ກະຊວງພາຍໃນ ປະກາດການແຕ່ງຕັ້ງ ແລະຊັບຊ້ອນພະນັກງານຂັ້ນກົມ

 ກະຊວງພາຍໃນໄດ້ຈັດພິທີປະກາດການຈັດຕັ້ງຂຶ້ນໃນວັນທີ 11 ສິງຫາ 2021 ໂດຍການເຂົ້າ ຮ່ວມຂອງທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນມີບັນດາຮອງລັດຖະມົນຕີ, ຄະນະຫ້ອງການ, ກົມ, ສະຖາບັນ, ສູນ ແລະພະນັກງານ-ລັດຖະກອນຂອງກະຊວງພາຍໃນເຂົ້າຮ່ວມ.

  ໃນພິທີ ທ່ານ ບຸນຍົງ ສີສຸພັນ ຫົວໜ້າກົມຈັດຕັ້ງ ແລະພະນັກງານໄດ້ຂຶ້ນຜ່ານດໍາລັດຂອງນາຍົກລັດຖະມົນຕີວ່າດ້ວຍການແຕ່ງຕັ້ງພະນັກງານຮັບໜ້າທີ່ໃໝ່ໃນນີ້ໄດ້ແຕ່ງຕັ້ງ ທ່ານ ນາງ ວິໄລທອນ ສູນທອນໄຊມົງຄຸນເປັນຫົວໜ້າຫ້ອງການ, ທ່ານ ສຸລິວັນ ອ່ອນຕາວົງເປັນຫົວໜ້າກົມພັດທະນາການບໍລິຫານລັດ, ທ່ານ ບຸນຈັນ ນິຍະວົງ ເປັນຫົວໜ້າກົມການປົກຄອງທ້ອງຖິ່ນ, ທ່ານ ສິງທະວອນ ດາລາວົງ ເປັນຫົວໜ້າກົມຄຸ້ມຄອງລັດຖະກອນ ແລະທ່ານ ທອງສະຫວັນ ປັນຍາວິຈິດ ເປັນຫົວໜ້າກົມປະເມີນຜົນ ແລະພັດທະນາລັດຖະກອນ.

  ທ່ານລັດຖະມົນຕີກະຊວງພາຍໃນໄດ້ມີຄຳເຫັນໂອ້ລົມຕໍ່ພິທີດັ່ງກ່າວວ່າ: ການປະກາດການຈັດຕັ້ງ ຂອງກະຊວງພາຍໃນໃນຄັ້ງນີ້ເປັນອີກວາລະໜຶ່ງທີ່ມີຄວາມໝາຍຄວາມສຳຄັນເປັນຢ່າງຍິ່ງເພາະເປັນການຢັ້ງຢືນເຖິງການປະຕິບັດຕາມທິດຊີ້ນຳຂອງພັກ ແລະລັດຖະບານ ໂດຍສະເພາະແມ່ນການຈັດຕັ້ງປະຕິ ບັດຕາມມະຕິ, ຄຳສັ່ງ, ກົດໝາຍ, ດຳລັດ ແລະລະບຽບການກ່ຽວກັບວຽກງານພະນັກງານໃຫ້ເຂັ້ມງວດ ແລະເພື່ອໃຫ້ຮັບປະກັນລັກສະນະສືບທອດປ່ຽນ ແທນ, ຕໍ່ເນື່ອງໃນສະເພາະໜ້າ ແລະຍາວນານ, ເພື່ອຍົກສູງຄຸນນະພາບຂອງວຽກງານພະນັກງານ ແລະຖັນແຖວພະນັກງານນໍາພາ-ຄຸ້ມຄອງສືບຕໍ່ປະກອບສ່ວນສໍາຄັນເຂົ້າໃນການເຄື່ອນໄຫວວຽກງານຂະແໜງການພາຍໃນໃຫ້ມີປະສິດທິພາບ ແລະປະສິດທິຜົນ, ການແຕ່ງຕັ້ງ ແລະສັບຊ້ອນພະນັກງານຖືວ່າເປັນວຽກປົກກະຕິ, ຄະນະພັກ-ຄະນະນໍາຂັ້ນເທິງໄດ້ເອົາໃຈໃສ່ ແລະໃຫ້ຄວາມສໍາຄັນຕໍ່ວຽກງານດັ່ງກ່າວພ້ອມທັງເຮັດໃຫ້ວຽກງານໄດ້ຮັບການປັບປຸງດີຂຶ້ນກວ່າ ເກົ່າ.

  ການຄົ້ນຄວ້າແຕ່ງຕັ້ງ ແລະສັບຊ້ອນພະນັກງານຂັ້ນນໍາພາ-ຄຸ້ມ ຄອງຈໍານວນ 5 ທ່ານ ຂອງກະຊວງພາຍໃນນີ້ແມ່ນອີງໃສ່ຄວາມຮຽກຮ້ອງຕ້ອງການຂອງວຽກງານໃນໄລຍະໃໝ່ກໍ່ຄືປ່ຽນແທນຜູ້ທີ່ອອກພັກການຮັບອຸດໜູນບໍານານ ແລະທົດແທນຕໍາແໜ່ງງານທີ່ວ່າງຊຶ່ງບັນດາທ່ານເຫຼົ່ານີ້ລ້ວນແຕ່ເປັນພະນັກ ງານທີ່ມີມາດຕະຖານ ແລະເງື່ອນໄຂຖືກຕ້ອງ, ເໝາະສົມ, ມີຄວາມເປັນເອກະພາບຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ມີຄວາມຮູ້-ຄວາມສາມາດ, ມີຫົວຄິດປະດິດສ້າງ, ມີຄວາມຮັບຜິດຊອບຕໍ່ໜ້າທີ່ວຽກງານສູງ ໂດຍຜ່ານການທົດສອບຝຶກຝົນຫຼໍ່ຫຼອມໃນວຽກງານຕົວຈິງ, ເປັນຜູ້ທີ່ໄດ້ຮັບຄວາມໄວ້ວາງໃຈຈາກການຈັດຕັ້ງພ້ອມທັງໄດ້ປະກອບສ່ວນເຮັດໃຫ້ການຈັດຕັ້ງມີຄວາມເຂັ້ມແຂງ, ເປັນຜູ້ທີ່ມີຜົນງານທີ່ໂດດເດັ່ນ ແລະມີຄວາມເປັນແບບຢ່າງນໍາໜ້າໃນຂະບວນການຕ່າງໆຂອງພັກ-ລັດອີກດ້ວຍ.

-----

ໜັງສືພິມ ເສດຖະກິດ-ສັງຄົມ

แชร์