ກະສິກຳ ກໍານົດ 5 ເລັ່ງ ແກ້ບັນຫາເສດຖະກິດ

    ເພື່ອຈັດຕັ້ງຜັນຂະຫຍາຍວາລະແຫ່ງຊາດໃຫ້ສໍາເລັດຜົນຕາມຈຸດປະສົງທີ່ວາງໄວ້ປະກອບເຂົ້າໃນການແກ້ໄຂບັນຫາທາງດ້ານເສດຖະກິດນັບແຕ່ນີ້ຮອດປີ 2023, ຂະແໜງກະສິກໍາ ແລະປ່າໄມ້ກໍານົດເອົາ 5 ວຽກຈຸດສຸມ ຫຼືເອີ້ນວ່າ “5 ເລັ່ງ”.

    ທ່ານ ເພັດ ພົມພິພັກ ລັດຖະມົນຕີ ກະຊວງກະສິກໍາ-ປ່າໄມ້ ໄດ້ປະກອບຄໍາເຫັນຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ເມື່ອວັນທີ 6 ສິງຫາໃຫ້ຮູ້ວ່າ: ຂະແໜງກະສິກໍາ ແລະປ່າໄມ້ໄດ້ກໍານົດ 5 ວຽກງານຈຸດສຸມ ຫຼືເອີ້ນວ່າ 5 ເລັ່ງ ເພື່ອຈັດຕັ້ງຜັນຂະຫຍາຍວາລະແຫ່ງຊາດ ແລະແກ້ໄຂບັນ ຫາທາງດ້ານເສດຖະກິດໃນໄລຍະແຕ່ນີ້ຮອດປີ 2023 ໃຫ້ສໍາເລັດຜົນຕາມຈຸດປະສົງທີ່ວາງໄວ້ ຄື: 1) ເລັ່ງຊຸກຍູ້ການສົ່ງ ອອກສິນຄ້າກະສິກໍາ-ສັດລ້ຽງທີ່ໄດ້ມີສັນຍາລົງນາມກັບປະເທດຄູ່ການຄ້າແລ້ວໃນນີ້ສຸມໃສ່ຕະຫຼາດ ສປ ຈີນ, ພ້ອມດຽວກັນກໍ່ເລັ່ງເຈລະຈາເຊັນສັນຍາການສົ່ງອອກສິນຄ້າກະສິກໍາທີ່ໄດ້ກໍານົດຢູ່ໃນບັນຊີພືດ ແລະຜະລິດຕະພັນພືດທີ່ເປັນບູລິມະສິດສໍາລັບເຈລະຈາເປີດຕະຫຼາດກັບ ສປ ຈີນ ແລະປະເທດໃກ້ຄຽງ 2) ເລັ່ງປັບປຸງມາດຕະຖານລະບົບການຜະລິດກະສິກໍາສະອາດໃຫ້ເທົ່າທຽມມາດຕະຖານຂອງອາຊຽນ ແລະສາກົນ, ສ້າງ ແລະປັບປຸງນິຕິກໍາເພື່ອເປັນເຄື່ອງມືກວດກາຄຸນນະພາບ ແລະມາດຕະຖານຜະລິດຢູ່ດ່ານສາກົນ ແລະແຂວງ, ສຸມໃສ່ຝຶກອົບຮົມ ແລະເຜີຍແຜ່ມາດຕະຖານກະສິກໍາສະອາດ ແລະກະສິກໍາທີ່ດີໃຫ້ຜູ້ຜະລິດ ແລະຜູ້ປະກອບການ, ສ້າງນັກກວດກາຂັ້ນສູນກາງ ແລະຂັ້ນແຂວງກ່ຽວກັບກະສິກໍາສະອາດ ແລະມາດຕະຖານອື່ນໆ, ປັບປຸງກົນໄກການວາງແຜນປະສານງານ ແລະແລກປ່ຽນຂໍ້ມູນດ້ານການຜະລິດ ແລະຕະຫຼາດສໍາລັບກະສິກໍາສົ່ງອອກລະຫວ່າງຂັ້ນສູນກາງ, ທ້ອງຖິ່ນ ແລະຜູ້ປະກອບການໃຫ້ດີຂຶ້ນ 3) ເລັ່ງກໍານົດບັນຊີລາຍການສິນຄ້າກະສິກໍາເພື່ອທົດແທນການນໍາເຂົ້າ ແລະນະໂຍບາຍສົ່ງເສີມຢ່າງຮອບດ້ານ, ໄປຄຽງຄູ່ກັບການຂະຫຍາຍ ແລະປັບປຸງກໍາລັງການຜະລິດ (ກຸ່ມການຜະລິດ, ສະຫະກອນກະສິກໍາ, ສະມາຄົມ, ເຄືອຂ່າຍກະສິກອນ ແລະອື່ນໆ) ແລະຮູບແບບການຜະລິດ ຕ່າງໆໃຫ້ກວ້າງຂວາງ ແລະເປັນ ຮູບປະທໍາຫຼາຍຂຶ້ນສ່ວນບັນຫາທີ 4) ເລັ່ງປັບປຸງ ແລະພັດທະນາໂຄງລ່າງພື້ນຖານ ການຜະລິດ ແລະເຕັກນິກເພື່ອຫຼຸດຜ່ອນຕົ້ນທຶນການຜະລິດ ເຊັ່ນ: ໂຮງອົບ, ສາງເກັບມ້ຽນສິນຄ້າ, ຫ້ອງວິໄຈຕ່າງໆ, ຕະຫຼາດຂາຍຍ່ອຍຂາຍຍົກ ແລະລະບົບການຂົນສົ່ງຜົນຜະລິດກະສິກໍາ, ໂດຍສຸມໃສ່ເຂດຈຸດສຸມການຜະລິດ, ເຂດຄ່ຽນຖ່າຍສິນຄ້າຕາມແລວທາງລົດໄຟລາວ-ຈີນ, ດ່ານສາກົນ, ເຂດເສດຖະກິດພິເສດ, ເຂດເສດຖະກິດສະເພາະ ແລະເຂດຄ່ຽນຖ່າຍສິນຄ້າທາງບົກ; 5) ເລັ່ງຈັດບຸລິມະສິດ ແລະກໍານົດ ເຂດການລົງທຶນດ້ານກະສິກໍາ, ເອົາໃຈໃສ່ຕິດຕາມກວດກາໂຄງການລົງທຶນໃນຂະແໜງກະສິກໍາ, ປັບປຸງກົນໄກການລົງທຶນ ຮູບແບບຮ່ວມມືລັດ-ເອກະຊົນ, ການຜະລິດກະສິກໍາຕາມສັນຍາໃນນີ້ສຸມໃສ່ປັບປຸງບັນດານິຕິກໍາເພື່ອຊຸກຍູ້ສົ່ງເສີມການລົງທຶນ, ໂດຍການຕັດບັນດາຂອດຂັ້ນທີ່ອຸດຕັນ, ກົດໜ່ວງການລົງທຶນໃນຂົງເຂດກະສິກໍາ-ປ່າໄມ້ໃຫ້ມີຄວາມຄ່ອງຕົວ, ດໍາເນີນການສໍາຫຼວດຈັດສັນ ແລະກໍານົດພື້ນທີ່ການຜະລິດກະສິກໍາຕາມທ່າແຮງ ແລະເງື່ອນໄຂເໝາະສົມຕາມລະບົບນິເວດໄປຄຽງຄູ່ກັບການນໍາໃຊ້ ນະວັດຕະກໍາໃໝ່ທີ່ທັນສະໄໝ ແລະເປັນມິດຕໍ່ສິ່ງແວດລ້ອມ.

