ທຫລ ເດັດຂາດແກ້ສະຖາບັນການເງິນທີ່ບໍ່ໂປ່ງໃສ

ໂດຍ: ຣັດສະໝີ ດວງສັດຈະ

    ສະຖາບັນການເງິນຂອງ ສປປ ລາວ ປະກອບດ້ວຍຂະແໜງການທະນາຄານ, ຕະຫຼາດທຶນ, ການເງິນຈຸລະພາກ ແລະວຽກງານອື່ນໆ ທີ່ຢູ່ໃຕ້ການຄຸ້ມຄອງຂອງທະນາຄານແຫ່ງ ສປປ ລາວ (ທຫລ) ຊຶ່ງເປັນທະນາຄານກາງຂອງປະເທດ; ກ່ຽວກັບການຮັກສາສະຖຽນລະພາບສະຖາບັນການເງິນເປັນວຽກທີ່ມີບົດບາດສໍາຄັນໃນລະບົບເສດຖະກິດຂອງຊາດໂດຍສະເພາະໃນຂະແໜງການທະນາຄານ; ຕໍ່ບັນຫາດັ່ງກ່າວ, ທ່ານ ອາລຸນ ບຸນຍົງ ກໍາມະການພັກ ທຫລ, ຫົວໜ້າກົມຄຸ້ມຄອງທະນາ ຄານທຸລະກິດ ທຫລ ໄດ້ລາຍງານຕໍ່ກອງປະຊຸມຂະແໜງການທະນາຄານ (ວັນທີ 3 ສິງຫາ 2021) ໂດຍເລັ່ງໃສ່ 3 ວຽກຈຸດສຸມຕົ້ນ ຕໍຄື: ການສ້າງ ແລະປັບປຸງນິຕິກໍາທີ່ກ່ຽວຂ້ອງກັບການຄຸ້ມຄອງ ແລະການເຄື່ອນໄຫວຂອງສະຖາບັນການເງິນໃຫ້ຄົບຖ້ວນ, ສອດຄ່ອງກັບສະພາບເສດຖະກິດແຕ່ລະໄລຍະ; ການສ້າງຄວາມເຂັ້ມແຂງ ດ້ານວິຊາການໃຫ້ແກ່ວຽກງານຄຸ້ມຄອງ ແລະການຕິດຕາມຊຸກຍູ້ ແລະກວດກາການເຄື່ອນໄຫວຂອງສະຖາບັນການເງິນໃຫ້ສອດຄ່ອງກັບນິຕິກຳທີ່ກຳນົດໄວ້.

   ການຈັດຕັ້ງປະຕິບັດ 3 ວຽກຈຸດສຸມດັ່ງກ່າວໃນ 5 ປີຜ່ານມາມີຜົນສໍາເລັດແຕ່ລະດ້ານໂດຍສໍາເລັດການປັບປຸງກົດໝາຍວ່າດ້ວຍທະນາຄານທຸລະກິດ, ການປັບປຸງ ດຳລັດວ່າດ້ວຍທຸລະກິດຊວດຈຳ; ສໍາເລັດການສ້າງດໍາລັດວ່າດ້ວຍການປົກປ້ອງຜູ້ບໍລິໂພກທາງການເງິນ, ສຳເລັດການປັບປຸງຂໍ້ຕົກລົງວ່າດ້ວຍການສ້າງຕັ້ງທະນາຄານທຸລະກິດ ແລະສາຂາທະນາຄານທຸລະກິດ, ຂໍ້ຕົກລົງວ່າດ້ວຍທຶນຈົດທະບຽນຕໍ່າສຸດຂອງທະນາຄານທຸລະກິດ ແລະເງິນລົງທຶນຕໍ່າສຸດຂອງສາຂາທະນາຄານທຸລະກິດຕ່າງປະເທດ; ສຳເລັດການສ້າງຂໍ້ຕົກລົງວ່າດ້ວຍການກຳນົດອັດຕາດອກເບ້ຍຂອງສະຖາບັນການເງິນທີ່ບໍ່ແມ່ນທະນາຄານ,ຂໍ້ຕົກລົງວ່າດ້ວຍການແບ່ງຂັ້ນຄຸ້ມຄອງສະຖາບັນການເງິນທີ່ບໍ່ແມ່ນທະນາຄານ, ຂໍ້ຕົກລົງວ່າດ້ວຍການຄໍ້າປະກັນສິນເຊື່ອ.

