ຜົ້ງສາລີ ຫາລື ແລະວາງແຜນສົ່ງເສີມການປູກອ້ອຍ

  ກອງປະຊຸມປຶກສາຫາລື ແລະວາງແຜນການສົ່ງເສີມການປູກອ້ອຍໃຫ້ປະຊາຊົນຢູ່ 5 ເມືອງ ຂອງແຂວງຜົ້ງສາລີ ໄດ້ຈັດຂຶ້ນໃນວັນທີ 4 ສິງຫາ ຜ່ານມານີ້ທີ່ຫ້ອງປະຊຸມພະແນກກະສິກຳ ແລະປ່າໄມ້ແຂວງ ໂດຍການເຂົ້າຮ່ວມຂອງທ່ານ ວິສອນ ລາວເມົາຮອງເຈົ້າແຂວງຜູ້ຊີ້ນຳຂົງເຂດເສດຖະກິດຂັ້ນແຂວງ, ທ່ານ ນາງ ດວງຈັນ ຊາມຸນຕີ ຫົວໜ້າພະແນກກະສິກຳ ແລະປ່າໄມ້ແຂວງ, ມີທ່ານເຈົ້າເມືອງ-ຮອງເຈົ້າເມືອງ ຈາກ 7 ເມືອງທົ່ວແຂວງ, ສະພາປະຊາຊົນແຂວງພ້ອມດ້ວຍພະແນກການ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

  ໃນກອງປະຊຸມ ທ່ານ ນາງ ດວງຈັນ ຊາມຸນຕີໄດ້ຂຶ້ນຜ່ານຮ່າງບົດສະຫຼຸບສະພາບການຈັດຕັ້ງປະຕິບັດໂຄງການປູກອ້ອຍນັບແຕ່ອະນຸມັດໂຄງການປີ 2018 ຈົນເຖິງປະຈຸບັນ ຊຶ່ງມາຮອດປີ 2021 ນີ້ໂຄງການປູກອ້ອຍເຂົ້າໄປຈັດຕັ້ງປະຕິບັດຢູ່ໃນ 5 ເມືອງ (ຜົ້ງສາລີ, ບູນເໜືອ, ຍອດອູ, ບູນໃຕ້ ແລະເມືອງສຳ ພັນ), ມີ 15 ກຸ່ມ, 64 ບ້ານ, 2.774 ຄອບ ຄົວ ມີເນື້ອທີ່ປູກ 3.762,87 ເຮັກຕາ, ໄດ້ຮັບຜົນຜະລິດ 179.908 ໂຕນ; ມີລາຍຮັບຈາກການຂາຍຜົນຜະລິດອ້ອຍໃນປີ 2020 ຜ່ານມາແມ່ນ 159,87 ຕື້ກີບ ສ່ວນເມືອງສຳພັນຫາກໍເລີ່ມປູກປີ 2021 ນີ້, ພ້ອມນີ້ຍັງໄດ້ຜ່ານທິດທາງແຜນການສົ່ງເສີມການປູກອ້ອຍໃນປີ 2021, ໃນກອງປະຊຸມຜູ້ເຂົ້າຮ່ວມໄດ້ປະກອບຄຳຄິດຄຳເຫັນໃສ່ຮ່າງບົດສະຫຼຸບການສົ່ງເສີມການປູກອ້ອຍໄລຍະຜ່ານມາ ແລະຮັບຮອງເອົາແຜນການໃນຕໍ່ໜ້າ.

  ທັງນີ້ກໍ່ເພື່ອທົບທວນຄືນຜົນການຈັດຕັ້ງປະຕິບັດໂຄງການປູກອ້ອຍໃນໄລຍະຜ່ານມາ ໂດຍສະເພາະການຈັດຕັ້ງປະຕິບັດຕາມບົດບັນທຶກຂອງຄະນະຊີ້ນຳຂັ້ນແຂວງຄັ້ງວັນທີ 17 ພຶດສະພາ 2018 ແລະບົດບັນທຶກດ້ານວິຊາການໃນການສຳຫຼວດ ແລະເກັບກຳຂໍ້ມູນສະພາບພື້ນທີ່ ແລະບ້ານເປົ້າໝາຍກ່ອນສະເໜີຮັບຮອງການປູກອ້ອຍຂອງແຕ່ລະເມືອງ, ຄົ້ນຄວ້າປຶກສາຫາລື ແລະຫາແນວທາງແກ້ໄຂບັນຫາຄົງຄ້າງທີ່ຜ່ານມາ ແລະຖອດຖອນບົດຮຽນໃນການຈັດຕັ້ງປະ ຕິບັດໃນຕໍ່ໜ້າ; ເພື່ອເອກະພາບໃນການວາງທິດທາງແຜນການເພື່ອສືບຕໍ່ຈັດຕັ້ງປະຕິບັດໃນຕໍ່ໜ້າ ແລະການວາງແຜນຄຸ້ມຄອງໂຄງການປູກອ້ອຍໂດຍສະ ເພາະວິທີການ, ມາດຕະການໃນການຈັດຕັ້ງປະຕິບັດ ແລະອື່ນໆເພື່ອເຮັດໃຫ້ການຈັດຕັ້ງປະຕິບັດການສົ່ງເສີມການປູກອ້ອຍຂອງປະຊາຊົນໃນຕໍ່ໜ້າໄດ້ຮັບຜົນດີຂຶ້ນເລື້ອຍໆ.

----

ໜັງສືພິມ ເສດະກິດ-ສັງຄົມ

แชร์