ສະໜາມໄຊ ຖືເອົາການຜະລິດກະສິກໍາສ້າງລາຍຮັບໃຫ້ປະຊາຊົນ

  ເມືອງສະໜາມໄຊແຂວງອັດຕະປື ໄດ້ກໍານົດເອົາວຽກງານກະສິກໍາ ແລະປ່າໄມ້ເປັນບຸລິມະສິດອັນດັບໜຶ່ງເຂົ້າການພັດທະນາຊົນນະບົດແລະແກ້ໄຂຄວາມທຸກ ຍາກຂອງປະຊາຊົນໃຫ້ນັບມື້ດີຂຶ້ນເທື່ອລະກ້າວ.

  ທ່ານ ຄູນສະໄໝ ວຽງພະຈັນ ຫົວໜ້າຫ້ອງການກະສິກໍາ ແລະປ່າໄມ້ ເມືອງສະໜາມໄຊ ໄດ້ໃຫ້ສໍາ ພາດເມື່ອບໍ່ດົນຜ່ານມານີ້ວ່າ: ໂດຍ ອີງໃສ່ທ່າແຮງສໍາຄັນທາງດ້ານທໍາມະຊາດທີ່ມີພາຍໃນເມືອງສະໜາມໄຊຄື: ທ່າແຮງທາງດ້ານທີ່ດິນກະສິກໍາ ແລະປ່າໄມ້ທີ່ອຸດົມສົມບູນ ແລະກວ້າງຂວາງ, ມີແຫຼ່ງນໍ້າທໍາມະຊາດທີ່ສໍາຄັນຫຼາຍສາຍ ຊຶ່ງເໝາະສົມເຂົ້າໃນການພັດທະນາວຽກງານກະສິກໍາ ແລະປ່າໄມ້, ໄລຍະຜ່ານມາມີນັກລົງທຶນຈໍານວນບໍ່ໜ້ອຍທີ່ມີຄວາມສົນໃຈ ແລະ ເຂົ້າ ມາລົງທຶນໃສ່ການພັດທະນາວຽກງານກະສິກໍາເປັນຕົ້ນ: ການປູກກ້ວຍ, ມັນຕົ້ນ, ການສົ່ງເສີມ ແລະເກັບຊື້ຜົນຜະລິດເຂົ້າ ແລະອື່ນໆ, ຊຶ່ງທັງໝົດແມ່ນເປັນທ່າແຮງທີ່ທາງຄະນະພັກອໍານາດການປົກຄອງເມືອງສະໜາມໄຊ ຈຶ່ງໄດ້ກໍານົດເອົາດ້ານວຽກງານກະສິກໍາ ແລະປ່າໄມ້ເປັນວຽກສໍາຄັນໃນການພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນ.

  ທ່ານ ຄູນສະໄໝ ວຽງພະຈັນ ຫົວໜ້າຫ້ອງການກະສິກໍາ ແລະປ່າໄມ້ເມືອງສະໜາມໄຊ ໃຫ້ຮູ້ຕື່ມວ່າ: ການແກ້ໄຂຄວາມທຸກຍາກຜ່ານມາຢູ່ເມືອງສະໜາມໄຊໄດ້ພົບບັນຫາຫຼາຍຢ່າງທີ່ເປັນສິ່ງທ້າທາຍໂດຍສະເພາະປະຊາຊົນຍັງຖືເບົາຕໍ່ການທໍາການຜະລິດ, ຂາດການນໍາໃຊ້ດ້ານເຕັກນິກເຮັດໃຫ້ຜົນຜະລິດຕໍ່າ, ພື້ນ ຖານໂຄງລ່າງຖະໜົນຫົນທາງພາຍໃນເມືອງຫຼາຍສາຍບໍ່ທັນສົມບູນ, ມີຄວາມຫຍຸ້ງຍາກໃນການເຄື່ອນຍ້າຍສິນຄ້າຕ່າງໆເຮັດໃຫ້ການເຂົ້າເຖິງຕະຫຼາດພົບຄວາມຫຍຸ້ງຍາກ ແລະມີຕົ້ນທຶນສູງ, ບັນດາຮາກຖານກຸ່ມການຜະລິດທີ່ໄດ້ມີການສ້າງຕັ້ງຂຶ້ນໄລຍະຜ່ານມາຍັງບໍ່ທັນມີຄວາມເຂັ້ມແຂງ ແລະບັນຫາອື່ນໆ.

  ທ່ານ ຄູນສະໄໝ ວຽງພະຈັນ ກ່າວຕື່ມວ່າ: ໂດຍອີງຕາມການປະເມີນມາດຕະຖານພົ້ນທຸກ ແລະການພັດທະນາຕາມດໍາລັດ 348/ລບ, ປີ 2019 ຂອງຄະນະຮັບຜິດຊອບ ປະເມີນຜົນຂອງເມືອງສະໜາມໄຊ ມີພົນລະເມືອງ 36.533 ຄົນ, ຍິງ 17.925 ຄົນ, ມີ 37 ບ້ານ ໃນນັ້ນມີ 30 ບ້ານ ທີ່ນອນໃນ ເງື່ອນໄຂບ້ານທຸກຍາກ, ມີ 7.346 ຄອບຄົວ, ຍັງທຸກຍາກ 5.415 ຄອບຄົວ, ພົ້ນທຸກແລ້ວມີ 1.931 ຄອບຄົວ ແລະມີ 824 ຄອບຄົວ ກາຍເປັນຄອບຄົວພັດທະນາ.

แชร์