ສື່ເກົ່າ ຈະບໍ່ຕາຍຫາກຮູ້ປັບຕາມຍຸກ

ໂດຍ: ຣັດສະໝີ ດວງສັດຈະ

  “ສື່ເກົ່າ ແລະສື່ໃໝ່ຍັງຄວບຄູ່ ແລະສະໜັບສະໜູນກັນໄປທັນສະພາບການໃໝ່”; ນີ້ເປັນທັດສະນະສ່ວນຕົວຂອງທ່ານ ສະຫວັນຄອນ ຣາຊມຸນຕຣ ປະທານສະມາຄົມນັກ ຂ່າວແຫ່ງ ສປປ ລາວ ທີ່ກ່າວໃນໂອກາດວັນສື່ມວນຊົນລາວຊຶ່ງມາຮອດປະຈຸບັນ, ສື່ມວນຊົນລາວມີຄວາມເຕີບໃຫຍ່ເຂັ້ມແຂງຢ່າງໜັກແໜ້ນສາມາດນໍາໃຊ້ເຕັກໂນໂລຊີ ຂໍ້ມູນຂ່າວສານທີ່ທັນສະໄໝຢ່າງທ່ວງທັນເປັນພື້ນຖານ, ນັກຂ່າວສາມາດນໍາໃຊ້ເຕັກໂນໂລຊີເຂົ້າໃນການເກັບກໍາຂໍ້ມູນ, ການຜະລິດ, ໃນການສົ່ງຂ່າວ, ຖ້າທຽບໃສ່ຫຼາຍປະເທດກໍ່ບໍ່ນ້ອຍໜ້າຢູ່ໃນພາກພື້ນ. 

  ສໍາລັບສື່ໃໝ່ເກີດຂຶ້ນກໍ່ບໍ່ແມ່ນສື່ເກົ່າຈະສູນຫາຍໄປ, ໃນຕໍ່ໜ້າທີ່ມີສື່ໃໝ່ “ສື່ສັງຄົມອອນລາຍ” ເກີດຂຶ້ນໝາຍຄວາມວ່າພວກເຮົາຍັງມີສື່ວິທະຍຸ,ໂທລະພາບ,ໜັງສືພິມທີ່ເອີ້ນວ່າ: ສື່ແບບເກົ່າທີ່ເກີດຂຶ້ນມາຫຼາຍຮ້ອຍປີ ແລະມາຮອດໄລຍະນີ້ແມ່ນມີສື່ໃໝ່ເກີດຂຶ້ນຍ້ອນວ່າເຕັກໂນໂລຊີມີການພັດທະນາ, ແນ່ນອນການພັດທະນາກົດເກນກ້າວຂຶ້ນຈະບໍ່ຢູ່ບ່ອນເກົ່າ; ສະນັ້ນ, ຕ້ອງປັບຕົວໃຫ້ທັນກັບການປ່ຽນແປງ, ທັນກັບການຂະຫຍາຍຕົວ, ທັນກັບຄວາມຕ້ອງການຂອງສັງຄົມໂດຍລວມ ແລ້ວສື່ແມ່ນຈະບໍ່ຕາຍ, ມັນຍັງຄົງຢູ່ນໍາມະນຸດຕະຫຼອດໄປ; ບົດບາດຂອງສື່ແມ່ນການສົ່ງຂໍ້ມູນຂ່າວສານເພື່ອໃຫ້ສັງຄົມມີການພັດທະນາ.

