ລັດກຳນົດ 5 ຍຸດທະສາດແກ້ໜີ້ສາທາລະນະ

   ເນື່ອງຈາກການຂະຫຍາຍຕົວຂອງເສດຖະກິດ ແລະການລົງທຶນບັນດາໂຄງການຕ່າງໆໃນປະເທດເຮົາໄລຍະຜ່ານມາໄດ້ຮັບຜົນກະທົບຫຼາຍດ້ານຈາກໄພພິບັດທາງທຳມະຊາດ, ພະຍາດລະບາດ ແລະອື່ນໆສິ່ງດັ່ງກ່າວໄດ້ເຮັດໃຫ້ເກີດມີໜີ້ສິນສາທາລະນະເພີ່ມຂຶ້ນດັ່ງນັ້ນໃນ 5 ປີຕໍ່ໜ້ານີ້ລັດຈຶ່ງໄດ້ກຳນົດ 5 ຍຸດທະສາດແກ້ໄຂຄວາມຫຍຸ້ງຍາກທາງດ້ານໜີ້ສິນສາທາລະນະເພື່ອແນໃສ່ໃຫ້ສາມາດຫຼຸດຜ່ອນຄວາມກົດດັນຂອງໜີ້ສິນ ແລະໃຫ້ກັບເຂົ້າສູ່ສະພາບປົກກະຕິເພື່ອສ້າງພື້ນຖານໃຫ້ແກ່ການບໍລິຫານໜີ້ສິນໃຫ້ມີຄວາມຍືນຍົງໃນໄລຍະກາງ ແລະໄລຍະຍາວ.

  ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນໄດ້ຊີ້ແຈງບາງບັນຫາຕໍ່ກອງປະຊຸມສະໄໝວິສາມັນເທື່ອທີ 1 ຂອງສະພາແຫ່ງຊາດ ຊຸດທີ IX ໃນວັນທີ 6 ສິງຫາຜ່ານມາຊຶ່ງໜຶ່ງໃນນັ້ນແມ່ນຕິດພັນກັບວຽກງານການແກ້ໄຂຄວາມຫຍຸ້ງຍາດທາງດ້ານໜີ້ສິນສາທາລະນະໂດຍກະຊວງການເງິນໄດ້ສຸມໃສ່ຄົ້ນຄວ້າຮ່າງຍຸດທະ ສາດແກ້ໄຂຄວາມຫຍຸ້ງຍາກດ້ານໜີ້ສິນສາທາລະນະໃນ 5 ປີຕໍ່ໜ້າ (2021-2025) ເພື່ອແນໃສ່ໃຫ້ຫຼຸດຜ່ອນຄວາມກົດດັນຂອງໜີ້ສິນ ແລະໃຫ້ກັບເຂົ້າສູ່ສະພາບ ປົກກະຕິເພື່ອສ້າງພື້ນຖານໃຫ້ແກ່ການບໍລິຫານໜີ້ສິນໃຫ້ມີຄວາມຍືນຍົງໃນໄລຍະກາງ ແລະໄລຍະຍາວ.

   ດັ່ງນັ້ນຈຶ່ງໄດ້ກຳນົດ 5 ຍຸດທະສາດຄື: ຍຸດທະສາດທີ 1 ເຈລະຈາກັບບັນດາຜູ້ໃຫ້ທຶນເພື່ອເລື່ອນໜີ້ສິນ ແລະພິຈາລະນາຜ່ອນຜັນບັນດາເງື່ອນໄຂເງິນກູ້ຢືມ ຫຼືພາລະຕ່າງໆຂອງ ສປປ ລາວ ຕໍ່ບັນດາຜູ້ໃຫ້ທຶນ; 2. ສະສົມແຫຼ່ງທຶນພາຍໃນເພື່ອຮອງຮັບການບໍລິຫານ ແລະປົດໜີ້ສິນລົງ; 3. ປະຕິຮູບ ແລະປັບປຸງປະສິດທິຜົນຂອງບັນດາລັດວິສາຫະກິດ; 4. ສ້າງຄວາມເຊື່ອໝັ້ນກັບສາກົນ ແລະຄູ່ຮ່ວມພັດທະນາເພື່ອສືບຕໍ່ດຶງດູດການຊ່ວຍເຫຼືອ ແລະຫຼຸດຜ່ອນຄວາມກົດດັນຕໍ່ ສປປ ລາວ, ສ່ວນຍຸດທະສາດທີ 5 ສືບຕໍ່ບໍລິຫານໜີ້ສິນດ້ວຍການຕໍ່ອາຍຸໜີ້ສິນອອກໄປຈຳນວນໃນເພດານການກູ້ຢືມ ແລະເງື່ອນໄຂເໝາະສົມບໍ່ໃຫ້ກະທົບຕໍ່ຖານະໜີ້ສິນ.

 ທ່ານ ບຸນໂຈມ ອຸບົນປະເສີດ ກ່າວຕື່ມວ່າ: ຕິດພັນກັບຄຳເຫັນຂອງສະມາຊິກສະພາແຫ່ງຊາດທີ່ສະເໜີຕໍ່ກັບຄາດໝາຍໃນການແກ້ໄຂໜີ້ສິນສາທາລະນະໂດຍສະເພາະການຊອກຫາແຫຼ່ງທຶນເພື່ອມາຊຳລະໃນໄລຍະສັ້ນ (2021-2023) ແມ່ນອີງໃສ່ບັນດາມາດຕະການທີ່ໄດ້ກໍານົດຢູ່ໃນຮ່າງຄໍາສັ່ງຂອງນາຍົກລັດຖະມົນຕີວ່າດ້ວຍການເພີ່ມທະວີຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ, ການຄົ້ນຄວ້າການຈັດເກັບພັນທະງົບປະມານຈາກໂຄງການພັດທະນາບໍ່ແຮ່ (ແຮ່ເຫຼັກ) ແລະສົ່ງອອກແຮ່ເຫຼັກແບບທົດລອງ ແລະການຄົ້ນຄວ້າຫັນຊັບສິນເປັນທຶນຈຳນວນວໜຶ່ງເພື່ອມາເປັນທຶນໃນການຊຳລະໜີ້ໃນໄລຍະ 2-3 ປີ, ພ້ອມນັ້ນໄດ້ກຳນົດເອົາການເພີ່ມຂຶ້ນຂອງລາຍຮັບພາຍໃນແຕ່ລະປີທີ່ໄດ້ກຳນົດໄວ້ໃນແຜນງົບປະມານແຫ່ງລັດ 5 ປີ (2021-2025) ຈຳນວນໜຶ່ງສະສົມໄວ້ເພື່ອໄປຊຳລະໜີ້ສິນໃຫ້ຫຼຸດລົງ.

แชร์