ລະນຶກ 71 ປີ ວັນສື່ມວນຊົນ ແລະການພິມຈຳໜ່າຍ

     ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ໄດ້ຈັດລະນຶກວັນສື່ມວນຊົນ ແລະການພິມຈຳໜ່າຍ ຄົບຮອບ 71 ປີ (13 ສິງຫາ1950-13 ສິງຫາ 2021) ຂຶ້ນໃນວັນທີ 12 ສິງຫານີ້ ທີ່ກະຊວງດັ່ງກ່າວພາຍໃຕ້ການເປັນປະທານຂອງ ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖວທ ຊຶ່ງມີ ທ່ານ ນາງ ບົວໄຂ ເພັງພະຈັນ ຄະນະປະຈຳພັກຫົວໜ້າກົມ ວັນນະຄະດີ ແລະພິມຈຳໜ່າຍກະຊວງ ຖວທ, ມີຮອງລັດຖະມົນຕີ,ຫົວໜ້າກົມຮອງກົມ, ພາກສ່ວນກ່ຽວ ຂ້ອງ ແລະສື່ມວນຊົນເຂົ້າຮ່ວມ.

   ໃນໂອກາດດັ່ງກ່າວ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນກະຊວງ ຖວທ ໄດ້ລາຍງານການເຄື່ອນໄຫວບາງຜົນງານດີເດັ່ນຂອງສື່ມວນຊົນໃນໄລຍະໜຶ່ງ ປີຜ່ານມາ ແລະ ທ່ານ ນາງ ບົວໄຂ ເພັງພະຈັນ ກໍ່ໄດ້ລາຍງານບາງຜົນງານດີເດັ່ນການພິມຈໍາໜ່າຍໃນໄລຍະ 1 ປີຜ່ານມາເຊັ່ນກັນຊຶ່ງລ້ວນແລ້ວແຕ່ມີໝາກຜົນຄວາມສຳເລັດ.

   ແຕ່ເພື່ອເປັນແນວທາງໃນການພັດທະນາໃນຕໍ່ໜ້າ ທ່ານ ນາງ ສວນສະຫວັນ ວິຍະເກດ ໄດ້ເນັ້ນໃຫ້ສື່ມວນຊົນທຸກຂະແໜງ ແລະການພິມຈຳໜ່າຍສືບຕໍ່ເອົາໃຈໃສ່ສ້າງ ແລະຍົກລະດັບຄຸນທາດການເມືອງໃຫ້ບຸກຄະລະກອນສື່ມວນຊົນ, ເວົ້າສະເພາະແມ່ນຫົວໜ້າອົງການສື່ມວນຊົນ, ຄະນະບັນນາທິການໃຫ້ໄດ້ຮຽນທິດສະດີການເມືອງ-ການປົກຄອງ;ສືບຕໍ່ສ້າງ,ປັບປຸງ ແລະຍົກລະດັບຄວາມຮູ້ຄວາມສາມາດທາງດ້ານວິຊາການ ແລະພາສາຕ່າງປະເທດໃຫ້ພະນັກງານຮັບປະກັນທາງດ້ານປະລິມານ ແລະຄຸນນະພາບສາມາດເຊື່ອມໂຍງກັບພາກພື້ນ ແລະສາກົນ.

   ສືບຕໍ່ຫັນເອົາແນວທາງຂອງພັກ, ລະບຽບກົດໝາຍເປັນອັນລະອຽດເຂົ້າສູ່ວຽກງານຕົວຈິງຂອງສື່ມວນຊົນ ແລະພິມຈຳໜ່າຍ ແລະສືບຕໍ່ຫັນເປັນທັນສະໄໝດ້ານຂໍ້ ມູນຂ່າວສານເພື່ອຮັບໃຊ້ສັງຄົມໃນ ທາງສ້າງສັນ ແລະເກີດຜົນປະ ໂຫຍດສູງສຸດ; ສື່ມວນຊົນຕ້ອງສືບ ຕໍ່ເປັນເຈົ້າການປັບປຸງຕົນເອງທັງທາງດ້ານເນື້ອໃນ ແລະຮູບການໃຫ້ກະທັດລັດ, ແທດຕົວຈິງ ແລະມີປະສິດທິຜົນສູງຂຶ້ນ, ຮັບປະກັນຄວາມໝັ້ນຄົງດ້ານຂໍ້ມູນຂ່າວສານ,ຕິດພັນກັບການຕິດຕາມກວດກາຜະລິດຕະພາບພັນຂອງສື່ມວນຊົນ ແລະພິມຈຳໜ່າຍໃຫ້ດຳເນີນໄປຖືກທິດເພື່ອຮັບໃຊ້ພັກ, ລັດ ແລະປະຊາຊົນເຮົາ; 

  ເອົາໃຈໃສ່ເປັນພິເສດຕໍ່ການຕິດຕາມກວດກາເນື້ອໃນ, ຫາງສຽງສັງຄົມຖ້ອຍທຳນອງທີ່ບໍ່ຫວັງດີຕໍ່ລະບອບໃໝ່ຂອງພວກຄົນບໍ່ດີ, ຢູ່ຕາມສື່ສັງຄົມອອນລາຍທັງເປັນເຈົ້າ ການໃນການຕອບຕ້ານຢ່າງທັນການ ແລະຖືກທິດ; ສືບຕໍ່ກໍ່ສ້າງພື້ນຖານໂຄງລ່າງດ້ານສື່ມວນຊົນ ແລະພິມຈຳໜ່າຍໃຫ້ເພີ່ມຂຶ້ນທັງທາງດ້ານປະລິມານ ແລະຄຸນນະ ພາບ, ຮັບປະກັນຫັນເຕັກນິກ, ເຕັກໂນໂລຊີໄປສູ່ລະບົບດີຈີຕອນ; ເອົາໃຈໃສ່ກໍ່ສ້າງ ແລະປັບປຸງຮາກຖານພັກໃນຂົງເຂດສື່ມວນຊົນໃຫ້ເຂັ້ມແຂງ, ປອດໃສ, ໜັກແໜ້ນຕິດພັນກັບການປັບປຸງກົງຈັກການຈັດຕັ້ງໃນຂົງເຂດນີ້ໃຫ້ແທດເໝາະກັບການຂະຫຍາຍຕົວຂອງເສດຖະກິດ-ສັງຄົມ ແລະການຂະຫາຍຕົວຂອງເຕັກນິກເຕັກໂນໂລຊີໃໝ່ໃນປະຈຸບັນ.

แชร์