ອັດຕະປື ຖືສຳຄັນປະຕິບັດສິດໜ້າທີ່ລັດຖະທຳມະນູນ ແລະກົດໝາຍ

ຂ່າວ: ຊິບປະໄຊ 

 ວັນທີ 9 ສິງຫາ 2021 ທ່ານ ປັນຍາ ໄຊຍະແສງ ປະທານສານປະຊາຊົນແຂວງອັດຕະປືໄດ້ໃຫ້ສໍາພາດຕໍ່ນັກຂ່າວທ້ອງຖິ່ນເນື່ອງໃນໂອກາດສະເຫຼີມສະຫຼອງວັນລັດຖະທໍາມະນູນ ຄົບຮອບ 30 ປີ (15 ສິງຫາ 1991-15 ສິງຫາ 2021) ແລະ ວັນສ້າງຕັ້ງສານປະຊາຊົນຄົບຮອບ 39 ປີ(15 ສິງຫາ 1982-15 ສິງຫາ 2021) ຕິດພັນກັບຜົນສໍາເລັດໃນໄລຍະ 1 ປີ ຜ່ານມາໂດຍທ່ານໄດ້ໃຫ້ທັດສະນະວ່າ: ຂ້າພະເຈົ້າສຸດທີ່ພູມໃຈທີ່ເຫັນໄດ້ວ່າພັກ ແລະລັດໄດ້ມີຄວາມເອົາໃຈໃສ່ສູງໃນການຈັດຕັ້ງໂດຍສະເພາະເນື່ອງໃນໂອກາດວັນຄົບຮອບ 30 ປີ ທີ່ໄດ້ມີການຈັດຕັ້ງສະເຫຼີມສະຫຼອງວັນລັດຖະທຳມະນູນ ແລະວັນສ້າງຕັ້ງສານປະຊາຊົນຄົບຮອບ 39 ປີ ຢ່າງເປັນຂະບວນຊຶ່ງເປັນວັນທີ່ມີຄວາມໝາຍຄວາມສໍາຄັນຂອງພັກ-ຂອງຊາດ ແລະເພື່ອເປັນການຫວນຄືນເນື້ອໃນຈິດໃຈຂອງວັນດັ່ງກ່າວໃຫ້ກວ້າງຂວາງ ແລະເລິກເຊິ່ງ ກວ່າເກົ່າ. 

   ເພາະວ່າສອງວັນດັ່ງກ່າວ, ແມ່ນເປັນເຄື່ອງມືອັນສຳຄັນໃນການປົກປ້ອງສິດ ແລະຜົນປະໂຫຍດຂອງປະຊາຊົນລາວບັນດາເຜົ່າ, ເມື່ອພວກເຮົາຈັດຕັ້ງຫວນຄືນກໍ່ຄືການຈັດຕັ້ງລະນຶກເຖິງວັນຄົບຮອບທີ່ສຳຄັນຂອງການສ້າງລັດຖະທຳມະນູນ ແລະສ້າງສານປະຊາຊົນເຮັດໃຫ້ພະນັກງານ, ທະຫານ, ຕຳຫຼວດໄດ້ຮໍ່າຮຽນທົບທວນຄືນເນື້ອໃນຈິດໃຈດັ່ງກ່າວໄດ້ຈັດຕັ້ງປະຕິບັດໃຫ້ມັນຖືກຕ້ອງຕາມລັດຖະທຳມະນູນ ແລະກົດໝາຍທີ່ໄດ້ກຳນົດໄວ້ຖ້າວ່າພວກເຮົາໄດ້ສຶກສາຄົ້ນຄວ້າ,ຮໍ່າຮຽນກໍ່ຈະເຮັດໃຫ້ການ ເຊື່ອມຊຶມ ແລະຄວາມເຂົ້າໃຈໄດ້ຢ່າງເລິກ ຊຶ່ງ, ການຈັດຕັ້ງປະຕິບັດກໍ່ຈະມີຄວາມ ເຂັ້ມແຂງ ແລະຖືກຕ້ອງ, ເພາະມັນ ເປັນເຄື່ອງມື, ເປັນບັນທັດຖານ ແລະເປັນບ່ອນອີງໃຫ້ພວກເຮົາຕ້ອງປະຕິບັດ, ຖ້າເຮົາປະຕິບັດເຂັ້ມງວດເທົ່າໃດຈະຮັບປະກັນສິດເສລີພາບ, ຮັບປະກັນຄວາມຍຸຕິທຳໃຫ້ແກ່ສັງຄົມໄດ້ດີເທົ່ານັ້ນ. ສະນັ້ນ, ຢາກໃຫ້ພະນັກງານຂັ້ນນຳແຕ່ລະຂັ້ນ,ສະມາຊິກພັກ,ທະຫານ,ຕຳຫຼວດໂດຍສະເພາະແມ່ນເຈົ້າໜ້າທີ່ຕຳຫຼວດ,ໄອຍະການ,ສານປະຊາຊົນຢູພາຍໃນແຂວງເອີ້ນວ່າ: ພະນັກງານປະຕິບັດຄວາມຍຸຕິທຳໃນສັງຄົມຕ້ອງເປັນແບບຢ່າງ ແລະ ເຂັ້ມງວດຕາມລັດຖະທຳມະນູນ ແລະ ກົດໝາຍຈຶ່ງຈະເຮັດໃຫ້ລັດຖະທຳມະນູນ ແລະ ກົດໝາຍໃຊ້ໄດ້ຢ່າງ ສັກສິດ.