   ການສ້າງຄວາມເຂັ້ມແຂງດ້ານວິຊາການໃຫ້ແກ່ວຽກງານຄຸ້ມຄອງໄດ້ຫັນການຄຸ້ມຄອງທະນາຄານທຸລະກິດຈາກການວິເຄາະຂໍ້ມູນຢ້ອນຫຼັງຕາມຫຼັກການ CAMEL ໄປສູ່ການຄຸ້ມຄອງຄວາມສ່ຽງຕາມຫຼັກການບາເຊລຊຶ່ງເປັນການວິເຄາະຂໍ້ມູນປະຈຸບັນເພື່ອຄາດຄະເນຄວາມສ່ຽງໃນອະນາຄົດຊຶ່ງສໍາເລັດການສ້າງແຜນແມ່ບົດ ແລະແຜນຈັດຕັ້ງປະຕິບັດມາດຕະຖານຫຼັກການບາເຊລແຕ່ປີ 2017-2025 ແລະເລີ່ມຈັດຕັ້ງປະຕິບັດກັບທະນາຄານທີ່ມີຄວາມພ້ອມ ແລະນອນຢູ່ໃນກຸ່ມເປົ້າໝາຍເທື່ອລະກ້າວ,ກໍານົດລະດັບທຶນຈົດທະບຽນຕໍ່າສຸດຂອງທະນາຄານທຸລະກິດຄືນໃໝ່ເພື່ອໃຫ້ທະນາຄານທຸລະກິດມີພື້ນຖານການເຄື່ອນໄຫວທຸລະກິດທີ່ເຂັ້ມແຂງ ແລະເລີ່ມຈັດຕັ້ງປະຕິບັດການເພີ່ມທຶນຕາມແຜນກຳນົດແຕ່ປີ 2019-2023 ຊຶ່ງປະຈຸບັນມີຫຼາຍທະນາຄານໄດ້ສໍາເລັດການປະກອບທຶນງວດ 1 ແລະງວດ 2 ຕາມແຜນທີ່ກຳນົດໄວ້, ສຳເລັດການສ້າງຄູ່ມືຄຸ້ມຄອງຕາມຄວາມສ່ຽງ, ພັດທະນາຕົວຊີ້ບອກທາງການເງິນ, ສ້າງລະບົບທົດສອບພາວະເຄັ່ງຕຶງຂັ້ນພື້ນຖານ, ສ້າງລະບົບເຕືອນໄພລ່ວງໜ້າ, ສຳເລັດການປັບປຸງລະບົບໂປຣແກມເກັບກຳຂໍ້ມູນລາຍງານຂອງສະຖາບັນການເງິນທີ່ບໍ່ແມ່ນທະນາຄານ, ການປັບປຸງແບບຟອມລາຍງານ ແລະ ປັບປຸງຜັງບັນຊີຂອງສະຖາບັນການເງິນທີ່ບໍ່ແມ່ນທະນາຄານ, ປັບປຸງວຽກງານພື້ນຖານທາງການເງິນ ແລະວຽກປິ່ນອ້ອມເຊັ່ນ: ວຽກປົກປ້ອງເງິນຝາກ, ວຽກຂໍ້ມູນຂ່າວສານສິນເຊື່ອ, ວຽກເກັບຊື້ໜີ້ ແລະຮັບຝາກເກັບໜີ້, ການປະຕິບັດມາດຕະຖານສາກົນດ້ານການລາຍງານການເງິນ, ວຽກສະກັດກັ້ນການຟອກເງິນ ແລະສະໜອງທຶນໃຫ້ແກ່ການກໍ່ການ ຮ້າຍ, ໄປຄຽງຄູ່ກັນນັ້ນກໍ່ໄດ້ສ້າງພະນັກງານຄຸ້ມຄອງສະຖາບັນການເງິນທັງໄລຍະສັ້ນ ແລະໄລຍະຍາວທັງຢູ່ພາຍໃນ ແລະຕ່າງປະເທດຕາມຄວາມຮຽກຮ້ອງຕ້ອງການຂອງວຽກງານ.

