ລັດໃຊ້ແລ້ວ 15,82 ຕື້ກີບ ຮັບແຮງງານລາວຄືນປະເທດ

ຂ່າວ: ສານ ຮສສ 

ໃນວັນທີ 9 ສິງຫາ 2021 ໃນວາລະດໍາເນີນກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ, ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ຂຶ້ນຊີ້ແຈງຕໍ່ຄໍາຖາມເຈາະຈີ້ມກ່ຽວກັບບັນຫາແຮງງານ ແລະການຮັບມືກັບແຮງງານທີ່ກັບມາຈາກຕ່າງປະເທດ, ໂດຍໄດ້ຮັບການຊີ້ນໍາເພື່ອຮັບມື ແລະແກ້ໄຂບັນຫາດັ່ງກ່າວຈາກທ່ານນາຍົກ ແລະ ຮອງນາຍົກແລ້ວຜັນຂະຫຍາຍເປັນແຜນ ແລະມາດຕະການຈັດຕັ້ງປະຕິບັດທັງສະເພາະໜ້າ ແລະຍາວນານ.

   ທ່ານ ນາງ ໃບຄຳ ຂັດທິຍະ ໄດ້ໃຫ້ຮູ້ວ່າ: ກົມການເມືອງສູນກາງພັກ, ລັດຖະບານໄດ້ມີຄວາມເປັນຫວ່ງເປັນໄຍເປັນພິເສດຕໍ່ການກັບຄືນມາຂອງແຮງງານລາວ, ໂດຍໄດ້ໃຫ້ການຊີ້ນໍາຢ່າງໃກ້ຊິດທີ່ສຸດຕໍ່ກະຊວງ, ຂະແໜງການທີ່ກ່ຽວຂ້ອງລວມທັງອົງການປົກຄອງທ້ອງຖິ່ນແຕ່ລະຂັ້ນ, ກ່ອນໜ້ານີ້ກະຊວງ ຮສສ ກໍ່ໄດ້ຮັບການຊີ້ນໍາເພື່ອຮັບມື ແລະແກ້ໄຂບັນຫາດັ່ງກ່າວຈາກກອງປະຊຸມທ່ານນາຍົກ ແລະຮອງນາຍົກ, ຈາກນັ້ນກໍ່ໄດ້ຮັບການຊີ້ນໍາຈາກກອງປະຊຸມກົມການເມືອງສູນກາງພັກ ແລະໄດ້ນຳມາ ຜັນຂະຫຍາຍເປັນແຜນ ແລະມາດຕະການຈັດຕັ້ງປະຕິບັດທັງສະເພາະໜ້າ ແລະຍາວນານເປັນຕົ້ນແມ່ນໄດ້ຈັດກອງປະຊຸມວິຊາການຮ່ວມກັບຝ່າຍໄທ ແລະພົບປະກັບທ່ານທູດໄທ ປະຈໍາ ສປປ ລາວ.

    ໂດຍໄດ້ສະເໜີໃຫ້ຝ່າຍໄທເບິ່ງແຍງ ແລະຊ່ວຍເຫຼືອແຮງງານລາວທີ່ຍັງຕົກຄ້າງຢູ່ໄທໂດຍໃຫ້ຝ່າຍໄທສະໜອງຂໍ້ມູນຜູ້ອອກແຮງງານທີ່ເຮັດວຽກຢູ່ປະເທດໄທທີ່ຈະກັບຄືນປະເທດລາວໃຫ້ພາກສ່ວນກ່ຽວຂ້ອງຂອງລາວຊາບລ່ວງໜ້າ;ຝ່າຍໄທຕ້ອງອໍານວຍຄວາມສະດວກໃຫ້ຜູ້ແຮງງານລາວທີ່ເຮັດວຽກຢູ່ໄທໄດ້ເຂົ້າເຖິງການສັກຢາວັກແຊງຄືກັນກັບພົນລະເມືອງຂອງໄທ.

