ລາວສົ່ງອອກສິນຄ້າກະສິກຳໄປປະເທດຄູ່ຄ້າ 528 ລ້ານໂດລາ

    ໃນໄລຍະ 6 ເດືອນຕົ້ນປີ 2021, ສປປ ລາວ ໄດ້ສົ່ງອອກຜະລິດຕະພັນກະສິກຳໃຫ້ກັບປະເທດຄູ່ການຄ້າບັນລຸຫຼາຍກວ່າ 528 ລ້ານໂດລາສະຫະລັດ ໃນນີ້ສົ່ງອອກຜະລິດຕະພັນພືດບັນລຸໄດ້ 524 ລ້ານກວ່າໂດລາສະຫະລັດ ແລະຜະລິດຕະພັນສັດໃຫຍ່ປະຕິບັດໄດ້ 4,8 ລ້ານໂດລາສະຫະລັດ,ນອກນີ້ຍັງຈະສືບຕໍ່ເຈລະຈາ ແລະເຊັນອະນຸມັດສັນຍາສົ່ງອອກໃຫ້ກັບ ສປ ຈີນ ຕື່ມອີກ 6 ຊະນິດ, ກັບໄທ 5 ຊະນິດ ແລະກັບຫວຽດນາມ.

   ທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ-ປ່າໄມ້ ໄດ້ລາຍງານຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ໃຫ້ຮູ້ວ່າ: ລັດຖະ ບານລາວກໍ່ຄືກະຊວງກະສິກໍາ-ປ່າໄມ້ ໄດ້ເລັ່ງຊຸກຍູ້ການສົ່ງອອກສິນຄ້າກະສິກໍາ-ສັດລ້ຽງທີ່ໄດ້ມີສັນຍາລົງນາມກັບປະເທດຄູ່ການຄ້າໂດຍ ສະເພາະກັບ ສປ ຈີນ ແມ່ນມີຈໍານວນ ພືດ 7 ຊະນິດ (ເຂົ້າ, ມັນດ້າງ, ມັນຕົ້ນ, ສາລີ, ໝາກໂມ, ກ້ວຍ ແລະພືດຕະກຸນຖົ່ວ) ແລະສັດໃຫຍ່ງົວ-ຄວາຍ; ສ່ວນກັບ ສສ ຫວຽດນາມ ມີພືດ 16 ຊະນິດ ແລະຣາຊະອານາຈັກໄທ 15 ຊະນິດ, ຊຶ່ງໃນໄລຍະ 6 ເດືອນຕົ້ນປີ 2021 ສາມາດສົ່ງອອກຜະລິດຕະພັນກະສິກຳໃຫ້ກັບປະເທດຄູ່ການຄ້າບັນລຸຫຼາຍກວ່າ 528 ລ້ານໂດລາສະຫະລັດ ໃນນີ້ສົ່ງອອກພືດໄດ້ 2,57 ລ້ານໂຕ ມູນຄ່າ 524 ລ້ານກວ່າໂດລາສະຫະລັດ ແລະສົ່ງອອກສັດໃຫຍ່ປະຕິບັດໄດ້ 2.689 ໂຕມູນຄ່າ 4,8 ລ້ານໂດລາສະຫະລັດ,ນອກຈາກນີ້ ກະຊວງກະສິກໍາ-ປ່າໄມ້ ຍັງຈະສືບຕໍ່ເຈລະຈາ ແລະເຊັນອະນຸມັດສັນຍາກັບ ສປ ຈີນ ຕື່ມອີກ 6 ຊະນິດພືດ, ກັບໄທ 5 ຊະນິດ ແລະກັບ ສສ ຫວຽດນາມ. ສ່ວນພືດບຸລິມະສິດທີ່ສະເໜີເປີດຕະຫຼາດໃໝ່ຈໍານວນ 91 ຊະນິດໃນນີ້ 14 ຊະນິດໄດ້ສໍາເລັດການວິໄຈຄວາມສ່ຽງສັດຕູພືດ ແລະໄດ້ສົ່ງໃຫ້ ຝ່າຍ ສປ ຈີນແລ້ວ, ສໍາລັບສືບຕໍ່ເຈລະຈາຜະລິດຕະພັນຊີ້ນໃຫ້ສໍາເລັດເພື່ອຮັບຮອງໃຫ້ແກ່ຜູ້ປະກອບການທີ່ໄດ້ເຊັນສັນຍາສົ່ງອອກແລ້ວ 20 ພັນໂຕຕໍ່ປີ.

    ທ່ານລັດຖະມົນຕີກະຊວງກະສິກໍາປ່າໄມ້ກ່າວຕື່ມວ່າ: ເພື່ອສືບຕໍ່ບັນລຸຕົວເລກທີ່ໄດ້ເຈລະຈາແລ້ວ ແລະ ຈະສືບຕໍ່ເຈລະຈາແຕ່ນີ້ຮອດປີ 2023 ຂະແໜງກະສິກໍາ-ປ່າໄມ້ຈະສຸມໃສ່ຈັດຕັ້ງປະຕິບັດໃນຂົງເຂດຈຸດສຸມບຸລິມະສິດໂດຍສະເພາະແມ່ນເຂດຕາມແລວທາງລົດໄຟລາວ-ຈີນ ແລະບັນດາແຂວງທີ່ມີທ່າແຮງ ແລະມີສະຖານການຜະລິດສໍາລັບພືດແຕ່ລະຊະນິດ,ຊຶ່ງປະຈຸບັນມີໂຄງການສະໜັບສະໜູນ 7 ໂຄງການສໍາລັບປູກພືດ,ນອກນີ້ຍັງມີໂຄງການສະໜັບສະໜູນຈາກທະນາຄານເອດີບີ, ທະນາ ຄານໂລກ ແລະ2 ໂຄງການສໍາລັບລ້ຽງສັດປະຈຸບັນໄດ້ສ້າງສະຖານີກັກກັນສັດໄດ້ແລ້ວຈໍານວນ 2 ແຫ່ງ.

แชร์