   ການຕິດຕາມຊຸກຍູ້ ແລະກວດກາການເຄື່ອນໄຫວຂອງສະຖາບັນການເງິນເພື່ອໃຫ້ສະຖາບັນການເງິນເຄື່ອນໄຫວຖືກຕ້ອງສອດຄ່ອງຕາມລະບຽບທີ່ກຳນົດໄວ້ ແລະດໍາເນີນທຸລະກິດໄປຕາມທິດທາງການພັດທະນາເສດຖະກິດ-ສັງຄົມຂອງລັດຖະບານ, ທຫລ ໄດ້ເອົາໃຈໃສ່ຊຸກຍູ້ຕິດຕາມ ແລະ ກວດກາສະຖາບັນການເງິນຢ່າງໃກ້ຊິດຊຶ່ງແຕ່ລະສະຖາບັນການເງິນຕ້ອງລາຍງານຂໍ້ມູນການເຄື່ອນໄຫວແຕ່ລະໄລຍະເຂົ້າມາໂປຣແກມຄຸ້ມຄອງຂອງ ທຫລ, ທຫລ ໄດ້ວິເຄາະຄວາມສ່ຽງຂອງການດຳເນີນທຸລະກິດຢ່າງລະອຽດພ້ອມທັງໃຫ້ຄຳແນະນຳຄືນ; ຕິດຕາມກວດກາການເຄື່ອນໄຫວເປັນປົກກະຕິແຕ່ລະສະຖາບັນການເງິນຕາມແຜນການທີ່ໄດ້ວາງອອກ ແລະກວດກາສຸກເສີນຕາມຄວາມຮຽກຮ້ອງຂອງວຽກງານຕົວຈິງໃນແຕ່ລະໄລຍະ; ຫັນການຕິດຕາມວິເຄາະທະນາຄານທຸລະກິດທີ່ມີເງື່ອນໄຂໄປສູ່ການຄຸ້ມຄອງຄວາມສ່ຽງຕາມຫຼັກການບາເຊລ, ແຍກການຄຸ້ມຄອງສະຖາບັນການເງິນທີ່ບໍ່ແມ່ນທະນາຄານຕາມຂັ້ນຄຸ້ມຄອງລະຫວ່າງສູນກາງ ແລະທ້ອງຖິ່ນ; ຜ່ານການຕິດຕາມດັ່ງກ່າວ ທຫລ ໄດ້ປະຕິບັດມາດຕະການຕ່າງໆຕໍ່ການລະເມີດຂອງສະຖາບັນການເງິນເປັນຕົ້ນອອກແຈ້ງເຕືອນສະຖາບັນການເງິນທີ່ປະຕິບັດບໍ່ສອດຄ່ອງກັບລະບຽບຮັກສາຄວາມໝັ້ນຄົງຈຳນວນໜຶ່ງ, ໄດ້ເຂົ້າໄປຄວບຄຸມພາຍໃນທະນາຄານທຸລະກິດທີ່ບໍລິຫານບໍ່ໂປ່ງໃສ 1 ແຫ່ງ, ໄດ້ຖອນໃບອະນຸຍາດສະຖາບັນການເງິນທີ່ບໍ່ຮັບເງິນຝາກ 1 ແຫ່ງ, ຖອນໃບອະນຸຍາດສະຫະກອນສິນເຊື່ອ ແລະເງິນຝາກປະຢັດ 3 ແຫ່ງ, ຟ້ອງສານຕັດສິນລົ້ມລະລາຍສະຖາບັນການເງິນທີ່ຮັບເງິນຝາກທີ່ມີການສໍ້ໂກງ 1 ແຫ່ງ.

