ຈຳປາສັກກຽມໃຊ້ຢາພື້ນເມືອງຄຽງຄູ່ປົວຜູ້ປ່ວຍໂຄວິດ

   ຈາກສະພາບຜູ້ປ່ວຍໂຄວິດ-19 ເພີ່ມຂຶ້ນໃນແຕ່ລະວັນປະກອບກັບຢາທີ່ໃຊ້ປິ່ນປົວແມ່ນມີບໍ່ພຽງພໍກັບຄວາມຕ້ອງການຈຳປາສັກນັບເປັນແຂວງທຳອິດຂອງລາວກຽມນຳເອົາຢາພື້ນເມືອງລາວທີ່ສະກັດຈາກກະຊາຍຂາວ ແລະຢາຕົ້ມມາປິ່ນປົວໃຊ້ຄຽງຄູ່ຊຶ່ງຂະນະນີ້ຢູ່ໃນຂັ້ນຕອນຫາລືຂອງວິຊາການ ແລະພາກສ່ວນທີ່ກ່ຽວຂ້ອງ.

  ໃນວັນທີ 6 ສິງຫາຜ່ານມານີ້ທີ່ຫ້ອງວ່າການແຂວງຈຳປາສັກໄດ້ປະຊຸມປຶກສາຫາລືເພື່ອຮັບຮອງໂຄງການນໍາໃຊ້ຢາພື້ນເມືອງເພື່ອປິ່ນປົວຜູ້ຕິດເຊື້ອພະຍາດ COVID-19 ໂດຍການເປັນປະທານຂອງທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ, ທ່ານ ພອນເທບ ພົນເສນາ ທີ່ປຶກສາວຽກຕ້ານໂຄວິດ19 ຢູ່ແຂວງຈຳປາສັກ, ມີພຣະອາຈານ ຄໍາຕູ້ ອິນທະວົງ, ຮອງເຈົ້າຄະນະແຂວງ, ຫົວໜ້າກໍາມາທິການສາທາລະນຸປະການ, ມີຄະນະຊ່ຽວຊານຈາກໂຮງໝໍແຂວງ ແລະພະແນກສາທາລະນະສຸກ, ພາກສ່ວນທີ່ກ່ຽວຂ້ອງເຂົ້າຮ່ວມ.

   ກອງປະຊຸມດັ່ງກ່າວແມ່ນໄດ້ປຶກສາຫາລື ແລະເພື່ອຮັບຮອງໃນການທົດລອງນໍາໃຊ້ຢາພື້ນເມືອງເພື່ອປິ່ນປົວຜູ້ຕິດເຊື້ອພະຍາດ COVID-19 ຢູ່ແຂວງຈໍາປາສັກໂດຍມີຈຸດປະສົງໂຄງການແມ່ນເພື່ອສຶກສາເບິ່ງປະສິດທິພາບຂອງຢາພື້ນເມືອງລາວ ແລະສົມທຽບຜົນທີ່ໃຊ້ເຂົ້າໃນການປິ່ນປົວຄົນເຈັບຕິດເຊື້ອພະຍາດໂຄວິດ-19 ຍ້ອນວ່າ ຈໍານວນຜູ້ຕິດເຊື້ອນັບມື້ເພີ້ມຂຶ້ນ, ມາຮອດເດືອນສິງ ຫາ ປີ 2021 ມີຜູ້ຕິດເຊື້ອທີ່ຍັງປິ່ນປົວຢູ່ທັງໝົດ 845 ຄົນ. 

    ປະຈຸບັນມີຜູ້ເສຍຊີວິດຢູ່ແຂວງຈໍາປາສັກແລ້ວ 1 ຄົນ, ແລະຢາທີ່ໃຊ້ປິ່ນປົວ COVID-19 ແມ່ນມີບໍ່ພຽງພໍ ແລະການກິນຢາສະໝຸນໄພລາວເພື່ອປິ່ນປົວຄົນເຈັບຕິດເຊື້ອແມ່ນຍັງບໍ່ທັນມີການຈັດຕັ້ງປະຕິບັດ ແລະສຶກສາຢູ່ໃນປະເທດລາວຊຶ່ງຢາພື້ນເມືອງທີ່ຈະ ນຳໃຊ້ເປັນຢາທີ່ສະກັດຈາກກະຊາຍຂາວ ແລະຢາຕົ້ມ.

   ໂອກາດດັ່ງກ່າວ, ທ່ານ ວິໄລວົງ ບຸດດາຄຳ ໄດ້ມີຄຳເຫັນໃຫ້ພາກສ່ວນທີ່ກ່ຽວຂ້ອງຕ້ອງຮີບຮ້ອນແຕ່ງຕັ້ງຄະນະຮັບຜິດຊອບ, ກຳນົດການຈັດຕັ້ງປະຕິບັດ, ແບ່ງວຽກຂອງຄະນະຊ່ຽວຊານສ້າງແຜນ ແລະກຳນົດຈຸດໃນການປິ່ນປົວ, ເພື່ອການເກັບ ແລະວິເຄາະຂໍ້ມູນໃຫ້ເຮົາສາມາດຮູ້ໄດ້ເຖິງປະສິດທິຜົນໃນການປິ່ນປົວພະຍາດໂດຍນໍາໃຊ້ຢາພື້ນເມືອງລາວທີ່ຜະລິດມາຈາກພູມປັນຍາຂອງຄົນລາວພ້ອມທັງເປັນຂໍ້ມູນພື້ນຖານໃຫ້ແກ່ການສຶກສາໃນຂັ້ນຕໍ່ໄປເພື່ອພັດທະນາຢາພື້ນເມືອງລາວໃຫ້ມີຄວາມກ້າວ ໜ້າ.

แชร์