ຈີນ ຊ່ວຍວັກແຊງລາວສູ້ໂຄວິດອີກ 1 ລ້ານໂດສ

    ນໍ້າໃຈລັດຖະບານກໍ່ຄືປະຊາຊົນຈີນໄດ້ທະຍອຍໃຫ້ການຊ່ວຍເຫຼືອປະຊາຊົນລາວໃນການສະກັດກັ້ນ ແລະປ້ອງກັນພະຍາດໂຄວິດ-19 ຢ່າງຕໍ່ເນື່ອງຫຼ້າສຸດໄດ້ມອບວັກແຊງອີກຈຳນວນ 1 ລ້ານໂດສ ຊຶ່ງຈະເປັນການປະກອບສ່ວນສຳຄັນເຮັດໃຫ້ ສປປ ລາວ ສາມາດບັນລຸເປົ້າໝາຍການສັກຢາວັກແຊງໃຫ້ພົນລະເມືອງລາວໄດ້ 50% ຂອງພົນລະເມືອງພາຍໃນປີ 2021 ນີ້. 

   ພິທີມອບ-ຮັບວັກແຊງດັ່ງກ່າວຈັດຂຶ້ນວັນທີ 11 ສິງຫາ 2021, ທີ່ກະຊວງສາທາລະນະສຸກຕາງໜ້າລັດຖະບານລາວກ່າວຮັບໂດຍທ່ານ ພັນຄຳ ວິພາວັນ, ນາຍົກລັດຖະມົນຕີແຫ່ງ ສປປ ລາວ ແລະຕາງໜ້າລັດຖະບານ ສປ ຈີນ ກ່າວມອບໂດຍທ່ານ ຈ່ຽງ ຈາຍຕຸ່ງ, ເອກອັກ ຄະລັດຖະທູດ ແຫ່ງ ສປ ຈີນ ປະຈໍາສປປ ລາວ, ໂດຍມີລັດຖະມົນຕີ, ຮອງລັດຖະມົນຕີ ແລະພະນັກງານຈາກພາກສ່ວນທີ່ກ່ຽວຂ້ອງສອງຝ່າຍ ລາວ-ຈີນ ເຂົ້າຮ່ວມ.

    ທ່ານ ພັນຄຳ ວິພາວັນ ໄດ້ຕາງໜ້າໃຫ້ພັກ-ລັດຖະບານ ແລະປະຊາຊົນລາວສະແດງຄວາມຂອບໃຈເປັນຢ່າງສູງຕໍ່ພັກ, ລັດຖະບານ ແລະປະຊາຊົນຈີນອ້າຍນ້ອງທີ່ໄດ້ສົ່ງວັກແຊງປ້ອງກັນພະຍາດໂຄວິດ-19 ຈຳນວນ 1 ລ້ານໂດສ ມາຊ່ວຍ ສປປ ລາວ ໃນຄັ້ງນີ້ເພື່ອນໍາໃຊ້ເຂົ້າໃນການຕ້ານ ແລະສະກັດກັ້ນການ ແຜ່ລະບາດຂອງພະຍາດໂຄວິດ-19 ຢູ່ ສປປ ລາວ.

    ການຊ່ວຍເຫຼືອໃນຄັ້ງນີ້ໄດ້ສະແດງໃຫ້ເຫັນເຖິງນໍ້າໃຈເອື້ອເຟື້ອເພື່ອແຜ່ຂອງພັກ, ລັດຖະບານ ແລະປະຊາຊົນຈີນທີ່ມີຕໍ່ລັດຖະບານ ແລະປະຊາຊົນລາວ ແລະເປັນການຢືນຢັນເຖິງການເປັນເພື່ອນມິດສະຫາຍທີ່ເປັນມູນເຊື້ອ, ສາຍພົວພັນແບບຄູ່ຮ່ວມມືຍຸດທະສາດຮອບດ້ານໝັ້ນຄົງຍາວນານ ຕາມທິດ 4ດີ ແລະການເປັນຄູ່ຮ່ວມຊະຕາກໍາລາວຈີນ, ຈີນ-ລາວ, ຊຶ່ງປີນີ້ເປັນປີຄົບຮອບວັນສ້າງຕັ້ງສາຍພົວພັນການທູດລະຫວ່າງ ສປປ ລາວ ແລະ ສປ ຈີນ ຄົບຮອບ 60 ປີ,ຊຶ່ງເປັນປີມິດຕະພາບລະຫວ່າງ ສອງປະເທດທີ່ນັບມື້ນັບໄດ້ຮັບການເສີມຂະຫຍາຍ ແລະເຂົ້າສູ່ລວງເລິກຢ່າງບໍ່ຢຸດຢັ້ງ. 

  ນອກຈາກນີ້,ທ່ານ ພັນຄຳ ວິພາວັນ ຍັງໄດ້ຕີລາຄາສູງຕໍ່ການຊ່ວຍເຫຼືອອັນສະເໝີຕົ້ນສະເໝີປາຍບໍ່ວ່າຍາມໃດກໍ່ມີຄວາມເປັນຫ່ວງເປັນໃຍຕໍ່ ສປປ ລາວ ໂດຍສະເພາະໃນສະພາບປະຈຸບັນທີ່ ສປປ ລາວ ກຳລັງສຸມໃສ່ຮັບມືກັບແຮງງານລາວທີ່ຕິດເຊື້ອມາຈາກຕ່າງປະເທດມີຈຳນວນຫຼາຍໃນແຕ່ລະວັນໃນຂະນະດຽວກັນ, ລັດຖະບານ ແລະປະຊາຊົນຈີນກໍ່ໄດ້ຮັບຜົນກະທົບຈາກພະຍາດລະບາດດັ່ງກ່າວແຕ່ກໍ່ໄດ້ບິແບ່ງການຊ່ວຍເຫຼືອອັນລໍ້າຄ່າມາໃຫ້ແກ່ລັດຖະບານ ແລະປະຊາຊົນລາວຕະຫຼອດມາ.

   ພ້ອມນັ້ນ, ການສັກຢາວັກແຊງເພື່ອປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ແມ່ນຄວາມຈຳເປັນໃນການປ້ອງກັນຊີວິດຂອງປະຊາຊົນລາວໃນຂອບເຂດທົ່ວປະເທດຊຶ່ງການຊ່ວຍເຫຼືອໃນຄັ້ງນີ້ຈະເປັນການປະກອບສ່ວນສຳຄັນເຮັດໃຫ້ ສປປ ລາວ ສາມາດບັນລຸເປົ້າໝາຍການສັກຢາວັກແຊງໃຫ້ພົນລະເມືອງລາວໄດ້ 50% ຂອງພົນລະເມືອງພາຍໃນປີ 2021 ນີ້.

   ນີ້ແມ່ນການຊ່ວຍເຫຼືອວັກແຊງຂອງ ສປ ຈີນ ໃຫ້ແກ່ ສປປ ລາວ ເປັນຄັ້ງທີ 5 ຊຶ່ງມີຈໍານວນທັງໝົດເກືອບ 3 ລ້ານໂດສ.

แชร์