   ທ່ານ ອາລຸນ ບຸນຍົງ ຫົວໜ້າກົມຄຸ້ມຄອງທະນາຄານທຸລະກິດໄດ້ຢືນຢັນວ່າ: ຜ່ານການຄຸ້ມຄອງໄດ້ເຮັດໃຫ້ສະຖາບັນການເງິນມີຄວາມເຕີບໃຫຍ່ເຂັ້ມແຂງປະກອບ ສ່ວນເຂົ້າໃນການພັດທະນາເສດຖະກິດ-ສັງຄົມຕາມແນວທາງທີ່ພັກ ແລະລັດຖະບານກຳນົດໄວ້ ເປັນຢ່າງດີ; 5 ປີຜ່ານມາຈໍານວນ ທະນາຄານທຸລະກິດເພີ່ມຂຶ້ນ 3 ແຫ່ງ, ປະຈຸບັນມີທະນາຄານທຸລະກິດທັງໝົດ 44 ແຫ່ງ, ມີສາຂາທົ່ວປະເທດ 114 ສາຂາ, ມີ 539 ໜ່ວຍບໍລິການ, ມີຕູ້ ATM 1.346 ຕູ້, ມີຊັບສິນທັງໝົດເພີ່ມຂຶ້ນສະເລ່ຍ 10,87% ຕໍ່ປີ; ຍອດເງິນຝາກເພີ່ມຂຶ້ນສະເລ່ຍ 13,70% ຕໍ່ປີ; ຍອດເຫຼືອສິນເຊື່ອເພີ່ມຂຶ້ນສະເລ່ຍ 10,35% ຕໍ່ປີ, ສະຖາບັນການເງິນທີ່ບໍ່ແມ່ນທະນາຄານມີ 188 ແຫ່ງ ເພີ່ມຂຶ້ນ 49 ແຫ່ງ. ຊັບສິນເພີ່ມຂຶ້ນສະເລ່ຍ 164% ຕໍ່ປີ, ຍອດເງິນເພີ່ມຂຶ້ນສະເລ່ຍ 151% ຕໍ່ປີ, ມີຍອດເຫຼືອສິນເຊື່ອເພີ່ມຂຶ້ນສະເລ່ຍ 172% ຕໍ່ປີ, ສະຖາບັນການເງິນມີຜະລິດຕະພັນໃໝ່ມາຮັບໃຊ້ສັງຄົມຢ່າງຫຼວງຫຼາຍເຊັ່ນ: ການຊຳລະຄ່າບໍລິການສາທາລະນູປະໂພກ, ພາສີ, ອາກອນຕ່າງໆຜ່ານລະບົບ Applica tion ຂອງທະນາຄານ, ການຊຳລະຄ່າສິນຄ້າ ແລະບໍລິການຕ່າງໆຜ່ານໂທລະສັບມືຖື,ການຝາກເງິນໃນຮູບແບບຕ່າງໆ ແລະການໃຫ້ບໍລິການເງິນກູ້ທີ່ຫຼາກຫຼາຍຮູບແບບຫຼາຍທາງເລືອກແກ່ລູກຄ້າຊຶ່ງສ້າງຄວາມສະດວກສະບາຍໃຫ້ແກ່ສັງຄົມໃນຍຸກການພັດທະນາເສດຖະກິດໃໝ່ເປັນຢ່າງດີ.

แชร์