   ສໍາລັບແຮງງານລາວທີ່ໝົດສັນຍາທີ່ຈະສົ່ງກັບບ້ານຕ້ອງໄດ້ກວດຫາເຊື້ອໂຄວິດ-19, ຖ້າຕິດເຊື້ອໂຄວິດ-19 ຝ່າຍ ໄທຕ້ອງປິ່ນປົວໃຫ້ເຊົ່າ ແລະກັກກັນຕາມກໍານົດເວລາຂອງຄະນະສະເພາະກິດຝ່າຍໄທແລ້ວຈຶ່ງສົ່ງກັບປະເທດລາວ, ໂດຍຜ່ານດ່ານສາກົນຕາມລະບຽບກົດໝາຍຂອງສອງຝ່າຍ ແລະຜູ້ອອກແຮງງານໃນລະບົບທີ່ເຂົ້າປະກັນສັງຄົມຕ້ອງໄດ້ຮັບນະໂຍບາຍເທົ່າທຽມກັບຜູ້ອອກແຮງງານຂອງໄທ; ໄດ້ປະສານສົມທົບກັບຄະນະສະເພາະກິດແຕ່ລະຂັ້ນເກັບກໍາຂໍ້ມູນ ແລະຂຶ້ນທະບຽນຜູ້ອອກແຮງງານທີ່ກັບມາຈາກຕ່າງປະເທດ ແລະໃຫ້ການຊ່ວຍເຫຼືອເບື້ອງຕົ້ນເປັນເຄື່ອງປ້ອງກັນ (PPE ), ເຄື່ອງອຸປະໂພກບໍລິໂພກຢູ່ສູນຈໍາກັດບໍລິເວນໃນ 10 ແຂວງທີ່ມີຊາຍແດນຕິດກັບປະເທດໄທ;ອົງການກາແດງລາວໄດ້ຮ່ວມມືກັບອົງການກາແດງສະວິດເຊີແລນຊ່ວຍເຫຼືອອາຫານ 3 ຄາບ, ເຄື່ອງໃຊ້ສ່ວນຕົວຜູ້ລະ 1 ຊຸດ, ນໍ້າດື່ມ ແລະຄ່າເດີນທາງໃຫ້ຜູ້ອອກແຮງງານທີ່ກັບຈາກປະເທດໄທ ຈໍານວນ 12 ສູນ, ນັບແຕ່ເດືອນມີນາ 2020 ເປັນຕົ້ນມາ, ເປັນເງິນທັງໝົດ 15,82 ຕື້ກວ່າກີບ; ໄດ້ໂຄສະນາເຜີຍແຜ່ປຶ້ມຄູ່ມືການໄປອອກແຮງງານຕ່າງປະເທດທີ່ປອດໄພ ຈໍານວນ 7.990 ຫົວ ແລະແຜ່ນພັບ, ໂປສເຕີການຊອກ ຫາວຽກເຮັດງານທໍາ, ຈົດໝາຍຮຽກ ຮ້ອງເຖິງຜູ້ອອກແຮງງານ 10.000 ສະບັບ ໃຫ້ສູນຈໍາກັດບໍລິເວນຢູ່ບັນດາແຂວງ, ນະຄອນຫຼວງ, ໄດ້ເຮັດຄຣີບສຽງໂຄສະນາຕຳແໜ່ງງານຫວ່າງຜ່ານສື່ຕ່າງໆລວມທັງສູນຈໍາກັດບໍລິເວນຂອງແຮງງານທີ່ກັບມາ.

    ທ່ານ ນາງ ໃບຄຳ ຂັດທິຍະ ຍັງໃຫ້ຮູ້ອີກວ່າ: ໄດ້ປະສານສົມທົບກັບສະພາການຄ້າ ແລະອຸດສາຫະກໍາແຫ່ງຊາດ, ໂຄງການລົງທຶນພາຍໃນ ແລະຕ່າງປະເທດ, ເຂດເສດຖະກິດພິເສດ ແລະເສດຖະກິດສະເພາະ ແລະຫົວໜ່ວຍແຮງງານເພື່ອເກັບກໍາຕໍາແໜ່ງງານຫວ່າງໄດ້ແລ້ວ 6.000 ກວ່າຕໍາແໜ່ງ ແລະສືບຕໍ່ປະສານເອົາຂໍ້ມູນຕໍາແໜ່ງງານໃໝ່ຕື່ມເພື່ອຝຶກຜູ້ອອກແຮງງານເຂົ້າສູ່ຕໍາແໜ່ງງານ, ຝຶກເພື່ອປະກອບອາຊີບອິດສະຫຼະ, ໃນກໍລະນີຫາກຜູ້ອອກແຮງງານມີຈຸດປະສົງຢາກກັບໄປເຮັດວຽກຢູ່ຕ່າງປະເທດກໍ່ໃຫ້ໄປຕາມກົດໝາຍ; ພ້ອມນີ້, ໄດ້ປະສານສົມທົບກັບສະຖານທູດລາວ ປະຈໍາຣາຊະອານາຈັກໄທກໍານົດຊ່ອງທາງການຕິດຕໍ່ດ້ວຍໂທລະສັບ ແລະສື່ອີເລັກໂຕຣນິກເພື່ອໃຫ້ພົນລະເມືອງລາວ, ນັກສຶກສາ ແລະແຮງງານລາວທີ່ອາໄສຢູ່ຣາຊະອານາຈັກໄທສາມາດຕິດຕໍ່ພົວພັນຂໍຄໍາແນະນໍາ,ການຊ່ວຍເຫຼືອຈາກສະຖານທູດລາວ ປະຈໍາ ຣາຊະອານາຈັກໄທ ໂດຍກົງໃນ 4 ຊ່ອງ ທາງເຊັ່ນ: ເບີໂທລະສັບ: 098-706- 6916; 093-589-2574, 025-394- 881; Line QR code, WhatsApp QR code ແລະEmail Address: consularlaobkk@gmail.com.

แชร์