    ຄຽງຄູ່ກັບໝາກຜົນນັ້ນ, ສານປະຊາຊົນແຂວງອັດຕະປືກໍມີຜົນສໍາເລັດຫລາຍດ້ານຕະຫຼອດໄລຍະ 30 ກວ່າປີ ເປັນຕົ້ນໃນປີສົກປີ 2020-2021 ນີ້, ໄດ້ເອົາໃຈໃສ່ປັບປຸງແບບແຜນ ແລະກົນໄກການປະຕິບັດໜ້າທີ່ວຽກງານຂອງສານຕາມພາລະບົດບາດ, ສິດ ແລະໜ້າທີ່ຂອງຕົນຢ່າງວ່ອງໄວ, ມີຄຸນນະພາບ ແລະຖືສໍາຄັນການປະຕິບັດສິດ ແລະໜ້າທີ່ຕາມລັດຖະທໍາມະນູນ ແລະກົດໝາຍວາງອອກ, 1 ປີຜ່ານມາມີຄະດີເຂົ້າມາຫາສານປະຊາຊົນແຂວງມີທັງໝົດ 227 ເລື່ອງ, ຄ້າງມາ 46 ເລື່ອງ, ລວມ 273 ເລື່ອງ, ແກ້ໄຂແລ້ວ 229 ເລື່ອງ, ເທົ່າກັບ 83,88%, ຕັດສິນ 186 ເລື່ອງ, ຖອນຟ້ອງ 3 ເລື່ອງ, ຊັດມ້ຽນ 2 ເລື່ອງ, ຊີ້ຂາດ 1 ເລື່ອງ, ໄກເກ່ຍ 13 ເລື່ອງ, ໂຈະ 6 ເລື່ອງ, ຄະດີຍັງຄ້າງ 44 ເລື່ອງ, ເທົ່າກັບ 16,11%, ຖ້າທຽບໃສ່ມະຕິຂອງສະພາຮັບຮອງຫຼຸດຄາດໝາຍ 1,12%,ແຜນການ 85%.

   ສຳລັບປະເພດຄະດີອາຍາ, ຄະດີເຂົ້າໃໝ່ 181 ເລື່ອງ, ຄ້າງມາ 16 ເລື່ອງ, ລວມທັງໝົດ 197 ເລື່ອງ, ແກ້ໄຂໄດ້ 183 ເລື່ອງ, ເທົ່າກັບ 92,89%, ຄະດີ ກໍາລັງຄົ້ນຄວ້າດໍາເນີນ 14 ເລື່ອງ, ເທົ່າກັບ 7,10% ແລະອຸທອນ 1 ເລື່ອງ, ເທົ່າກັບ 0,54%, ປະເພດຄະດີແພ່ງ, ຄະດີເຂົ້າໃໝ່ 46 ເລື່ອງ, ຄ້າງມາ 30 ເລື່ອງ, ລວມ 76 ເລື່ອງ, ແກ້ໄຂແລ້ວ 46 ເລື່ອງ, ເທົ່າກັບ 60,52%, ກໍາລັງຄົ້ນຄວ້າ 30 ເລື່ອງ, ເທົ່າກັບ 39,47%.

แชร์