ໜ່ວຍພັກກົມ​ເລຂາ ເຜີຍ​ແຜ່​ເຊື່ອມ​ຊຶມ​ເອກະສານ​ສຳຄັນ​ຂອງ​ສູນ​ກາງ​ພັກ

    ໃນວັນທີ 6 ສິງຫາ 2021 ໜ່ວຍພັກກົມເລຂາ, ຫ້ອງວ່າການສຳນັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມເຜີຍແຜ່ເຊື່ອມຊືມເອກະສານສຳຄັນຂອງສູນກາງພັກ ແລະລັດໃຫ້ແກ່ສະມາຊິກພັກ,ພະນັກງານ-ລັດຖະກອນພາຍໃນກົມ, ໂດຍການເປັນປະທານຂອງສະຫາຍ ນ. ຄຳສັ້ນ ສິດທິວໍລະດາ,ຮອງເລຂາໜ່ວຍພັກ, ຮອງຫົວໜ້າກົມເລຂາ; ມີບັນດາສະຫາຍຄະນະໜ່ວຍພັກ, ສະມາຊິກພັກ, ພະນັກງານ-ລັດຖະກອນ ພາຍໃນກົມເລຂາ 30 ກວ່າສະຫາຍເຂົ້າຮ່ວມ.​ 

  ເອກະສານທີ່ນຳມາເຜີຍແຜ່ໃນຄັ້ງນີ້ປະກອບມີ: ມະຕິ ສະບັບ​ເລກທີ 15/ກມສພ, ລົງ​ວັນ​ທີ 15 ພຶດສະພາ 2021ວ່າ​ດ້ວຍການ​ເພີ່ມ​ທະວີ​ການ​ນຳພາ​ຂອງ​ພັກຕໍ່​ວຽກ​ງານ​ວັດທະນະທຳ​ໄລຍະ​ໃໝ່; ຄຳສັ່ງ ສະບັບ​ເລກທີ 01/ກມສພ, ລົງ​ວນທີ 26 ກໍລະກົດ 2021 ວ່າດ້ວຍການເພີ່ມທະວີ​ການ​ນຳພາ​ຊີ້​ນຳ​ຂອງ​ຄະນະ​ພັກ​ແຕ່ລະ​ຂັ້ນໃນ​ການຈັດ​ຕັ້ງ​ປະຕິບັດ​ມາດ​ຕະການແກ້​ໄຂ​ຄວາມ​ຫຍຸ້ງຍາກດ້ານ​ເສດຖະກິດ-ການ​ເງິນ; ຄຳ​ສັ່ງ​ເລກທີ 02/ກມສພ, ລົງ​ວັນ​ທີ 26 ກໍລະກົດ 2021 ວ່າ​ດ້ວຍ​ການ​ເພີ່ມ​ທະວີ​ການ​ນຳພາ​ຊີ້​ນຳຂອງ​ຄະນະ​ພັກ​ແຕ່ລະ​ຂັ້ນຕໍ່​ການ​ສະກັດ​ກັ້ນ ​ແລະ​ແກ້​ໄຂ​ບັນຫາ​ຢາ​ເສບ​ຕິດ; ​ເອກະສານກ່ຽວ​ກັບ​ວັນ​ສ້າງ​ຕັ້ງ​ພັກ​ກອມ​ມູນິດ​ຈີນຄົບຮອບ 100 ປີ; ຄຳສັ່ງແນະນຳ ເລກທີ 151/ຄລສພ,ລົງວັນທີ 9 ກໍລະກົດ 2021 ກ່ຽວກັບການກະກຽມສະເຫຼີມສະຫຼອງວັນສ້າງຕັ້ງລັດຖະທຳມະນູນແຫ່ງຊາດຄົບຮອບ 30ປີ.

ການ​ເຜີຍ​ແຜ່​ເອກະສານ​ດັ່ງກ່າວ​ເພື່ອໃຫ້ບັນດາສະຫາຍສະມາຊິກພັກ, ພະນັກງານ-ລັດຖະກອນ ພາຍໃນກົມ ໄດ້ເຊື່ອມຊືມ, ຮັບຮູ້, ເຂົ້າໃຈຢ່າງເລິກເຊິງ, ກຳແໜ້ນ ແລະເປັນເອກະພາບ​ໄປ​ລວງ​ດຽວ​ກັນຕາມເນື້ອໃນຈິດໃຈຂອງບັນດາເອກະສານທີ່ໄດ້ນຳມາເຜີຍແຜ່ເຊື່ອມຊຶມ, ເພື່ອສາມາດນຳໄປຜັນຂະຫຍາຍ ແລະຈັດຕັ້ງປະຕິບັດເຂົ້າສູ່ວຽກງານຕົວຈິງໃຫ້ຖືກຕ້ອງ, ວ່ອງ​ໄວ, ​ແທດ​ຕົວ​ຈິງ, ມີ​ປະສິດທິພາບ ແລະມີປະສິດທິຜົນ. ກອງປະຊຸມໄດ້ດຳເນີນໄປດ້ວຍບັນຍາກາດອັນດີມີການແລກປ່ຽນຄຳຄິດຄຳເຫັນໂດຍສະເພາະທິດທາງໃນການຜັນຂະຫຍາຍລົງສູ່ວຽກງານຂອງກົມໂດຍກົງ.

​​  ໃນ​ຕອນ​ທ້າຍ, ສະຫາຍ​ປະທານ​ກອງ​ປະຊຸມໄດ້​ມີ​ຄຳ​ເຫັນ​ເນັ້ນ​ໜັກໃຫ້ຜູ້​ເຂົ້າ​ຮ່ວມສືບ​ຕໍ່​ນຳ​ເອົາ​ເອກະສານ​ທີ່​ນຳມາ​ເຜີຍ​ແຜ່​ໃນ​ຄັ້ງ​ນີ້​ໄປ​ຄົ້ນຄວ້າ​, ​ເຊື່ອມ​ຊຶມດ້ວຍຕົນເອງໃຫ້ຫຼາຍຂື້ນພ້ອມທັງຫັນເຂົ້າສູ່​ວຽກ​ງານຕົວຈິງ​ທີ່​ຕົນ​ເອງ​ຮັບຜິດຊອບໂດຍ​ສະ​ເພາະເປັນ​ແຜນການ, ​ໂຄງການ​ ​ແລະອື່ນໆ​ໃຫ້​ເປັນອັນ​ລະອຽດ, ຈະແຈ້ງ, ​ແທດ​ເໝາະກັບ​ສະພາບ​ເງື່ອນ​ໄຂ​ຕົວ​ຈິງ ແລະເປັນຮູບປະທຳ.

แชร์