ຫຼວງພະບາງຊີ້ນຳປາກແຊງພົ້ນທຸກໄວນີ້

ຂ່າວ: ສີສຸວັນ

   ໃນໂອກາດທີ່ການນຳແຂວງຫຼວງພະບາງໄດ້ລົງເຄື່ອນໄຫວເຮັດວຽກຢູ່ເມືອງປາກແຊງ ໄດ້ຊີ້ນຳການນຳເມືອງຫຼາຍບັນຫາສຳຄັນໃນການຍົກລະດັບດ້ານພັດທະນາໃນຕໍ່ໜ້າເພື່ອໃຫ້ເມືອງປາກແຊງຫຼຸດພົ້ນອອກຈາກເມືອງທຸກຍາກໃນໄວໆນີ້.

   ການລົງຊີ້ນຳດັ່ງກ່າວແມ່ນໃນວັນທີ 11 ສິງຫາ 2021 ທີ່ຫ້ອງປະຊຸມເມືອງ ແລະໂດຍ ທ່ານ ຄໍາຂັນ ຈັນທະວີສຸກ ເຈົ້າແຂວງໆຫຼວງພະບາງພ້ອມດ້ວຍຄະນະນໍາຈາກພະແນກການທີ່ກ່ຽວຂ້ອງໄດ້ຮັບຟັງການລາຍງານແຜນການຈັດຕັ້ງປະຕິບັດວຽກງານຮອບດ້ານຂອງເມືອງໃນ 6 ເດືອນຕົ້ນປີແລະທິດທາງຈຸດສຸມ 6 ເດືອນ ທ້າຍປີຈາກ ທ່ານ ສຸກດາວັນ ພັນຈັກຂັນ ເຈົ້າເມືອງໆປາກແຊງ.

   ສໍາລັບເມືອງປາກແຊງປະກອບມີ 52 ບ້ານ, ມີຄອບຄົວທັງໝົດ 4.342 ຄອບຄົວ, ມີພົນລະເມືອງທັງໝົດ 23.457 ຄົນ, ຍິງ 11.515 ຄົນ, ມີແຮງງານທັງໝົດ 9.356 ແຮງງານ, ຍິງ 4,752 ແຮງງານ, ຊຶ່ງໃນໄລຍະ 6 ເດືອນ ຜ່ານມາທາງເມືອງສາດດຶງດູດທຶນຊ່ວຍເຫຼືອທາງການເພື່ອການພັດທະນາເມືອງໄດ້ 22 ໂຄງການ ມີມູນຄ່າ 1,8 ແສນໂດລາ, ໃນນີ້ໂຄງການກໍ່ສ້າງມີ 7 ໂຄງການມີມູນຄ່າ 78,13 ພັນໂດລາ, ໂຄງການສະໜອງອຸປະກອນ 3 ໂຄງການ ມູນຄ່າ 75,4 ພັນໂດລາ ແລະໂຄງການສົ່ງເສີມວິຊາການມີ 12 ໂຄງການມູນຄ່າ 26,8 ພັນໂດລາ ບັນດາໂຄງການເຫຼົ່ານີ້ໄດ້ປະກອບສ່ວນສຳຄັນຊ່ວຍເຮັດໃຫ້ການພັດທະນາ ພື້ນຖານໂຄງລ່າງເສດຖະກິດ-ສັງຄົມຂອງເມືອງຫຼາຍດ້ານດີຂຶ້ນເທື່ອລະກ້າວ.

   ໃນໂອກາດທີ່ທ່ານເຈົ້າແຂວງໄດ້ລົງຊີ້ນໍາກອງປະຊຸມຄົບຄະນະບໍລິຫານງານພັກເມືອງປາກແຊງເປີດກວ້າງຄັ້ງທີ 5 ສະໄໝ VI ໂດຍ ທ່ານໄດ້ເນັ້ນຫຼາຍບັນຫາໃຫ້ການນໍາຂອງເມືອງພ້ອມກັນເອົາໃຈໃສ່ໃນການແກ້ໄຂບັນຫາທີ່ຍັງຄົງຄ້າງ ແລະສືບຕໍ່ຕັ້ງໜ້າສຶກສາລົງເລິກຄົ້ນຄວ້າລະອຽດເນື້ອໃນມະຕິ XI ຂອງພັກ, ເນື້ອໃນມະຕິກອງປະຊຸມໃຫຍ່ຄັ້ງທີ VIII ຂອງແຂວງ, ສົມທຽບໃສ່ເນື້ອໃນມະຕິຂອງກອງປະຊຸມໃຫຍ່ອົງຄະນະພັກເມືອງປາກແຊງ,ແຜນພັດທະນາເສດຖະກິດ-ສັງຄົມ 5 ປີ ຂອງເມືອງ, ລົງເລິກສຶກສາຄົ້ນຄວ້າເປັນແຕ່ລະຂະແໜງການກໍາແໜ້ນສະພາບລວມໃຫ້ລະອຽດຮອບດ້ານ.

   ສືບຕໍ່ປັບປຸງແບບແຜນນໍາພາແບບແຜນວິທີເຮັດວຽກແຕ່ຂັ້ນເມືອງຮອດຂັ້ນຮາກຖານບ້ານ, ນໍາພາເຮັດຕົວຈິງ, ມີຄວາມເປັນເອກະພາບພາຍໃນສູງສຸດໃນການຊີ້ນໍາໆພາ, ແກ້ໄຂແຕ່ລະບັນຫາທີ່ຍັງຄົງຄ້າງ ແລະບັນຫາທີ່ຈະເກິດຂຶ້ນໃໝ່, ສຶກສາລົງເລິກຄົ້ນຄວ້າຊອກທາງອອກໃນການພັດທະນາເມືອງປາກແຊງ, ໃນການຜັນຂະຫຍາຍຈັດຕັ້ງປະຕິບັດ 2 ວາລະແຫ່ງຊາດຄືເບິ່ງທ່າແຮງຂອງເມືອງ, ມູນເຊື້ອ, ຊັບພະຍາກອນ ແລະຂົນຂວາຍຊອກ, ດຶງເອົາຜູ້ປະກອບການທັງພາຍໃນ ແລະຕ່າງປະເທດມາລົງທຶນຕາມທ່າແຮງຂອງເມືອງເພື່ອພັດທະນາເມືອງປາກແຊງໃຫ້ຫຼຸດພົ້ນອອກຈາກເມືອງທຸກຍາກຂອງແຂວງໃນໄວໆນີ້. 

แชร์