ເຄິ່ງປີຈຳປາສັກຂື້ນທະບຽນລົດໃໝ່ 4 ພັນກວ່າຄັນ

ຂ່າວ: ໂພທິລາດ

   ເຖິງແມ່ນວ່າໃນໄຍລະຜ່ານມາກໍ່ຄືປະຈຸບັນຫຼາຍຂະແໜງການຈະໄດ້ຮັບຜົນກະທົບຈາກການລະບາດຂອງເຊື້ອພະຍາດໂຄວິດ-19 ເຮັດໃຫ້ການຈັດຕັ້ງປະຕິບັດບັນດາຂີດເປົ້າໝາຍບໍ່ສໍາເລັດຕາມທີ່ກຳນົດໄວ້ເຊັ່ນດຽວກັນກັບກອງຄຸ້ມກອງພາຫະນະ ແລະການຂັບຂີ່ແຂວງຈໍາປາສັກກໍ່ແມ່ນອີກຂະແໜງການໜຶ່ງທີ່ໄດ້ຮັບຜົນກະທົບແຕ່ກໍ່ຍັງຮັກສາການບໍລິຫານຈັດການໃນລະດັບດີ 6 ເດືອນຕົ້ນປີສາມາດຂຶ້ນທະບຽນລົດໃໝ່ໄດ້ 4 ພັນກວ່າຄັນ ແລະສາມາດສ້າງລາຍຮັບໄດ້ 1,19 ຕື້ກີບ.

   ທ່ານ ສຸກສະຫວັນ ນິລາວົງ ຫົວໜ້າກອງຄຸ້ມຄອງພາຫະນະ ແລະການຂັບຂີ່ແຂວງຈຳປາສັກ, ໄດ້ໃຫ້ສຳພາດຕໍ່ນັກຂ່າວໜັງສືພິມເສດຖະກິດ-ສັງຄົມເມື່ອບໍ່ດົນມານີ້ໃຫ້ຮູ້ວ່າ: ກອງຄຸ້ມຄອງຂອງພວກເຮົາແມ່ນໜ່ວຍວິຊາການໜຶ່ງທຽບເທົ່າກັບຂະແໜງການອື່ນໆ ທີ່ສັງກັດໃນໂຄງປະກອບການຈັດຕັ້ງຂອງພະແນກໂຍທາ ແລະຂົນສົ່ງແຂວງຈຳປາສັກ, ຈັດຕັ້ງວຽກງານຂຶ້ນທະບຽນຍານພາຫະນະ, ກວດກາເຕັກນິກ, ສອບເສັງການຂັບຂີ່ຂອງພາຫະນະກົງຈັກທຸກຊະນິດຢູ່ພາຍໃນແຂວງຈໍາປາສັກ.

  ຊຶ່ງໃນໄລຍະ 6 ເດືອນຕົ້ນປີ 2021 ຜ່ານມາສາມາດຈັດຕັ້ງປະຕິບັດວຽກງານວິຊາສະເພາະຂອງແຕ່ລະກຸ່ມວຽກໄດ້ມີຜົນສຳເລັດຢ່າງດີ, ເຖິງແມ່ນວ່າຈະຢູ່ໃນໄລຍະພະຍາດໂຄວິດ-19 ລະບາດ, ໃນຊ່ວງທີ່ພະຍາດລະບາດທາງກອງຖ້າຄອງພວກເຮົາກໍ່ຍັງໄດ້ຕັ້ງໜ້າ ແລະສືບຕໍ່ຈັດຕັ້ງປະຕິບັດວຽກງານວິຊາສະເພາະກໍ່ຄືວຽກງານການບໍລິການໃຫ້ພໍ່ແມ່ປະຊາຊົນນັກທຸລະກິດ, ພະນັກງານ, ທະຫານຕຳຫຼວດທີ່ເຂົ້າມາໃຊ້ບໍລິການໃນກອງຄຸ້ມຄອງພາຫະນະ ແລະການຂັບຂີ່, ຊຶ່ງພວກທາງພວກເຮົາໄດ້ມີການເຂັ້ມງວດກ່ຽວກັບການສະກັດກັ້ນ ແລະຕ້ານການແຜ່ລະບາດຂອງເຊື້ອພະຍາດຢ່າງມີສະຕິສູງ ແລະມີອຸປະກອນເຈວລ້າງມື, ຜ້າອັດປາກວາງໄວ້ຕາມແຕ່ລະຈຸດທີ່ມີການໃຫ້ບໍລິການສຳລັບການຂຶ້ນທະບຽນພາຫະນະໃນ 6 ເດືອນຕົ້ນປີຜ່ານມາໄດ້ທັງໝົດ 4.233 ຄັນ, ການສອບເສັງການຂັບຂີ່ໄດ້ 713 ເທື່ອຄົນ,ການປ່ຽນ ແລະຍົກຍ້າຍໃບຂັບຂີ່ໄດ້ 1.081 ໃບ ແລະວຽກງານກວດກາເຕັກນິກໄດ້ 9.525 ຄັນ.

  ໃນນັ້ນສາມາດສ້າງລາຍຮັບໄດ້ໄດ້ທັງໝົດກວ່າລ້ານກີບ,ທຽບໃສ່ແຜນການປະຕິບັດໄດ້ກວ່າ 44%, ໃນນັ້ນລາຍຮັບໄດ້ຈາກຄ່າທຳນຽມຕ່າງໆ,ລາຍຮັບຈາກຄ່າບໍລິການຕ່າງໆ, ລາຍຮັບຈາກຄ່າພິມບິນແບບຟອມ (ຂອງກົມ) ແລະລາຍຮັບຈາກການບໍລິການອື່ນໆອີກຈຳນວນໜຶ່ງ.

แชร์