ຖວທ ເສວະນາ “ສິ່ງທ້າທາຍຕໍ່ວຽກງານການພິມຈໍາໜ່າຍໃນໄລຍະໃໝ່”

  ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ຈັດກອງປະຊຸມເສວະນາພາຍໃຕ້ຫົວຂໍ້ສິ່ງທ້າທາຍຕໍ່ວຽກງານການພິມຈໍາໜ່າຍໃນໄລຍະໃໝ່ຂຶ້ນໃນວັນທີ 11 ສິງຫານີ້ ທີ່ຫໍວັດທະນະທໍາແຫ່ງຊາດ ໂດຍ ເປັນປະທານຂອງທ່ານ ວັນສີ ກົວ ມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ.

  ຈຸດປະສົງເພື່ອຄົ້ນຄວ້າຕີລາຄາຄືນຜົນງານທີ່ປະຕິບັດຜ່ານມາໃນຂົງເຂດວຽກງານການພິມຈໍາໜ່າຍ, ຂໍ້ສະດວກ, ຂໍ້ຫຍຸ້ງຍາກ, ບັນຫາຂໍ້ຄົງຄ້າງ, ສິ່ງທ້າ ທາຍຕໍ່ວຽກງານການພິມຈໍາໜ່າຍໃນປະຈຸບັນ, ພ້ອມທັງວາງທິດທາງການເຄື່ອນໄຫວວຽກງານວິຊາການດ້ານວັນນະຄະດີ, ການພິມ, ການຈັດພິມ ແລະການຈໍາໜ່າຍຜະລິດຕະພັນສິ່ງພິມໃນຕໍ່ໜ້າ, ເພື່ອໃຫ້ ການຄຸ້ມຄອງວຽກງານພິມຈຳໜ່າຍແຕ່ຂັ້ນສູນກາງຈົນຮອດທ້ອງຖິ່ນມີຄວາມເປັນລະບຽບ, ເປັນລະບົບຖືກຕ້ອງຕາມກົດໝາຍວ່າດ້ວຍພິມຈຳໜ່າຍ, ສາມາດຊຸກຍູ້ ສົ່ງເສີມພາກສ່ວນດຳເນີນທຸລະ ກິດການພິມ, ໂຮງພິມຂອງລັດ ແລະເອກກະຊົນໃນຂະແໜງດັ່ງກ່າວໃຫ້ມີການຂະຫຍາຍຕົວທັງປະລິມານ ແລະຄຸນນະພາບ.

  ກອງປະຊຸມດັ່ງກ່າວຍັງເປັນການກະກຽມລະນຶກເຖິງວັນທີ 13 ສິງຫາ (1950) ເປັນວັນກຳເນີດວັນສື່ມວນຊົນ ແລະການພິມຈໍາໜ່າຍຄົບຮອບ 71 ປີ, ເພື່ອລະນຶກເຖິງບຸນຄຸນ ແລະຄຸນງາມຄວາມດີຂອງບັນດາທ່ານຜູ້ນຳພັກ-ລັດ ນັກຮົບບັນນາທິການ ແລະພະນັກງານທີ່ປະຕິບັດໜ້າທີ່ວຽກງານການພິມຈໍາໜ່າຍລາວທີ່ໄດ້ເສຍສະຫຼະຊີວິດ ແລະອຸທິເລືອດເນື້ອສະຕິປັນຍາປະກອບສ່ວນເຂົ້າໃນພາລະກິດຕໍ່ສູ້ປົດປ່ອຍຊາດໃນເມື່ອກ່ອນ, ເພື່ອຫວນຄືນ ແລະຮໍ່າ ຮຽນເອົາຄຸນສົມບັດສິນທຳປະຕິວັດ, ນໍ້າໃຈຮັກຊາດທີ່ກາຍເປັນມໍລະດົກ ແລະບົດຮຽນອັນລໍ້າຄ່າຂອງບັນດາທ່ານຜູ້ນໍາພັກ-ລັດ ແລະບັນດານັກຮົບການພິມ, ການຈັດພິມ ແລະການພິມຈຳໜ່າຍຮຸ່ນອາວຸໂສໄດ້ສ້າງໄວ້ໃຫ້ຮຸ່ນລູກຫຼານນຳໄປຄົ້ນຄວ້າຕໍ່ໄປໃນອະນາຄົດ.

----

ໜັງສືພິມ ເສດຖະກິດ-ສັງຄົມ

แชร์