ຄຳມ່ວນ ຫາລືວຽກງານການປ້ອງກັນພະຍາດໂຄວິດ

    ວັນທີ 6 ສິງຫາ 2021 ທີ່ຫ້ອງວ່າການແຂວງຄຳມ່ວນໄດ້ມີກອງປະຊຸມປຶກສາຫາລືວຽກງານປ້ອງກັນ, ຄວບຄຸມ ແລະແກ້ໄຂການແຜ່ລະບາດຂອງພະຍາດໂຄວິດ-19 ພ້ອມທັງປັບປຸງການແຕ່ງຕັ້ງຄະນະສະເພາະກິດ, ຄະນະກອງເລຂາຊຸດໃໝ່ເພື່ອເພີ່ມທະວີ ແລະຍົກສູງຄວາມຮັບຜິດຊອບຂອງຄະນະພັກ, ອົງການປົກຄອງ ຕໍ່ວຽກງານປ້ອງກັນການແຜ່ລະບາດຂອງພະຍາດໂຄວິດ-19 ໂດຍມີທ່ານ ວົງເພັດ ຈິດປັນຍາ ຮອງເລຂາພັກແຂວງຄຳມ່ວນ, ມີບັນດາທ່ານໃນຄະນະສະເພາະກິດ ແລະຄະນະກອງເລຂາຂັ້ນແຂວງເຂົ້າຮ່ວມ.

   ທ່ານ ດຣ ພາສຸກ ຄຳມະນີທອງ ຫົວໜ້າກອງເລຂາຄະນະສະເພາະກິດຂັ້ນແຂວງໄດ້ລາຍງານສະພາບການຈັດຕັ້ງປະຕິບັດວຽກງານປ້ອງກັນ, ຄວບຄຸມ ແລະແກ້ໄຂ ການແຜ່ລະບາດຂອງພະຍາດໂຄວິດ-19 ໃນໄລຍະຜ່ານມາ, ເລີ່ມແຕ່ວັນທີ 1 ມັງກອນ ຫາ 5 ສິງຫາ 2021 ແຂວງຄໍາມ່ວນແມ່ນມີແຮງງານທີ່ເຂົ້າສູນຈໍາກັດບໍລິເວນທັງໝົດ 3.307 ຄົນ. ໃນນັ້ນຈໍາກັດຄົບ 14 ວັນ ອອກຈາກສູນແລ້ວ 2.268 ຄົນ, ຍັງສືບຕໍ່ກັກກັນ 1.039 ຄົນ ແລະມີຈຳນວນຜູ້ຕິດເຊື້ອສະສົມລວມທັງໝົດ 219 ຄົນ ໃນນັ້ນປິ່ນປົວຫາຍດີແລ້ວ 66 ຄົນ, ຍັງສືບຕໍ່ປິ່ນປົວ 153 ຄົນ. ສຳລັບວຽກງານການສັກວັກແຊງແມ່ນໄດ້ເລີ່ມແຕ່ວັນທີ 19 ມີນາ ຫາ ວັນທີ 18 ກໍລະ ກົດ 2021 ສາມາດສັກໄດ້ແລ້ວໃນເຂັມທີ 1 ຈຳນວນ 45.328 ຄົນ ແລະເຂັມທີ 2 ຈຳນວນ 32.594 ຄົນ ໃນນີ້ແມ່ນວັກແຊງປະເພດຊີໂນຟາມ ແລະອັດສຕາເຊັນນີກາ.ສ່ວນວັກຊິນ ຈອນສັນ ແອນ ຈອນສັນ ຈຳນວນ 62.800 ໂດສ ທີ່ແຂວງຫາກໍ່ໄດ້ຮັບຈາກສູນກາງແມ່ນຈະເລີ່ມສັກໃນວັນທີ 9 ສິງຫາ ເປັນຕົ້ນໄປ. 

   ໂອກາດດຽວກັນບັນດາຜູ້ເຂົ້າຮ່ວມກໍ່ໄດ້ປຶກສາຫາລືປະກອບຄຳຄິດຄຳເຫັນບັນດາວຽກງານທີ່ຈະສືບຕໍ່ຈັດຕັ້ງປະຕິບັດໃນຕໍ່ໜ້າໂດຍສະເພາະວຽກງານໂຄສະນາປະຊາ ສຳພັນ, ເຜີຍແຜ່ບັນດານິຕິກຳຕ່າງໆຂອງຂັ້ນເທິງວາງອອກ, ການປຸກລະດົມການປະກອບສ່ວນຊ່ວຍເຫຼືອຈາກສັງຄົມ, ພາກລັດ ແລະເອກະຊົນເພື່ອນຳໃຊ້ເຂົ້າໃນ ວຽກງານຕ້ານພະຍາດໂຄວິດ-19, ການເພີ່ມທະວີໃນການຄຸ້ມຄອງແຮງງານທີ່ກັບເຂົ້າມາຕາມດ່ານຕ່າງໆແມ່ນໃຫ້ປະຕິບັດຕາມຕະການຢ່າງຖືກຕ້ອງ ແລະເຂັ້ມງວດ, ການປຶກສາຫາລືເຖິງເນື້ອໃນແຈ້ງການເພື່ອກຳນົດບັນດາມາດຕະການທີ່ຈະຕ້ອງສືບຕໍ່ຈັດຕັ້ງປະຕິບັດເພື່ອເຮັດໃຫ້ເນື້ອໃນມີຄວາມເໝາະສົມ, ຖືກຕ້ອງ, ສອດຄ່ອງກັບ ສະພາບຂອງແຂວງ ແລະຮັບປະກັນບໍ່ໃຫ້ມີການແຜ່ລະບາດຢູ່ໃນຊຸມຊົນ.

แชร์