ລັດເຫັນດີສົ່ງອອກຜະລິດຕະພັນໄມ້ປູກໂດຍບໍ່ປຸງແຕ່ງ

   ຫ້ອງວ່າການສໍານັກງານນາຍົກໄດ້ເຫັນດີໃຫ້ສົ່ງອອກຜະລິດຕະພັນທຸກຮູບແບບ (ປຸງແຕ່ງ ຫຼືບໍ່ມີການປຸງແຕ່ງ) ຈາກໄມ້ປູກທຸກຊະນິດຕາມທີ່ໄດ້ກຳນົດໄວ້ໃນມາດຕາ 36 ຂອງກົດໝາຍປ່າໄມ້ (ສະບັບປັບປຸງ) ເລກທີ 64/ສພຊ ແຕ່ໃຫ້ມີການກຳນົດໂກຕ້າສົ່ງອອກໃນແຕ່ລະປີບົນພື້ນຖານການອະນຸມັດຂອງລັດຖະບານ ແລະມີການຂຶ້ນທະບຽນສວນປູກ ຫຼືໃບຢັ້ງຢືນສວນປູກຕາມລະບຽບການກ່ຽວຂ້ອງ.

 ພ້ອມທັງເຫັນດີໃຫ້ເພີ່ມລາຍການຜະລິດຕະພັນໄມ້ເພື່ອການສົ່ງອອກເຂົ້າໃໝ່ 2 ລາຍການຄືຜະລິດຕະພັນໄມ້ໂລງສົບສຳເລັບຮູບ ແລະຜະລິດຕະພັນໄມ້ທີ່ເປັນຊີ້ນສ່ວນຂອງເຟີນີເຈີໄມ້ນອກຈາກນັ້ນ, ຍັງເຫັນດີໃຫ້ເພີ່ມຂະໜາດໄມ້ສຳລັບການສົ່ງອອກ 7 ລາຍການ ເຊັ່ນ: ໄມ້ປູພື້ນຊີ້ນດຽວ, ໄມ້ແຜ່ນຮົ້ວ, ໄມ້ວົງກົບ,ໄມ້ວົງກົບປ່ອງຢ້ຽມ, ໄມ້ວົງກົບປະຕູ, ໄມ້ລູກຕິ່ງຮູບຊົງສີ່ຫຼ່ຽມ ແລະໂຕະໜ້າມົນໄມ້ແຜ່ນດຽວສຳເລັດຮູບ.

    ອີງຕາມຂໍ້ມູນຈາກສູນຂໍ້ມູນຂ່າວສານທາງການຄ້າກະຊວງ ອຸດສະຫະກຳ ແລະ ການຄ້າ ເປີດເຜີຍຕາມແຈ້ງການທິດຊີ້ນໍາກ່ຽວກັບການປັບປຸງນິຕິກໍາ, ກົນໄກການ ປະຕິບັດ ແລະການເກັບລາຍຮັບຈາກໄມ້ ແລະຜະລິດຕະພັນຈາກໄມ້, ເລກທີ 885/ຫສນຍ, ລົງວັນທີ 28 ກໍລະກົດ 2021 ຊຶ່ງໄດ້ມີທິດຊີ້ນໍາດັ່ງນີ້:

1) ເຫັນດີໃຫ້ສົ່ງອອກຜະລິດຕະພັນທຸກຮູບແບບ (ປຸງແຕ່ງ ຫຼືບໍ່ມີການປຸງແຕ່ງ) ຈາກໄມ້ປູກທຸກສະນິດຕາມທີ່ໄດ້ກຳນົດໄວ້ໃນມາດຕາ 36 ຂອງກົດໝາຍປ່າໄມ້ (ສະບັບປັບປຸງ) ເລກທີ 64/ ສພຊ, ລົງວັນທີ 13 ມິຖຸນາ 2019 ແລະດຳລັດວ່າດ້ວຍການສົ່ງເສີມການປູກໄມ້ເປັນສິນຄ້າ ເລກທີ 24/ ລບ, ລົງວັນທີ 20 ສິງຫາ 2019 ແຕ່ໃຫ້ມີການກຳນົດໂກຕ້າສົ່ງອອກໃນແຕ່ລະປີບົນພື້ນຖານການອະນຸມັດຂອງລັດຖະບານ ແລະມີການຂື້ນທະບຽນສວນປູກ ຫຼືໃບຢັ້ງຢືນສວນປູກຕາມລະບຽບການກ່ຽວຂ້ອງ.