   ແຕ່ເຖິງຢ່າງໃດກໍ່ຕາມ, ຂ່າວສານກໍ່ມີ 2 ດ້ານຄື: ດ້ານບວກດ້ານລົບ. ໃນດ້ານລົບ, ພວກເຮົາຈະເຮັດແນວໃດເພື່ອໃຫ້ມີຄວາມເຂົ້າໃຈວ່າ: ເຮົາຈະຮ່ວມກັນປຸກລະ ດົມສຶກສາອົບຮົມແກ້ບັນຫາເປັນຕົ້ນປາກົດການຫຍໍ້ທໍ້ເກີດຂຶ້ນໃນແຕ່ລະດ້ານ, ຖ້າສື່ມວນຊົນເຮັດຖືກຕ້ອງຕາມມະຕິ, ຕາມແນວທາງ, ຕາມກົດໝາຍ, ຕາມຈັນຍາບັນຂອງສື່ມວນຊົນເພາະສື່ເປັນກໍາລັງແຮງໃນການແກ້ໄຂບັນຫາ, ເປັນຜູ້ສະເໜີ, ເປັນຜູ້ແນະນໍາທິດທາງຄວາມຄິດເຫັນໃນການຈະແກ້ບັນຫາ, ຊ່ອງທາງແກ້ໄຂ, ສື່ເປັນຜູ້ເກັບກໍາຫາງສຽງ, ເກັບກໍາຄວາມຮູ້ສຶກຂອງສັງຄົມຕໍ່ບັນຫາທີ່ຈະເກີດຂຶ້ນ, ສື່ເປັນເວທີເສີມຂະຫຍາຍປະຊາທິປະໄຕ ແລະສິດເປັນເຈົ້າຂອງປະເທດຊາດ, ເພື່ອໃຫ້ຄົນສ່ວນຫຼາຍໄດ້ມີຂໍ້ມູນເພື່ອໄປຄົ້ນຄິດ. ສະນັ້ນ, ຕ້ອງໄດ້ພັດທະນາສື່, ຕ້ອງໄດ້ເຂົ້າສູ່ຂະບວນການເຊື່ອມໂຍງສື່ແບບເກົ່າກັບສື່ແບບໃໝ່, ທຸກສື່ແມ່ນມີຫຼາຍຊ່ອງທາງຜ່ານອອນລາຍ, ຜ່ານດີຈິຕອລ, ເຄືອຂ່າຍຄອມພິວເຕີ-ລະບົບໂທລະສັບໃນການແຈກຢາຍຂໍ້ມູນ.

   ດັ່ງນັ້ນ, ການຜະລິດຕ້ອງມີຄວາມສາມາດໃນດ້ານວິຊາການ, ຕ້ອງປັບປຸງຮູບແບບໃຫ້ໄວ, ມີຫຼັກຖານ, ມີຂໍ້ມູນເພີ່ມຕື່ມເພື່ອສ້າງຄວາມເຊື່ອຖື, ຄວາມເຂົ້າໃຈ, ຊວນ ໃຫ້ອ່ານ; ຂໍ້ມູນຂ່າວສານທີ່ໄດ້ເກັບກໍາມາ,ທີ່ໄດ້ຟັງມາຕ້ອງໄດ້ມາກັ່ນກອງຢ່າງມີສະຕິ, ສື່ມວນຊົນຕ້ອງກໍາແໜ້ນຢຶດໝັ້ນຈັນຍາບັນ, ຖ້າວ່າສື່ເຮັດໜ້າທີ່ຕາມຫຼັກຈັນຍາບັນຂອງແນວທາງນະໂຍບາຍທີ່ກໍານົດ ໄວ້ຢູ່ໃນກົດໝາຍຖືວ່າສື່ແມ່ນຍັງຈະຮັກສາບົດບາດໄດ້ເປັນຢ່າງດີ, ຜ່ານມາສື່ພວກເຮົາກໍ່ພະຍາຍາມຍົກລະດັບມາໂດຍຕະຫຼອດທັງພາຍໃນ ແລະຕ່າງປະເທດ, ຂໍພຽງແຕ່ໃຫ້ສະມາຊິກຂອງວົງການສື່ມວນຊົນລາວທຸກພາກສ່ວນສືບຕໍ່ເອົາຄວາມຮູ້ທີ່ຮຽນມາເສີມຂະຫຍາຍໃຫ້ສູງຂຶ້ນເລື້ອຍໆ, ຮຽນຮູ້ສິ່ງທີ່ໃໝ່ໆ ຈຶ່ງຈະເຮັດສໍາເລັດໜ້າທີ່.

