ປີນີ້ທົ່ວປະເທດຈະສູ້ຊົນໃຫ້ການຜະລິດເຂົ້າບັນລຸ 4,4 ລ້ານໂຕນ

  ເພື່ອສືບຕໍ່ເຮັດໃຫ້ການຂະຫຍາຍຕົວຂອງລວມຍອດຜະລິດຕະພັນກະສິກຳ ແລະປາໄມ້ຂະຫຍາຍຕົວໃນລະດັບ 2,8% ຂຶ້ນໄປ, ກວມເອົາປະມານ 15,3% ຂອງໂຄງປະກອບເສດຖະກິດແຫ່ງຊາດ, ປະກອບສ່ວນໃຫ້ລວມຍອດຜະລິດຕະພັນພາຍໃນຂະຫຍາຍຕົວໃນລະດັບ 6,7% ຂຶ້ນໄປ, ກະຊວງກະສິກຳ ແລະ ປ່າ ໄມ້ຈິ່ງໄດ້ວາງຄາດໝາຍໃນການຜະລິດເຂົ້າໃຫ້ໄດ້ 4,4 ລ້ານໂຕນ ເພື່ອສົ່ງອອກໃຫ້ໄດ້ 4 ແສນໂຕນໃນປີດຽວກັນ.

  ທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະປ່າໄມ້ໃຫ້ຮູ້ຜ່ານຮ່າງບົດສະຫຼຸບການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະພັດທະນາ ຊົນນະບົດປະຈຳປີ 2018 ແລະທິດທາງ ແຜນການປີ 2019 ວ່າ: ເພື່ອສືບຕໍ່ເຮັດ ໃຫ້ການຂະຫຍາຍຕົວຂອງລວມຍອດຜະ ລິດຕະພັນກະສິກຳ ແລະປາໄມ້ ຂະຫຍາຍຕົວໃນລະດັບ 2,8% ຂຶ້ນໄປ,ກວມເອົາປະມານ 15,3% ຂອງໂຄງປະກອບເສດຖະກິດແຫ່ງຊາດ,ປະກອບສ່ວນໃຫ້ GDP ຂະຫຍາຍຕົວໃນລະດັບ 6,7% ຂຶ້ນໄປ, ກະຊວງຈິ່ງສຸມໃສ່ສູ້ຊົນຜະລິດ ເຂົ້າເປືອກລວມໃຫ້ຮັກສາໄວ້ຢູ່ໃນລະດັບ 4,4 ລ້ານກວ່າໂຕນ, ໃນນັ້ນຕ້ອງຮັບປະກັນເຂົ້າສະບຽງໃຫ້ໄດ້ 2,1 ລ້ານໂຕນຕໍ່ປີ, ຄັງແຮສຸກເສີນ 4 ແສນໂຕນ, ປຸງແຕ່ງພາຍໃນ 5-6 ແສນໂຕນ.

  ເພື່ອບັນລຸຄາດໝາຍດັ່ງກ່າວ ກະ ຊວງຕ້ອງສຸມໃສ່ການຜະລິດເຂົ້ານາ ແຊງໃຫ້ໄດ້ 1 ແສນເຮັກຕາ, ຜົນຜະລິດ 5,26 ແສນໂຕນ, ເຂົ້ານາປີໃຫ້ໄດ້ 8,50 ແສນເຮັກຕາ, ຜົນຜະລິດ 3,67 ລ້ານ ໂຕນ ແລະເຂົ້າໄຮ່ ໃຫ້ຢູ່ໃນລະດັບ 1 ແສນ ເຮັກຕາ, ຜົນຜະລິດ 2 ແສນໂຕນ, ພ້ອມນີ້ກໍ່ເອົາໃຈໃສ່ການຜະລິດພືດສະບຽງອາຫານເຊັ່ນ: ຜະລິດສາລີຫວານໃຫ້ໄດ້ 2,91 ແສນໂຕນ, ເຜືອກມັນຕ່າງໆ 3,88 ແສນໂຕນ, ໄມ້ກິນໝາກລວມ 1,66 ລ້ານໂຕນ, ພືດຜັກລວມໃຫ້ໄດ້ 1,5 ລ້ານໂຕນ.

