ສະມາຄົມແລກປ່ຽນສີລະປະ-ວັດທະນະທໍາແຊຣິງ ມອບເຄື່ອງໃຫ້ສະຖາບັນການສຶກສາ

  ພິທີມອບຮັບພາຫະນະ ແລະອຸປະກອນຈາກສະມາຄົມແລກ ປ່ຽນສີລະປະ ແລະວັດທະນະທໍາ ແຊຣິງ ສ. ເກົາຫຼີ ໄດ້ຈັດຂຶ້ນໃນວັນທີ 9 ສິງຫາ 2021 ທີ່ສະຖາບັນພັດທະນາສີມືແຮງງານລາວ-ເກົາຫຼີ ໂດຍເປັນກຽດເຂົ້າຮ່ວມຂອງທ່ານ ນາງ ໃບຄຳ ຂັດທິຍະລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ), ທ່ານ ອິມ ມູຮົງ ເອກອັກຄະລັດຖະ ທູດ ແຫ່ງສາທາລະນະລັດ ເກົາຫຼີ ປະຈໍາ ສປປ ລາວ, ທ່ານ ນາງ Yoo Hyun Sook ປະທານສະມາ ຄົມແລກປ່ຽນສີລະປະ-ວັດທະນະທໍາ ແຊຣິງ, ທ່ານ ບຸນມາ ສິດທິ ໂສມ ຫົວໜ້າສະຖາບັນພັດທະນາສີມືແຮງງານລາວ-ເກົາຫຼີ, ພ້ອມພາກສ່ວນກ່ຽວຂ້ອງເຂົ້າຮ່ວມ.

  ອຸປະກອບທີ່ສະມາຄົມແລກປ່ຽນສີລະປະ ແລະວັດທະນະທໍາ ແຊຣິງ ສ.ເກົາຫຼີ ນໍາມາມອບຄັ້ງ ນີ້ປະກອບມີລົດຕູ້ 12 ບ່ອນນັ່ງ ຈໍານວນ 3 ຄັນ, ອຸປະກອນກີລາ ແລະອຸປະກອນດົນຕີ, ສໍາລັບລົດຕູ້ຈໍານວນ 3 ຄັນ ແມ່ນມອບໃຫ້ສະຖາບັນພັດທະນາສີມືແຮງງານລາວ-ເກົາຫຼີ ຈໍານວນ 1 ຄັນ, ມອບໃຫ້ພະແນກສຶກສາແຂວງຫົວພັນ 1 ຄັນ ແລະແຂວງສະຫວັນນະ ເຂດ 1 ຄັນ, ສ່ວນອຸປະກອນທາງດ້ານກີລາ ແລະອຸປະກອນດົນຕີແມ່ນມອບໃຫ້ແກ່ໂຮງຮຽນປະຖົມ ບ້ານຄຳປາແໜ ແຂວງສະຫວັນນະເຂດ.

  ສະມາຄົມແລກປ່ຽນສີລະປະ ແລະວັດທະນະທໍາ ແຊຣິງ ແມ່ນການຈັດຕັ້ງທາງສັງຄົມໜຶ່ງຂອງສ.ເກົາຫຼີ ທີ່ໄດ້ມີຜົນງານການຮ່ວມມືກັບສະຖາບັນພັດທະນາສີມືແຮງງານລາວ-ເກົາຫຼີ, ເວົ້າສະເພາະຢູ່ໃນສະຖາບັນຂອງພວກເຮົາສະມາຄົມດັ່ງກ່າວໄດ້ມີການເປີດການຝຶກພາສາ ແລະວັດທະນະທໍາເກົາຫຼີໃຫ້ແກ່ອອກແຮງງານລາວທີ່ຈະເດີນທາງໄປອອກແຮງງານຢູ່ ສ.ເກົາຫຼີ, ນອກຈາກນີ້ທາງສະມາຄົມກໍ່ຍັງໄດ້ມີການຊ່ວຍເຫຼືອໃນຂົງເຂດອື່ນໆນໍາອີກ, ສໍາລັບຢູ່ສະຖາບັນພັດທະນາສີມືແຮງງານລາວ-ເກົາຫຼີ ທາງສະມາຄົມຍັງໄດ້ຊ່ວຍເຫຼືອໃນການສ້າງຫໍພັກໃຫ້ແກ່ຜູ້ທີ່ເຂົ້າມາຝຶກອາຊີບໃນສະຖາບັນກໍ່ຄືຜູ້ເຂົ້າຝຶກພາສາເກົາຫຼີ ທີ່ມາຈາກທ້ອງຖິ່ນຫ່າງໄກໃຫ້ມີທີ່ພັກອາໄສໄດ້ສະດວກສະບາຍນຳອີກ.

----

ໜັງສືພິມ ເສດຖະກິດ-ສັງຄົມ

แชร์