຫັນວ່າທົ່ວພັກ, ທົ່ວລັດ, ທົ່ວກໍາລັງປະກອບອາວຸດ ແລະທົ່ວປວງຊົນລາວທັງຊາດໄດ້ຮ່ວມແຮງຮ່ວມໃຈ ແລະສາມັກຄີກັນເປັນປຶກແຜ່ນແໜ້ນໜາ, ສູ້ຊົນບຸກບືນເຂົ້າຮ່ວມຢ່າງພ້ອມພຽງໃນການເຄົາລົບ ແລະປະຕິບັດລັດຖະທໍາມະນູນ ແຫ່ງ ສປປ ລາວ, ສ້າງຜົນງານອັນພົ້ນເດັ່ນໃຫຍ່ຫຼວງຫຼາຍດ້ານໃນພາລະກິດປົກປັກຮັກສາ ແລະສ້າງສາປະເທດຊາດແຕ່ພ້ອມດຽວກັນນັ້ນ, ພວກເຮົາຍັງປະສົບກັບສິ່ງທ້າທາຍທົດສອບໃຫຍ່ຫຼາຍຢ່າງ ແລະຍັງມີຈຸດອ່ອນຂໍ້ຄົງຄ້າງຈຳນວນໜຶ່ງຊຶ່ງເລັ່ງທວງໃຫ້ ພັກ ແລະລັດເຮົາກໍຄືປະຊາຊົນລາວບັນດາເຜົ່າໃນທົ່ວປະເທດພ້ອມກັນບຸກບືນສູ້ຊົນສືບຕໍ່ຜ່ານຜ່າຄວາມຫຍຸ້ງຍາກ ແລະອຸປະສັກຕ່າງໆ ເພື່ອປັບປຸງ, ແກ້ໄຂເປັນກ້າວໆ, ສືບຕໍ່ຍຶດໝັ້ນພາລະກິດປ່ຽນແປງໃໝ່, ບູລະນະລະບອບປະຊາທິປະໄຕປະຊາຊົນ, ສ້າງລັດເຮົາໃຫ້ເປັນລັດທີ່ປົກຄອງດ້ວຍກົດໝາຍໃຫ້ເຂັ້ມແຂງຂຶ້ນເທື່ອລະກ້າວ.

   ແນວໃດກໍ່ດີໃນໄລຍະຫ້າປີຕໍ່ໜ້ານີ້ (2021-2026) ທ່ານ ໄຊສົມພອນ ພົມວິຫານ ກ່າວວ່າ: ສະພາແຫ່ງຊາດ ຊຸດທີ IX ຈະໄດ້ສືບທອດມູນເຊື້ອອັນດີງາມຂອງສະພາແຫ່ງຊາດຊຸດຜ່ານມາ, ສູ້ຊົນສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະຮອບດ້ານໃນດ້ານການ ຈັດຕັ້ງ ແລະການເຄື່ອນໄຫວປະຕິບັດພາລະບົດບາດທີ່ສຳຄັນຂອງຕົນ, ເປັນຕົ້ນແມ່ນຮ່ວມກັບສະພາປະຊາຊົນຂັ້ນແຂວງຕັ້ງໜ້າຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດລັດຖະທໍາມະນູນ, ກົດໝາຍ, ແຜນພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ IX, ບັນດາມະຕິຂອງສະພາແຫ່ງຊາດ, ສະພາປະຊາຊົນແຂວງ, ນະຄອນຫຼວງວຽງຈັນ.... ພິເສດແມ່ນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ເຂົ້າສູ່ຕົວຈິງ, ມີຄວາມເດັດຂາດ,ເຂັ້ມງວດໃນການປະຕິບັດ ແລະຮັບປະກັນປະສິດທິຜົນສູງປະກອບສ່ວນສໍາຄັນເຂົ້າໃນການສ້າງລັດທີ່ປົກຄອງດ້ວຍກົດໝາຍເພື່ອປະຊາຊົນ, ມາຈາກປະຊາຊົນ ແລະເປັນຂອງປະຊາຊົນຕາມທິດສັງຄົມນິຍົມເພື່ອແນໃສ່ບັນລຸເປົ້າໝາຍປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີເປັນປຶກແຜ່ນ, ມີ ປະຊາທິປະໄຕ, ສີວິໄລ ແລະຍຸຕິທໍາ.

   ໃນພີທີສະເຫຼີມສະຫຼອງດັ່ງກ່າວຍັງໄດ້ຮັບຟັງການກ່າວ ສູນທອນພົດ ຂອງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ເພື່ອເຮັດໃຫ້ງານໂຮມຊຸມນຸມຄັ້ງນີ້ມີຄວາມໝາຍ ແລະເນື້ອໃນຢ່າງເລິກເຊິ່ງ.

แชร์