   ໃນໄລຍະຜ່ານມານີ້; ຖັນແຖວນັກຂ່າວລາວໄດ້ປະຕິບັດໜ້າທີ່ຢ່າງຕັ້ງໜ້າທັງສະຕິປັນຍາ ແລະເຫື່ອແຮງຂອງຕົນເຂົ້າໃນການໂຄສະນາເຜີຍແຜ່ຜົນສໍາເລັດແຕ່ລະໄລ ຍະແຫ່ງການປົກປັກຮັກສາ ແລະສ້າງສາພັດທະນາປະເທດຊາດ, ປຸກລະດົມຈິດໃຈຮັກຊາດ, ຮັກລະບອບໃໝ່ ແລະຄວາມເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງພາຍໃຕ້ການຊີ້ນໍາ-ນໍາພາຂອງພັກກໍ່ຄືອົງຄະນະພັກ ແລະຄະນະນໍາກະຊວງ ຖວທ, ເຖິງວ່າ: ພວກເຮົາໄດ້ປະສົບພົບພໍ້ກັບຄວາມຫຍຸ້ງຍາກ ແລະສິ່ງທ້າທາຍຫຼາຍຈາກສະພາບການເຊື່ອມໂຍງໃນຂະບວນການປະຕິວັດວິທະຍາສາດເຕັກໂນໂລຊີຂໍ້ມູນຂ່າວສານທີ່ນັບມື້ນັບຂະຫຍາຍຕົວກ້າວເຂົ້າສູ່ຍຸກດີຈິຕອລ ຫຼື 4.0 ຊຶ່ງສົ່ງຜົນກະທົບທັງທາງບວກ ແລະທາງລົບຕໍ່ການພັດທະນາຢູ່ປະເທດເຮົາ.

   ພັກ ແລະລັດຖະບານເຮົາກໍ່ຄືການນຳຂອງກະຊວງ ຖວທ ແຕ່ລະສະໄໝໄດ້ໃຫ້ການຊີ້ນໍາ-ນໍາພາຢ່າງໃກ້ຊິດໃນການຄຸ້ມຄອງ ແລະການລົງທຶນຢ່າງຫຼວງຫຼາຍເຂົ້າໃສ່ໃນການພັດທະນາສື່ມວນຊົນເພາະຖືວ່າເປັນອາວຸດອັນແຫຼມຄົນ, ເປັນກໍາລັງຍູ້ດັນເຮັດໃຫ້ສັງຄົມມີການພັດທະນາ ແລະຂະຫຍາຍຕົວຂຶ້ນເລື້ອຍໆ, ສື່ມວນຊົນລາວໄດ້ ເຕີບໃຫຍ່ຂະຫຍາຍຕົວຢ່າງຕໍ່ເນື່ອງທັງທາງດ້ານປະລິມານ ແລະຄຸນນະພາບ ໂດຍມີໂຄງລ່າງພື້ນຖານທີ່ໄດ້ຮັບການພັດທະນາໄປສູ່ຄວາມທັນສະໄໝ ແລະຄ່ອຍໆຫັນຈາກລະບົບອານາລ໊ອກໄປສູ່ລະບົບດີຈິຕອລໄດ້ໂດຍພື້ນຖານອັນພົ້ນເດັ່ນແມ່ນການນໍາໃຊ້ເຄືອຂ່າຍອິນເຕີເນັດໃນການສະໜອງຂໍ້ມູນຂ່າວສານ, ສາລະຄວາມຮູ້, ສາລະບັນເທິງໃຫ້ແກ່ເປົ້າໝາຍເພື່ອຮັບໃຊ້ການພັດທະນາເສດຖະກິດ-ສັງຄົມໄດ້ຢ່າງວ່ອງໄວ, ອຸດົມສົມບູນຕາມທິດສີຂຽວ ແລະຍືນຍົງ.

