ໄຊເສດຖາ ຖືເອົາທ່າແຮງແກ້ໄຂຄວາມທຸກຍາກ

  ທ່ານ ຟອງສະໄໝ ມະນີວົງ ຮອງຫົວໜ້າຫ້ອງການກະສິກຳ ແລະປ່າໄມ້ເມືອງໄຊເສດຖາ ແຂວງອັດຕະປື ໄດ້ໃຫ້ສຳພາດຕໍ່ສື່ມວນຊົນແຂວງເມື່ອບໍ່ດົນມານີ້ວ່າ: ເມືອງໄຊເສດຖາ ໄດ້ກໍານົດເອົາຈຸດພິເສດ ແລະທ່າແຮງທີ່ມີພາຍໃນເມືອງເປັນບັນຫາຕົ້ນຕໍໃນການແກ້ໄຂຄວາມທຸກຍາກຂອງປະຊາຊົນ ໂດຍສະເພາະໄລຍະການລະບາດຂອງພະຍາດໂຄວິດ-19.

  ສຳລັບທ່າແຮງເດັ່ນທີ່ມີຂອງເມືອງປະກອບມີດ້ານພູມສັນຖານ, ທຳມະຊາດ, ປະຫວັດສາດທີ່ເກົ່າຍາວນານມາແຕ່ດຶກດຳບັນ, ມີໂຄງລ່າງພື້ນຖານໄຟຟ້າ,  ເສັ້ນທາງຄົມມະນາຄົມ, ລະບົບໂທລະຄົມມະນາຄົມ ແລະການສື່ສານທີ່ຄວບຄຸມເກືອບ 100% ຂອງເຂດທີ່ມີປະຊາກອນ, ພິເສດເມືອງໄຊເສດຖາ ຍັງມີສະ ໜາມບິນ, ມີໂຮງງານອຸດສາຫະກຳປຸງແຕ່ງ, ມີແມ່ນໍ້າຫຼາຍສາຍທີ່ອໍານວຍຄວາມສະດວກໃນການຜະລິດກະສິກໍາ, ມີລະບົບຊົນລະປະທານທີ່ສາມາດຫົດເນື້ອທີ່ໄດ້ 300-450 ເຮັກຕາ, ສິ່ງດັ່ງກ່າວໄດ້ເປັນພື້ນຖານໃຫ້ແກ່ການສ້າງວຽກເຮັດງານທຳ ແລະສ້າງເສດຖະກິດໃນລະດັບຄອບຄົວ, ບ້ານ ແລະຂອງເມືຶອງຕາມທິດພັດທະນາຊົນນະບົດ ແລະແກ້ໄຂຄວາມທຸກຍາກໃໝ່ທີ່ຂັ້ນເທິງວາງອອກ.

  ທ່ານ ຟອງສະໄໝ ມະນີວົງ ກ່າວຕື່ມວ່າ: ເມືອງໄຊເສດຖາ ຍັງໄດ້ກຳນົດເອົາວຽກງານການສົ່ງເສີມການຜະລິດກະສິກຳເພື່ອສະໜອງສະບຽງອາຫານທີ່ມີໂພຊະນາການໃຫ້ພຽງພໍກັບການບໍລິໂພກໃນຄົວເຮືອນແລ້ວກ້າວໄປສູ່ການຜະລິດເປັນສິນຄ້າຕິດພັນກັບການປຸງແຕ່ງ ໂດຍຊຸກຍູ້ການປະຕິບັດໃຫ້ກາຍເປັນກຸ່ມ, ສະມາຄົມ ແລະສະຫະກອນ; ສ່ວນການຜະລິດເປັນສິນຄ້າແມ່ນເລັ່ງໃສ່ພື້ນຖານຂອງປະຊາຊົນທີ່ມີເປັນຕົ້ນແມ່ນການລ້ຽງງົວ-ຄວາຍ, ການຮ່ວມມື 2+3 ໂດຍການປູກອ້ອຍຮ່ວມກັບບໍລິສັດພ້ອມນີ້ກໍ່ຍາດແຍ່ງ ແລະຊຸກຍູ້ສົ່ງເສີມການລົງທຶນຈາກພາຍໃນ ແລະຕ່າງປະເທດໃຫ້ຫຼາຍຂຶ້ນ.

  ທ່ານຍັງໄດ້ກ່າວຕື່ມວ່າ: ໂດຍອີງໃສ່ຜົນການເກັບກຳຂໍ້ມູນ ແລະການຮັບຮອງເອົາຂໍ້ມູນການສຳຫຼວດຕາມດຳລັດ 348/ລບ ວ່າດ້ວຍມາດຕະຖານພົ້ນທຸກ ແລະມາດຕະຖານພົ້ນທຸກຂັ້ນແຂວງ, ປະຈຸບັນເມືອງໄຊເສດຖາຍັງມີຄອບຄົວທຸກຍາກ 3.865 ຄອບຄົວ, ກວມເອົາ 49,63% ຂອງຈຳນວນຄອບຄົວທັງ ໝົດ,  ບ້ານທຸກຍາກ 17 ບ້ານ, ກວມເອົາ 77,27% ຂອງຈຳນວນບ້ານທັງໝົດ.

----

ໂດຍ: ວັດທະນາ

แชร์