2) ສຳລັບໄມ້ປູກໃຫ້ໝາກທຸກຊະນິດເຊັ່ນ: ຕົ້ນມີ້, ຕົ້ນຂາມ, ຕົ້ນມ່ວງ ແລະຕົ້ນໄມ້ໃຫ້ໝາກຊະນິດອື່ນໆ ທີ່ປະຊາຊົນໄດ້ປູກ ແລະປົກປັກຮັກສາເປັນເວລາດົນນານທີ່ມີຈຸດປະສົງຕັດ ແລະສົ່ງອອກນັ້ນ,ໃຫ້ກະຊວງກະສິກຳ ແລະປ່າໄມ້ຄົ້ນຄວ້າ ແລະອອກນິຕິກຳສະເພາະເພື່ອເປັນບ່ອນອີງໃນການຄຸ້ມຄອງ ແລະສົ່ງເສີມການປູກ ແລະການສົ່ງອອກໃນສະເພາະໜ້າ ແລະຍາວນານ.

3) ເຫັນດີໃຫ້ເພີ່ມຂະໜາດໄມ້ສຳລັບການສົ່ງອອກ 7 ລາຍການ ຄື:

  • - ໄມ້ປູພື້ນຊີ້ນດຽວເພີ່ມຂະໜາດຄວາມກວ້າງຈາກ 20 ຊັ່ງຕີແມັດ ມາເປັນ 30 ຊັງຕີແມັດ.
  • - ໄມ້ແຜ່ນຮົ້ວເພີ່ມຂະໜາດຄວາມຍາວຈາກ 180 ຊັງຕີແມັດ ມາເປັນ 200 ຊັງຕີແມັດ.
  • - ໄມ້ວົງກົບ ປັບປຸງໃຫ້ສົ່ງອອກໄດ້ໂດຍບໍ່ຜ່ານການປຸງແຕ່ງດ້ວຍການແລ່ນຮ່ອງບັງໃຍ, ແຕ່ຕ້ອງຜ່ານຂັ້ນຕອນຂອງການປຸງແຕ່ງເຊັ່ນ: ອົບ, ກົບລຽບ, ຕັດມຸມສາກຫົວວົງກົບຕົວຜູ້ ແລະຕົວແມ່ທີ່ສາມາດປະກອບເປັນຊຸດ.
  • - ໄມ້ວົງກົບປ່ອງຢ້ຽມເພີ່ມຂະໜາດຄວາມໜາຈາກ 6 ຊັງຕີແມັດ ມາເປັນ 8 ຊັງຕີແມັດ.
  • - ໄມ້ວົງກົບປະຕູເພີ່ມຂະໜາດຄວາມໜາຈາກ 8 ຊັງຕີແມັດ ມາເປັນ 10 ຊັງຕີແມັດ.
  • - ໄມ້ລູກຕິ່ງຮູບຊົງສີ່ຫຼ່ຽມເພີ່ມຂະໜາດຄວາມໜາ ແລະຄວາມກວ້າງຈາກ (12x12) ຊັງຕີແມັດ ມາເປັນ (15x15) ຊັງຕີແມັດ;
  • - ໂຕະໜ້າມົນໄມ້ແຜ່ນດຽວສຳເລັດຮູບເພີ່ມຂະໜາດຄວາມໜາຈາກ 5 ຊັງຕີແມັດ ມາເປັນ 10 ຊັງຕີແມັດ. 4) ເຫັນດີໃຫ້ສົ່ງອອກໄມ້ຕົກຄ້າງຢູ່ທົ່ວປະເທດຈຳນວນ 258.117,36 ແມັດກ້ອນ ແລະມີໄມ້ຊັ່ງເປັນນໍ້າໜັກ 376,39 ໂຕນ ໂດຍໃຫ້ເກັບຄ່າຊັກພິເສດ ແລະຄ່າອື່ນໆທີ່ຕິດພັນ, ໂດຍມອບ ໃຫ້ກະຊວງອຸດສາຫະກຳ ແລະການຄ້າເປັນໃຈກາງສົມທົບກັບກະຊວງການເງິນ ແລະພາກສ່ວນທີ່ກ່ຽວຂ້ອງລົງສົມທົບກັບອົງການປົກຄອງທ້ອງຖິ່ນຂື້ນບັນຊີໄມ້ຕົກຄ້າງທັງໝົດໃຫ້ລະອຽດ, ພ້ອມທັງເຮັດສັນຍາການມອບພັນທະທັງກຳນົດເວລາສົ່ງອອກໃຫ້ຊັດເຈນເພື່ອເປັນການລ້າງສາງໄມ້ຕົກຄ້າງທັງໝົດທີ່ມີໃນປະຈຸບັນເພື່ອບໍ່ໃຫ້ມີຊ່ອງວ່າງໃນການສວຍໂອກາດຕັດໄມ້ມາເພີ່ມເຕີມອີກ.

แชร์