 ການລ້ຽງສັດສືບຕໍ່ປຸກລະດົມຊຸກຍູ້ຄອບຄົວ, ນັກທຸລະກິດເອກກະຊົນ, ນັກລົງທືນທັງພາຍໃນ ແລະຕ່າງປະເທດ ເຂົ້າຮ່ວມໃນການຈັດຕັ້ງປະຕິບັດແຜນງານ ຜະລິດສະບຽງອາຫານ ແລະ ຜະລິດເປັນສີນຄ້າ ເພື່ອແນໃສ່ການສະ ໜອງຊີ້ນ, ໄຂ່ ແລະປາ ໃຫ້ພຽງພໍໃນ ຂອບເຂດທົ່ວປະເທດ, ໃນນັ້ນຈະຕ້ອງສົ່ງເສີມເຮັດໃຫ້ລະດັບການຂະຫຍາຍ ພັນຂອງຝຸງສັດ 6% ຕໍ່ປີ, ຮັກສາລະດັບ ການຜະລິດປາ ແລະສັດນໍ້າປະເພດຕ່າງ ບໍ່ໃຫ້ຫຼຸດບໍ່ໃຫ້ຖອຍລົງ, ຊຶ່ງຈະຕ້ອງໄດ້ ເອົາໃຈໃສ່ປົກປັກຮັກສາລະບົບນິເວດ ຂອງປາທໍາມະຊາດ ແລະສັດນໍ້າປະເພດຕ່າງໆໃຫ້ມີຄວາມສົມດູນ, ຂະຫຍາຍການລ້ຽງປາທຸກຮູບແບບເຮັດໃຫ້ຜົນຜະລິດເພີ້ມຂຶ້ນໃນລະດັບ 10-15% ຕໍ່ປີ, ທັງນີ້ກໍເພື່ອຕອບສະໜອງການບໍລິໂພກໃນປີ 2019 ໃຫ້ພຽງພໍກໍຄືຈະຕ້ອງສູ້ຊົນຊຸກຍູ້ການຜະລິດຊີ້ນ,ໄຂ່ ແລະປາໃຫ້ໄດ້ 4,57 ແສນໂຕນເຊັ່ນ: ການຜະລິດຊີ້ນ 1,99 ແສນໂຕນ, ໄຂ່ 43,77 ພັນໂຕນ ແລະປາ 2,15 ແສນໂຕນ, ສະເລ່ຍການບໍລິໂພກຕໍ່ຄົນແມ່ນ 62 ກິໂລຕໍ່ຄົນຕໍ່ປີ.

  ທ່ານ ລຽນ ທິແກ້ວ ກ່າວຕື່ມວ່າ: ສໍາລັບປີ 2019 ຈະສູ້ຊົນຜະລິດເຂົ້າ ເພື່ອສົ່ງອອກໃຫ້ໄດ້ 4 ແສນໂຕນ, ຜະ ລິດພືດເປັນສິນຄ້າຕ່າງໆທີ່ມີທ່າແຮງ ທາງດ້ານການຜະລິດ ແລະການຕະຫຼາດ ເຊັ່ນ: ກາເຟໃຫ້ໄດ້ 1,60 ແສນໂຕນ, ສາ ລີອາຫານສັດ 1 ລ້ານໂຕນ, ອ້ອຍ 1,94 ລ້ານໂຕນ, ຢາສູບ  65,80 ພັນໂຕນ, ມັນ ຕົ້ນ 2,28 ລ້ານໂຕນ, ຖົ່ວດິນ 51,30 ພັນໂຕນ, ຖົ່ວເຫຼືອງ 9,30 ພັນໂຕນ, ໝາກງາ 16,80 ພັນໂຕນ, ໝາກເດືອຍ 2,79 ແສນໂຕນ ແລະພືດອື່ນໆ.

ຂ່າວ: ພິມພອນ

แชร์