ຫາລືຫຼາຍຝ່າຍກ່ຽວກັບຄວາມຮຸນແຮງບົນພື້ນຖານທາງເພດ

    ໃນທ້າຍອາທິດຜ່ານມາທີ່ນະຄອນຫຼວງວຽງຈັນ, ອົງການສະຫະປະຊາຊາດກອງທຶນສຳລັບປະຊາກອນ (UNFPA) ແລະກະຊວງສາທາລະນະສຸກຮ່ວມມືກັບຫຼາຍ ພາກສ່ວນທີ່ເຮັດວຽກກ່ຽວກັບການຕ້ານຄວາມຮຸນແຮງບົນພື້ນຖານທາງເພດ, ຊຶ່ງປະກອບມີສະຫະພັນແມ່ຍິງລາວ, ຕຳຫຼວດ, ສານປະຊາຊົນ ແລະພະແນກສັງຄົມສົງ ເຄາະອື່ນໆ ໄດ້ປຶກສາຫາລືກ່ຽວກັບກົນໄກປະສານງານ, ສົ່ງຕໍ່ ແລະການເກັບກຳຕົວເລກຜູ້ຖືກຄວາມຮຸນແຮງກັບພາກສ່ວນທີ່ກ່ຽວຂ້ອງໃຫ້ມີຄວາມເປັນເອກະພາບເປັນຄັ້ງທຳອິດກ່ຽວກັບການຕອບໂຕ້ຕໍ່ຄວາມຮຸນແຮງບົນພື້ນຖານທາງເພດ.

   ກົນໄກການຕອບໂຕ້ຕໍ່ຄວາມຮຸນແຮງບົນພື້ນຖານທາງເພດແບບຫຼາຍຂະແໜງການນີ້ແມ່ນສ່ວນໜຶ່ງຂອງບໍລິການທີ່ຈຳເປັນ ແລະເລັ່ງດ່ວນ (ESP) ເພື່ອເປັນ ການປ້ອງກັນ ແລະຕອບສະໜອງຕໍ່ຄວາມຮຸນແຮງຕໍ່ກັບແມ່ຍິງ ແລະເດັກຍິງ. ESP ແມ່ນອຸປະກອນທີ່ຊ່ວຍຄົ້ນຫາການບໍລິການທີ່ສຳຄັນໃຫ້ແມ່ຍິງ ແລະເດັກຍິງທຸກຄົນຜູ້ທີ່ໄດ້ປະເຊີນກັບຄວາມຮຸນແຮງບົນພື້ນຖານທາງເພດລວມເຖິງການບໍລິການທີ່ສະໜອງໂດຍໜ່ວຍງານສາທາລະນະສຸກ, ພະແນກປະກັນສັງຄົມ, ຂະແໜງປ້ອງກັນຄວາມສະຫງົບ ແລະ ຂະແໜງຍຸຕິທຳ, ຊຶ່ງການທີ່ຈະປະຕິບັດ ESP ໄດ້ນັ້ນຕ້ອງມີການປະສານງານຮ່ວມຈາກຫຼາຍຂະແໜງການໃນການຕອບໂຕ້ຄວາມຮຸນແຮງບົນພື້ນຖານທາງເພດ.

   ທ່ານ ນາງ ມາຣຽມ ຄານ ຜູ້ຕາງໜ້າອົງການ UNFPA ປະຈຳ ສປປ ລາວ ໄດ້ກ່າວ: ຂໍສະແດງຄວາມຍິນດີກັບທາງລັດຖະບານໃນການສືບຕໍ່ເຮັດຕາມຄຳໝັ້ນສັນ ຍາໃນການຢຸດຢັ້ງຄວາມຮຸນແຮງຕໍ່ແມ່ຍິງ, ຊຶ່ງຄຳສັນຍາດັ່ງກ່າວໄດ້ຮັບຜົນສຳເລັດ ໂດຍຜ່ານການຮ່ວມມືຈາກຄູ່ຮ່ວມມືຫຼາກຫຼາຍພາກສ່ວນ, ການປັບປຸງ ນະໂຍບາຍ ດ້ານກົດໝາຍ ແລະເສີມສ້າງຄວາມສາມາດຂອງບຸກຄະລາກອນທີ່ກ່ຽວຂ້ອງ ແລະຂໍຊົມເຊີຍຜົນງານຂອງການນຳໃນການແກ້ໄຂບັນຫາຄວາມຮຸນແຮງຕໍ່ແມ່ຍິງ ແລະ ເດັກຍິງ, ຊຶ່ງເປັນບັນຫາລະດັບໂລກ ແລະລະດັບຊາດອີກດ້ວຍ.