   ຂະນະດຽວກັນ, ບຸກຄະລາກອນສື່ມວນຊົນໄດ້ຮັບການພັດທະນາ, ຍົກລະດັບຢ່າງຕໍ່ເນື່ອງທັງພາຍໃນ ແລະຕ່າງປະເທດເຮັດໃຫ້ເນື້ອໃນສາລະຕ່າງໆທັງສື່ສິ່ງພິມ, ສື່ອີເລັກໂຕຣນິກ, ສື່ອອນລາຍ, ແລະ ອື່ນໆ ອົງການສື່ມວນຊົນຕ່າງໆທັງສູນກາງ ແລະ ທ້ອງຖິ່ນໄດ້ສຸມໃສ່ໂຄສະນາໃຫ້ແກ່ການເຄື່ອນໄຫວຂອງການນໍາຂັ້ນຕ່າງໆ ທັງພາຍໃນ ແລະຕ່າງປະເທດ, ລາຍງານໄພພິບັດທາງທໍາມະຊາດ, ພະຍາດລະບາດ ແລະເຫດການຕ່າງໆ ທີ່ເກີດຂຶ້ນໃນສັງຄົມໄດ້ຢ່າງທ່ວງທັນກັບສະພາບການຜ່ານຫຼາກຫຼາຍຮູບແບບ, ສີສັນ ແລະຊ່ອງທາງຂອງສື່ໃນນີ້ລວມທັງສື່ດັ້ງເດີມ ແລະສື່ສັງຄົມອອນລາຍ. ຜ່ານການປະຕິບັດ, ບັນດາປະກົດການຫຍໍ້ທໍ້ຕ່າງໆໃນສັງຄົມ ຖືກສະກັດກັ້ນ ແລະຕີຖອຍໃຫ້ຫຼຸດນ້ອຍຖອຍລົງດ້ວຍການໂຄສະນາສຶກສາອົບຮົມ,ແນະນໍາສັງຄົມໃຫ້ເຄົາລົບ ແລະປະຕິບັດກົດໝາຍຢ່າງເຂັ້ມງວດ,ຍຶດໝັ້ນແນວທາງ, ອຸດົມການຂອງພັກ ແລະຄ່ານິຍົ ຂອງຊາດລາວຄົນລາວ.

   ສິ່ງທີ່ກ່າວມາຂ້າງເທິງນັ້ນ; ເປັນສ່ວນໜຶ່ງໃນການປະກອບສ່ວນຂອງສື່ມວນຊົນລາວໃນການຮັບໃຊ້ແນວທາງການເມືອງຂອງພັກ ແລະລັດຖະບານກໍ່ການພັດທະນາເສດຖະກິດ-ສັງຄົມ ແລະການຮ່ວມມືສາກົນຕາມທິດສີຂຽວ, ຍືນຍົງກໍ່ຄືເປົ້າໝາຍສະຫັດສະວັດເພື່ອການພັດທະນາ (MDGs) ແລະເປົ້າໝາຍການພັດທະນາແບບ ຍືນຍົງ (SDGs) ຂອງສະຫະປະຊາຊາດ, ພ້ອມດຽວກັນນີ້ກໍ່ປະກອບສ່ວນເຂົ້າໃນການນໍາພາຫາງສຽງສັງຄົມເພື່ອສ້າງຄວາມເຂົ້າໃຈທີ່ຖືກຕ້ອງຕໍ່ເຫດການຕ່າງໆ ທີ່ເກີດຂຶ້ນໃນປະເທດເຮົາກໍ່ຄືຢູ່ໃນໂລກ ແລະຕອບໂຕ້ຖ້ອຍທໍານອງ ແລະກົນອຸບາຍຫັນປ່ຽນໂດຍສັນຕິຂອງອິດທິກໍາລັງປໍລະປັກ ແລະກຸ່ມຄົນບໍ່ດີທີ່ຫວັງມ້າງເພທໍາລາຍ ປະເທດເຮົາ ແລະໃສ່ຮ້າຍປ້າຍສີການນໍາພັກ-ລັດເຮົາແນໃສ່ເຮັດປະເທດຊາດມີການພັດທະນາ ແລະປະຊາຊົນດຳລົງຊີວິດປົກກະຕິແບບໃໝ່ຕາມແນວທາງຂອງພັກ ແລະລັດຖະບານເຮົາ.

แชร์