ສຳເລັດກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດຊຸດທີ IX

    ກອງປະຊຸມສະໄໝວິສາມັນ ເທື່ອທີ 1 ຂອງສະພາແຫ່ງຊາດ ຊຸດທີ IX ໄດ້ອັດລົງດ້ວຍຜົນສຳເລັດຢ່າງຈົບງາມໃນວັນທີ 10 ສິງຫາ 2021 ຢູ່ຫ້ອງປະຊຸມໃຫຍ່ສະພາແຫ່ງຊາດ (ຫຼັງໃໝ່) ພາຍຫຼັງດຳເນີນມາເປັນເວລາ 5 ວັນ, ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະໃຫ້ກຽດເຂົ້າຮ່ວມຂອງ ທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາຜູ້ນຳພັກລັດ, ອະດີດການນຳພັກ-ລັດ, ຄະນະລັດຖະບານ, ສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນ ແລະສະຫະພັນນັກຮົບເກົ່າເຂົ້າຮ່ວມ.

  ທ່ານ ໄຊສົມພອນ ພົມວິຫານ ໄດ້ກ່າວໃນບົດສູນທອນພົດປິດກອງປະຊຸມ ຄັ້ງນີ້ວ່າ: ກອງປະຊຸມສະໄໝວິສາມັນເທື່ອນີ້, ໄດ້ສຸມໃສ່ຄົ້ນຄວ້າ ແລະພິຈາລະນາເອົາວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ ແລະມີການປຶກສາຫາລືປັບປຸງກົດໝາຍທີ່ກ່ຽວຂ້ອງດ້ວຍຈິດໃຈເຄັ່ງຮ້ອນ, ເຕັມໄປດ້ວຍຄວາມຮັບຜິດຊອບສູງ ແລະ ໄດ້ຮັບຮອງເອົາດ້ວຍຄະແນນສຽງສ່ວນຫຼາຍ; ກອງປະຊຸມສະແດງຄວາມຊົມເຊີຍ ແລະ ຕີລາຄາສູງຕໍ່ລັດຖະບານທີ່ໄດ້ມີຄວາມພະຍາຍາມສູ້ຊົນກະກຽມວາລະແຫ່ງຊາດທັງສອງສະບັບ ແລະສາມາດນໍາເຂົ້າພິຈາລະນາໃນກອງປະຊຸມຄັ້ງນີ້, ກອງປະຊຸມສະເໜີລັດຖະບານສືບຕໍ່ນໍາເອົາຄວາມຄິດເຫັນຂອງກອງປະຊຸມໄປປັບປຸງເຂົ້າໃສ່ວາລະແຫ່ງຊາດໃຫ້ມີເນື້ອໃນຮັດກຸມ, ຄົບຖ້ວນ ແລະສາມາດຈັດຕັ້ງປະຕິບັດໄດ້, ຮີບຮ້ອນສ້າງ ແລະປັບປຸງນິຕິກໍາໃຕ້ກົດໝາຍທີ່ພົວພັນກັບວາລະແຫ່ງຊາດໃຫ້ເປັນລະບົບໂດຍໄວແນໃສ່ຜ່ອນຄາຍສະພາບຄວາມຫຍຸ້ງຍາກດ້ານເສດຖະກິດ-ສັງຄົມ, ສືບຕໍ່ສ້າງໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ ແລະປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນເທື່ອລະກ້າວ.

