ວາງສະແດງຮູບພາບ 30 ປີ ວັນລັດຖະທຳມະນູນ

   ງານວາງສະແດງຮູບພາບໃນໂອກາດສະເຫຼີມສະຫຼອງວັນລັດຖະທໍາມະນູນແຫ່ງຊາດຄົບຮອບ 30 ປີ (15 ສິງຫາ 1991 ຫາ 15 ສິງຫາ 2021) ວັນທີ 8 ສິງຫາ ທີ່ຫໍພິພິທະພັນໄກສອນ ພົມວິຫານຫຼັກ 6 ໃຫ້ກຽດເຂົ້າຮ່ວມຂອງທ່ານ ໄຊສົມພອນ ພົມວິຫານ,ປະທານສະພາແຫ່ງຊາດ,ຫົວໜ້າຄະນະຮັບຜິດຊອບສະເຫຼີມສະຫຼອງວັນລັດຖະທໍາມະນູນແຫ່ງຊາດຄົບຮອບ 30 ປີ ພ້ອມດ້ວຍພັນລະຍາ,ບັນດາລັດຖະມົນຕີ, ຮອງລັດຖະມົນຕີ, ສະມາຊິກແຫ່ງຊາດ, ປະທານສະພາປະຊາຊົນຂັ້ນແຂວງທົ່ວປະເທດ ແລະອົງການຈັດຕັ້ງມະຫາຊົນເຂົ້າຮ່ວມ.

     ໃນວາລະການຈັດງານວາງສະແດງຮູບພາບໂອກາດສະເຫຼີມສະຫຼອງວັນລັດຖະທໍາມະນູນແຫ່ງຊາດຄົບຮອບ 30 ປີ, ທ່ານ ໄຊສົມພອນ ພົມວິຫານ ພ້ອມດ້ວຍ ພັນລະຍາໄດ້ນໍາພາຄະນະຜູ້ແທນສະພາປະທານສະພາປະຊາຊົນຂັ້ນແຂວງໃນທົ່ວປະເທດ, ນໍາກະຕ່າດອກໄມ້ວາງຢູ່ຕໍ່ໜ້າຮູບປັ້ນຫຼໍ່ຂອງປະທານໄກສອນ ພົມວິຫານ, ທີ່ໄດ້ນໍາພາລະກິດປະຕິວັດອັນຍິ່ງໃຫຍ່ຂອງປະເທດເຮົາດ້ວຍການສ້າງຕັ້ງກໍາລັງປະກອບອາວຸດ, ປະຕິວັດ, ປະຊາຊົນ, ສ້າງຕັ້ງແນວລາວອິດສະຫຼະກໍ່ຄືແນວລາວສ້າງຊາດໃນປະຈຸບັນ,ສ້າງຕັ້ງພັກປະຊາຊົນປະຕິວັດລາວ,ສ້າງຕັ້ງບັນດາອົງການຈັດຕັ້ງມະຫາຊົນຂອງພັກ,ສ້າງຕັ້ງປະເທດ ສປປ ລາວ,ນໍາພາປົກປັກຮັກສາ ແລະສ້າງສາປະເທດ ຊາດ, ນໍາພາວາງແນວທາງປ່ຽນແປງໃໝ່ຮອບ ດ້ານທີ່ມີຫຼັກການຂອງພັກຢ່າງມີໄຊ.

   ໂອກາດນີ້ທ່ານ ຈະເລີນ ເຢຍປາວເຮີ, ຮອງປະທານສະພາແຫ່ງຊາດໄດ້ກ່າວໃນພິທີວ່າ: ໂດຍປະຕິບັດຕາມຄຳສັ່ງແນະນຳຂອງຄະນະເລຂາທິການສູນກາງພັກສະບັບເລກທີ 151/ ຄລສພ ລົງວັນທີ 9 ກໍລະກົດ 2021 ແລະຄຳແນະນຳຂອງຄະນະປະຈຳສະພາແຫ່ງຊາດ ສະບັບເລກທີ 08/ຄປຈ ລົງວັນທີ 14 ກໍລະກົດ 2021 ກ່ຽວກັບການສະເຫຼີມສະຫຼອງວັນລັດຖະທຳມະນູນແຫ່ງຊາດ ຄົບຮອບ 30 ປີ ແລະອີງຕາມການຊີ້ນຳຂອງທ່ານ ໄຊສົມພອນ ພົມວິຫານ ກຳມະການກົມການເມືອງ ສູນກາງພັກ, ປະທານສະພາແຫ່ງຊາດ, ຫົວໜ້າຄະນະຮັບຜິດຊອບສະເຫຼີມສະຫຼອງວັນລັດຖະທຳມະນູນແຫ່ງຊາດຄົບຮອບ 30 ປີ, ອະນຸກຳມະການໂຄສະນາ-ຂະບວນການ ໂດຍສົມທົບກັບກອງເລຂາອະນຸກຳມະການເນື້ອໃນ ແລະຄະນະຮັບຜິດຊອບຫໍພິພິທະພັນປະທານ ໄກສອນ ພົມວິຫານ, ໄດ້ຈັດງານວາງສະແດງຮູບພາບດັ່ງກ່າວ ຊຶ່ງປະກອບດ້ວຍຮູບພາບຈຳນວນໜຶ່ງໃນພາລະກິດຕໍ່ສູ້ປົດປ່ອຍຊາດສ້າງຕັ້ງ ສປປ ລາວ ຮູບພາບການຈັດຕັ້ງ ແລະການເຄື່ອນໄຫວຂອງສະພາແຫ່ງຊາດ, ປະທານປະເທດ ລັດຖະບານ, ສານປະຊາຊົນ, ອົງການ ໄອຍະການປະຊາຊົນ ແລະແນວລາວສ້າງຊາດ, ອົງການຈັດຕັ້ງມະຫາຊົນ, ອົງການກວດສອບອົງການກວດກາແຫ່ງລັດໂດຍສະເພາະການສ້າງ, ປັບປຸງ ແລະປະຕິບັດລັດຖະທຳມະນູນ ແລະກົດໝາຍໃນຕະຫຼອດໄລຍະ 30 ປີ ທີ່ຜ່ານມາທີ່ສະແດງໃຫ້ເຫັນເຖິງຜົນງານ ແລະການເຄື່ອນໄຫວຂອງລັດເຮົາໃນການສ້າງ, ປັບປຸງ ແລະປະຕິບັດລັດຖະທຳມະນູນ ແຫ່ງ ສປປ ລາວ ສະບັບທຳອິດພາຍໃຕ້ການນຳພາຂອງພັກປະຊາຊົນປະຕິວັດລາວ.

แชร์