LaoVietBank ມອບຕັ່ງຫີນໃຫ້ມະຫາວິທະຍາໄລແຫ່ງຊາດ ແລະສະໜາມກ໊ອຟລອງວຽນ

ຂ່າວ-ພາບ: LaoVietBank

   ໃນລະຫວ່າງວັນທີ 12-13 ສິງຫາ 2021 ຜ່ານມາ, ທະນາຄານ ຮ່ວມທຸລະກິດລາວ-ຫວຽດ ຈໍາກັດ (LaoVietBank) ໄດ້ສືບຕໍ່ສະໜັບສະໜູນຕັ່ງຫີນໃຫ້ກັບບັນດາສະຖານທີ່ສໍາຄັນຕ່າງໆໃນນະຄອນຫຼວງວຽງຈັນ, ເຊິ່ງໃນອາທິດຜ່ານມານີ້ແມ່ນມອບຢູ່ 2 ຈຸດ ຄື: ມະຫາວິທະຍາໄລແຫ່ງຊາດ (ມຊ) ແລະສະໜາມກ໊ອຟລອງວຽນ (LONG VIEN GOLF CLUB) ລວມທັງໝົດ 40 ໜ່ວຍ.

  ຕາງໜ້າທະນາຄານ ຮ່ວມທຸລະກິດ ລາວ-ຫວຽດ ຈໍາກັດ ໃຫ້ກຽດມອບໂດຍທ່ານ ນາງ ແສງມະນີ ພິລາວົງ, ຫົວໜ້າໜ່ວຍງານພັດທະນາເຄື່ອງໝາຍການຄ້າ ແລະສື່ສານມວນຊົນ ແລະຕາງໜ້າຄະນະນໍາຂອງມະຫາວິທະຍາໄລແຫ່ງຊາດກ່າວຮັບໂດຍທ່ານ ຮສ. ປອ.ນາງ ສົມຈັນ ບຸນພັນມີ ແລະ ທ່ານ ຮສ. ປອ. ຮຸ່ງເພັດ ຈັນທະວົງ; ເຊິ່ງທັງສອງທ່ານເປັນຮອງອະທິການບໍດີມະຫາວິທະຍາໄລແຫ່ງຊາດ. ສ່ວນສະໜາມກ໊ອຟລອງວຽນກໍ່ມີຜູ້ຕາງໜ້າໃຫ້ກຽດຕ້ອນຮັບພ້ອມດ້ວຍຄະນະ ເຊັ່ນກັນ.

     ໜ່ວຍງານພັດທະນາເຄື່ອງໝາຍການຄ້າ ແລະສື່ສານມວນຊົນ, ທະນາຄານຮ່ວມທຸລະກິດ ລາວ-ຫວຽດ ຈໍາກັດ ໃຫ້ຮູ້ວ່າ: ສໍາລັບໃນເດືອນສິງຫາ 2021 ນີ້, ທະນາຄານໄດ້ສໍາເລັດການມອບຕັ່ງຫີນແລ້ວ 5 ຈຸດ ເຊັ່ນ: ສວນເຈົ້າອະນຸວົງ (ແຄມຂອງ), ຫໍວັດທະນະທໍາແຫ່ງຊາດ, ສະຖາບັນການທະນາຄານ,ມະຫາວິທະຍາໄລແຫ່ງຊາດ ແລະ ສະໜາມກ໊ອຟລອງວຽນ ລວມທັງໝົດ 90 ໜ່ວຍ. ສ່ວນສະຖານທີ່ຕ່າງໆທີ່ຢູ່ໃນແຜນຈະມອບໃຫ້ອີກ 4 ບ່ອນນັ້ນ, ແມ່ນຍັງຢູ່ໃນໄລຍະການບູລະນະປັບປຸງຄືນໃໝ່ ໄດ້ແກ່: ໂຮງໝໍມະໂຫສົດ, ປະຕູໄຊ, ວັດສີເມືອງ ແລະ ຂົວມິດຕະພາບລາວ-ໄທ 1 (ວຽງຈັນ-ໜອງຄາຍ).

 ໃນເດືອນກໍລະກົດ 2021, LaoVietBank ໄດ້ສະໜັບສະໜູນຕັ່ງຫີນໃຫ້ກັບ 10 ສະຖານທີ່ສໍາຄັນຂອງນະຄອນຫຼວງວຽງຈັນ ໄດ້ແກ່: ຄິວລົດໂດຍສານສາຍໃຕ້, ໂຮງໝໍແມ່ ແລະເດັກ, ສູນການຄ້າເວີດເທຣດເຊັນເຕີ, ສູນການຄ້າວຽງຈັນເຊັນເຕີ, ວັດສີສະເກດ, ຫໍຫຼັກເມືອງ, ຫໍພະແກ້ວ, ສະຖາບັນເສດຖະກິດການເງິນ, ສວນໄຊເຊດຖາ ແລະໜັງສືພິມປະຊາຊົນລວມທັງໝົດຈໍານວນ 160 ໜ່ວຍ.

แชร์