  ພ້ອມນີ້, ກອງປະຊຸມໄດ້ພິຈາລະນາ ແລະຮັບຮອງເອົາການປັບປຸງເນື້ອໃນບາງມາດຕາຂອງກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້, ກົດໝາຍວ່າດ້ວຍອາກອນຊົມໃຊ້ ແລະກົດໝາຍວ່າດ້ວຍຢາເສບຕິດເພື່ອສ້າງເງື່ອນໄຂ ແລະເປັນເຄື່ອງມືສໍາຄັນໃນການປະກອບສ່ວນເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍເປັນຮູບປະທໍາໂດຍກອງປະຊຸມສະເໜີໃຫ້ຄະນະຮັບຜິດຊອບນໍາເອົາຄວາມຄິດເຫັນຂອງສະມາຊິກສະພາແຫ່ງຊາດໄປສືບຕໍ່ປັບປຸງໃສ່ບັນດາຮ່າງເນື້ອໃນປັບປຸງບາງມາດຕາຂອງບັນດາກົດໝາຍດັ່ງກ່າວໃຫ້ຄົບຖ້ວນສົມບູນເພື່ອນໍາໄປສູ່ການຈັດຕັ້ງປະຕິບັດວາລະແຫ່ງຊາດມີຜົນສໍາເລັດເປັນຢ່າງດີ. ຂະນະດຽວກັນ, ກອງປະຊຸມໄດ້ຮັບຟັງການລາຍງານຂອງລັດຖະບານກ່ຽວກັບສະພາບການແຜ່ລະບາດຂອງເຊື້ອພະຍາດໂຄວິດ-19 ແລະມາດຕະການແກ້ໄຂຜົນກະທົບຈາກການແຜ່ລະບາດຂອງພະຍາດດັ່ງກ່າວ. ນອກຈາກນັ້ນ, ກອງປະຊຸມຍັງໄດ້ຮັບຟັງການຊີ້ແຈງອະທິບາຍຈາກທ່ານນາຍົກລັດຖະມົນຕີ ແລະບັນດາລັດຖະມົນຕີທີ່ກ່ຽວຂ້ອງກ່ຽວກັບບັນຫາທີ່ກອງປະຊຸມມີຄວາມສົນໃຈ.

    ພິເສດ, ກອງປະຊຸມຄັ້ງນີ້ໄດ້ຮັບກຽດຢ່າງສູງຕ້ອນຮັບການມາຢ້ຽມຢາມຂອງຄະນະຜູ້ແທນຂັ້ນສູງຂອງພັກ, ລັດສາທາລະນະລັດສັງຄົມນິຍົມຫວຽດນາມທີ່ນໍາພາໂດຍສະຫາຍ ຫງວຽນ ຊວັນ ຟຸກ ກໍາມະການກົມການເມືອງສູນກາງພັກ, ປະທານປະເທດ ສສ ຫວຽດນາມ, ຊຶ່ງໄດ້ມີການກ່າວຄໍາປາໄສຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ແລະໄດ້ເຂົ້າຮ່ວມພິທີມອບ-ຮັບຫໍສະພາແຫ່ງຊາດຫຼັງໃໝ່ຢ່າງເປັນທາງການ, ໂດຍມີການເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ແລະການນໍາຂັ້ນສູງຂອງພັກ, ລັດຫວຽດນາມ ແລະລາວ.

   ຜົນສໍາເລັດຂອງກອງປະຊຸມຄັ້ງນີ້, ແມ່ນໝາກຜົນແຫ່ງການຫັນເອົາແນວທາງນະໂຍບາຍ, ມະຕິກອງປະຊຸມໃຫຍ່ ຄັ້ງທີ XI ຂອງພັກກໍ່ຄືມະຕິກອງປະຊຸມວິສາມັນຂອງຄະນະບໍລິຫານງານສູນກາງພັກສະໄໝທີ XI ມາເປັນອັນລະອຽດໄວ້ໃນກົດໝາຍ ແລະ ທິດທາງວຽກງານຂອງສະພາແຫ່ງຊາດກໍ່ຄືບັນດາຂະແໜງການທີ່ກ່ຽວ ຂ້ອງເພື່ອເປັນບ່ອນອີງໃນການຈັດຕັ້ງປະຕິບັດໃຫ້ເປັນຂະບວນການຢ່າງກວ້າງຂວາງ ແລະໃຫ້ໄດ້ຮັບຜົນສໍາເລັດຕາມແຜນທີ່ກໍານົດໄວ້.

แชร์