   ການຕອບສະໜອງຂອງຂະແໜງສາທາລະນະສຸກຕໍ່ຄວາມຮຸນແຮງບົນພື້ນຖານທາງເພດຖືວ່າເປັນເລື່ອງທີ່ສຳຄັນເພາະທາງພາກສ່ວນສາທາລະນະສຸກແມ່ນເປັນຈຸດໃຫ້ການຊ່ວຍເຫຼືອດ່ານທຳອິດສຳລັບແມ່ຍິງທີ່ເປັນຜູ້ເຄາະຮ້າຍຈາກການນຳໃຊ້ຄວາມຮຸນແຮງທີ່ພວມຊອກຫາການຊ່ວຍເຫຼືອ ແລະ ປິ່ນປົວ. ນອກຈາກນີ້, ການຕອບສະໜອງການໃຫ້ບໍລິການດ້ານສຸຂະພາບທີ່ມີຄຸນນະພາບນັ້ນຖືເປັນສິ່ງທີ່ສຳຄັນຫຼາຍໃນການເພີ່ມຄວາມໝັ້ນໃຈວ່າທາງຜູ້ໄດ້ຮັບຜົນກະທົບຈະສາມາດເຂົ້າເຖິງມາດຕະ ຖານສຸຂະພາບສູງທີ່ສຸດ ແລະພະນັກງານສາທາລະນະສຸກ (ແພດ, ຜະດຸງຄັນ, ໝໍ ແລະຜູ້ອື່ນໆ) ແມ່ນຜູ້ທຳອິດທີ່ທາງຜູ້ໄດ້ຮັບຜົນກະທົບໄດ້ຕິດຕໍ່ເຂົ້າເຖິງ. ພ້ອມກັນນີ້, ບົດບາດຂອງພາກສ່ວນສາທາລະນະສຸກຍັງມີຄວາມສຳຄັນໃນການຮັບປະກັນວ່າທາງຜູ້ໄດ້ຮັບຜົນກະທົບສາມາດເຂົ້າເຖິງລະບົບການຊ່ວຍເຫຼືອແບບຄົບວົງຈອນ.

    ອົງການ UNFPA ໄດ້ຮ່ວມມືນຳລັດຖະບານລາວໃນການຈັດຕັ້ງກົນໄກປະສານງານລະດັບຊາດ ແລະການສົ່ງຕໍ່ຂໍ້ມູນກ່ຽວກັບການນຳໃຊ້ຄວາມຮຸນແຮງບົນພື້ນຖານ ທາງເພດ ແລະການສ້າງຄວາມເຂັ້ມແຂງໃຫ້ແກ່ພະນັກງານສາທາລະນະສຸກ. ການມີສ່ວນຮ່ວມໃນແຕ່ລະຢ່າງແມ່ນກົງກັບຂໍ້ຕົກລົງການຮ່ວມມືສາກົນທີ່ ສປປ ລາວ ໄດ້ຕົກລົງໄວ້, ລວມເຖິງຄຳໝາຍໝັ້ນຕໍ່ກັບສົນທິສັນຍາຊີດໍ ແລະແຜນປະຕິບັດງານ ວ່າດ້ວຍປະຊາກອນ ແລະການພັດທະນາ (I CPD25) ລວມກັບການເຂົ້າເຖິງ ໃນແບບຂັ້ນເທິງລົງລຸ່ມ ແລະ ລຸ່ມຂຶ້ນເທິງການສ້າງຄວາມສາມາດໃຫ້ແກ່ພະນັກງານຜູ້ຮັບຜິດຊອບໃນວຽກງານດ້ານນີ້ໃນການສືບຫາ ແລະ ປ້ອງກັນຄວາມຮຸນແຮງບົນ ພື້ນຖານທາງເພດ. ພ້ອມກັນນັ້ນ, ສ້າງຄວາມຮັບຮູ້ດ້ານສິດທິໃຫ້ແກ່ຜູ້ທີ່ຖືສິດທິໃຫ້ເຂົາຮູ້ຈັກວິທີການໃນການນຳໃຊ້ສິດທິຖືກຕ້ອງຂອງຕົນ.

แชร์