5 ໜ່ວຍພັກ ຍທຂ ຫຼວງພະບາງຮັບນາມມະຍົດ ເປັນໜ່ວຍພັກປອດໃສເຂັ້ມແຂງໜັກແໜ້ນ

ຂ່າວ: ສີສຸວັນ 

     5 ໜ່ວຍພັກທີ່ຂຶ້ນກັບພະແນກໂຍທາທິການ ແລະຂົນສົ່ງ ແຂວງຫຼວງພະບາງ ໄດ້ຮັບນາມມະຍົດເປັນໜ່ວຍພັກປອດໃສ, ເຂັ້ມແຂງ, ໜັກແໜ້ນຊຶ່ງໄດ້ຈັດພິທີ ມອບຮັບຈັດຂຶ້ນໃນວັນທີ 7 ສິງຫາ 2021 ທີ່ຫ້ອງປະຊຸມຂອງພະແນກໂຍທາແຂວງໂດຍການເປັນປະທານຂອງ ສະຫາຍ ສຸກັນ ບຸນຍົງ ຮອງເລຂາພັກແຂວງ, ມີສະ ຫາຍ ບຼົ່ງວ່າງ ຫວ່າງເຈຍຊ່າ ເລຂາໜ່ວຍພັກພະແນກ ຍທຂ,ມີຮອງເລຂາ,ແຂກຖືກເຊີນຈາກໜ່ວຍພັກອ້ອມຂ້າງ ແລະສະມາຊິກພັກພາຍ ໃນ 5 ໜ່ວຍພັກເຂົ້າຮ່ວມ.

   ສະຫາຍ ບຼົ່ງວ່າງ ຫວ່າງເຈຍຊ່າ ເລຂາໜ່ວຍພັກພະແນກ ຍທຂ ໄດ້ຂຶ້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດວຽກງານຂອງຄະນະພັກຮາກຖານພະແນກ ຍທຂ ປະ ຈໍາປີ 2020 ແລະວາງທິດທາງແຜນການປະຈໍາປີ 2021 ຜ່ານການຈັດຕັ້ງປະຕິບັດວຽກງານໄລຍະຜ່ານມາໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານ ເປັນຕົ້ນແມ່ນວຽກງານດ້ານການເມືອງ-ແນວຄິດສະມາຊິກພັກແຕ່ລະສະຫາຍໄດ້ມີແນວຄິດອຸ່ນອ່ຽນທຸ່ນທ່ຽງ, ກໍາແໜ້ນຕໍ່ແນວທາງ ແລະ ອຸດົມການຂອງພັກ, ມີຄຸນສົມບັດສິນທໍາປະຕິວັດ, ມີຄວາມສາມັກ, ມີແບບແຜນເຮັດວຽກລະອຽດ, ຮູ້ຈໍາແນກມິດສັດຕູ ແລະເຮັດຫຼ້ອນໜ້າທີ່ຂັ້ນເທິງມອບ ໝາຍໃຫ້. ສໍາລັບໜ່ວຍພັກຂອງ ພະແນກ ຍທຂ ມີສະມາຊິກພັກທັງທັງໝົດ 115 ສະຫາຍ, ຍິງ 28 ສະຫາຍ ໃນນັ້ນສໍາຮອງ 19 ສະຫາຍ, ຍິງ 6 ສະຫາຍ, ໄດ້ຊີ້ນໍາໆພາ 5 ໜ່ວຍພັກຄື: ໜ່ວຍພັກຈັດຕັ້ງ ແລະບໍລິຫານ, ໜ່ວຍພັກໂຍທາທິການ,ໜ່ວຍພັກຂົນສົ່ງ,ໜ່ວຍພັກສະໜາມບິນ ແລະໜ່ວຍພັກການບິນ ແລະໃນ 1 ປີຜ່ານມາໜ່ວຍພັກພະແນກ ຍທຂ ໄດ້ປັບປຸງການບໍລິການຫັນໄປສູ່ຄວາມທັນສະໄໝ ແລະ ວ່ອງໄວຊຶ່ງໄດ້ເສີມຂະຫຍາຍບົດບາດຄວາມເປັນເຈົ້າການປຸກລະດົມມະຫາຊົນຈັດຕັ້ງປະຕິບັດວຽກງານ ຕ່າງໆໄດ້ດີຈຶ່ງເຮັດໃຫ້ວຽກງານພະແນກ ຍທຂ ມີຄວາມກ້າວໜ້າ ແລະປະສົບຜົນສໍາເລັດເປັນກ້າວໆ ມາສາມາດຕີລາຄາຄັດເລືອກເອົາບຸກຄົນດີເດັ່ນໄດ້ 100% ຈຶ່ງໄດ້ຮັບນາມມະຍົດເປັນໜ່ວຍພັກປອດໃສ,ເຂັ້ມແຂງໜັກແໜ້ນໃນປີ 2020 ແລະເພື່ອໃຫ້ພິທີມອບຮັບອັນມີຄວາມໝາຍນັ້ນ ສະຫາຍ ສຸກັນ ບຸນຍົງ ຮອງເລຂາພັກແຂວງໄດ້ເປັນກຽດມອບໃບຢັ້ງຢືນໃຫ້ທັງ 5 ໜ່ວຍພັກ ແລະມີຕາງໜ້າເລຂາແຕ່ລະໜ່ວຍພັກຊັບປ່ຽນກັນຂຶ້ນຮັບ.

   ໂອກາດດຽວກັນນີ້ ສະຫາຍ ສຸກັນ ບຸນຍົງ ໄດ້ສະແດງຄວາມຊົມເຊີຍຕໍ່ຜົນງານທີ່ຄະນະໜ່ວຍພັກແຕ່ລະໜ່ວຍຍາດມາໄດ້ໃນໄລຍະຜ່ານມາພ້ອມເນັ້ນໜັກໃຫ້ບັນດາສະມາຊິກພັກທຸກສະຫາຍຈົ່ງສືບຕໍ່ຮັກສາມູນເຊື້ອຜົນງານທີ່ຍາດມາໄດ້, ເອົາໃຈໃສ່ເພີ່ມທະວີຄວາມສາມັກຄີ, ບຸກບື່ນຕໍ່ໜ້າທີ່ວຽກງານທີ່ພັກລັດມອບໝາຍໃຫ້ຕ້ອງໄດ້ພ້ອມກັນສູ້ຊົນຜ່ານຜ່າສ້າງຜົນງານໃຫ້ສໍາເລັດຍິ່ງໃຫຍ່ກວ່າເກົ່າ.

แชร์