  ນອກນັ້ນທ່ານລັດຖະມົນຕີກະຊວງກະສິກໍາ-ປ່າໄມ້ ຍັງກ່າວຕື່ມວ່າ: ເພື່ອປະຕິບັດ 5 ວຽກຈຸດສຸມດັ່ງກ່າວ, ໃຫ້ບັນລຸຜົນຂະແໜງການຕົນຈະສຸມໃສ່ປະຕິບັດມາດຕະການຕົ້ນຕໍດັ່ງນີ້: ຊຸກຍູ້ ແລະອໍານວຍຄວາມສະດວກໃຫ້ແກ່ບັນດານັກທຸລະກິດ ແລະ ຜູ້ປະກອບການລົງທຶນໃສ່ການຜະລິດພືດ ແລະ ສັດເພື່ອບັນລຸເປົ້າໝາຍການສົ່ງອອກ; ສືບຕໍ່ປັບປຸງ ແລະພັດທະນາຄູ່ມືວິຊາການໃນການຈັດຕັ້ງປະຕິບັດເພື່ອໃຫ້ເຊື່ອມໂຍງກັບວຽກງານສຸຂະນາໄມສັດ ແລະພືດຂອງອົງການການຄ້າໂລກ, ເພີ່ມທະວີປັບ ປຸງກົງຈັກການຈັດຕັ້ງ, ກົນໄກການ ຄຸ້ມຄອງ, ປະສານງານ, ພື້ນຖານ ວັດຖຸເຕັກນິກ, ສູນສະຖານີຄົ້ນຄວ້າ ແລະບໍລິການເຕັກນິກ, ຄວາມສາ ມາດບຸກຄະລາກອນໃນບັນດາດ່ານນໍາເຂົ້າ ແລະສົ່ງອອກພືດ; ຊຸກຍູ້ໃຫ້ ບັນດາໂຄງການສະໜັບສະໜັນຕໍ່ການ ເຈລະຈາເຕັກນິກການເປີດຕະຫຼາດໃນການນໍາເຂົ້າ-ສົ່ງອອກ ໃຫ້ສາມາດປະຕິບັດຕາມພັນທະສັນຍາ ແລະສົນທິສັນຍາສາກົນທີ່ປະ ເທດເຮົາເປັນພາຄີ;ສ້າງເງື່ອນໄຂ ແລະອໍານວຍຄວາມສະດວກເພື່ອສົ່ງເສີມໃຫ້ຄອບຄົວຊາວກະສິກອນ ນັບທັງແຮງງານລາວທີ່ໄດ້ຮັບຜົນກະທົບຈາກພະຍາດໂຄວິດ-19 ທີ່ກັບມາຢູ່ທ້ອງຖິ່ນຕ່າງໆ ດໍາເນີນທຸລະກິດຂະໜາດນ້ອຍ ແລະກາງພາຍໃນ ແລະເຂົ້າຮ່ວມນໍາບັນດາ ໂຄງການລົງທຶນດ້ານກະສິກໍາດ້ວຍຮູບແບບ 2+3, ຮ່ວມທຸລະກິດ, ຮູບແບບ PPP ແລະຮູບແບບອື່ນໆ ຕາມຄວາມເໝາະສົມ.

แชร์