ເກືອບ 30 ບໍລິສັດນຳເຂົ້າ ແລະຈຳໜ່າຍນໍ້າມັນໃນລາວ ລັດເລັ່ງອັດຊ່ອງຮົ່ວລາຍຮັບ

   ເມື່ອວັນທີ 2 ສິງຫາຜ່ານມາ, ທີ່ກະຊວງການເງິນ, ໄດ້ມີກອງປະຊຸມປຶກສາຫາລືການຄຸ້ມຄອງການແຈ້ງພາສີ, ກວດກາການນຳເຂົ້າ, ການກວດກາລົງສາງ, ການເຄື່ອນຍ້າຍພາຍໃນປະເທດສຳລັບນໍ້າມັນເຊື້ອໄຟ ແລະ ອາຍແກ໊ສ, ໂດຍການເປັນປະທານຂອງ ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີຮອງລັດຖະມົນຕີ, ຫົວໜ້າ-ຮອງຫົວໜ້າກົມກ່ຽວຂ້ອງ, ສະພາການຄ້າ ແລະອຸດສາຫະກໍາແຫ່ງຊາດລາວ, ກົມການຄ້າພາຍໃນ, ກົມນໍາເຂົ້າສົ່ງອອກ, ກົມມາດຕະຖານ ແລະວັດແທກກະຊວງອຸດສາຫະກໍາ ແລະການຄ້າ, ພ້ອມດ້ວຍບັນດາປະທານ, ຮອງປະທານສະມາຄົມນໍ້າມັນເຊື້ອໄຟ ແລະປະທານບໍລິສັດປີໂຕຣລ້ຽມເທຣດດິ້ງລາວມະຫາຊົນເຂົ້າຮ່ວມ.

   ກອງປະຊຸມຄັ້ງນີ້, ເພື່ອຮັບປະກັນການຄຸ້ມຄອງເອກະສານປະກອບການແຈ້ງພາສີ, ການກວດກາການນໍາເຂົ້ານໍ້າມັນເຊື້ອໄຟ ແລະອາຍແກ໊ສ, ການກວດກາລົງສາງບໍລິສັດ ແລະການເຄື່ອນຍ້າຍພາຍໃນໃຫ້ມີຄວາມເອກະພາບ, ແນໃສ່ຮັບປະກັນການຈັດເກັບລາຍຮັບເຂົ້າງົບປະມານໃຫ້ຄົບຖ້ວນ, ຖືກຕ້ອງ ແລະອັດຊ່ອງວ່າງການຮົ່ວໄຫຼຂອງລາຍຮັບໂດຍແບ່ງຄວາມຮັບຜິດຊອບຂອງຂະແໜງພາສີ ແລະສ່ວຍສາອາກອນເປັນແຕ່ລະໜ້າວຽກລະອຽດຕາມທີ່ໄດ້ລະບຸໃນຮ່າງແຈ້ງການ.

   ທ່ານ ບຸນໂຈມ ອຸບົນປະເສີດ ກ່າວວ່າ: ເພື່ອໃຫ້ປະສິດທິພາບການຄຸ້ມຄອງຂອງເຈົ້າໜ້າທີ່ພາສີ-ສ່ວຍສາອາກອນເພີ່ມຂຶ້ນ, ໃຫ້ມີຄວາມຮັດກຸມກວ່າເກົ່າ ແລະອັດຊ່ອງວ່າງການຮົ່ວໄຫຼທາງດ້ານລາຍຮັບງົບປະມານຂອງລັດ, ກໍຄືການອັດຊ່ອງວ່າງບໍ່ໃຫ້ເກີດມີການນຳເຂົ້າ ແລະການຈຳໜ່າຍນໍ້າມັນພາຍໃນປະເທດທີ່ບໍ່ຖືກຕ້ອງ, ຊຶ່ງໃນໄລຍະຜ່ານມາທາງລັດຖະບານກໍໄດ້ພະຍາຍາມແກ້ໄຂບັນຫາຕ່າງໆ ດ້ວຍການສ້າງສິ່ງອຳນວຍຄວາມສະດວກ ແລະເພີ່ມມາດຕະການຫຼາຍດ້ານ, ພ້ອມທັງດັດສົມຫົວໜ່ວຍຕາມດຳລັດ ເລກທີ 331/ນຍ ຂອງນາຍົກລັດຖະມົນຕີມາຮອດປະຈຸບັນມີບໍລິສັດທີ່ໄດ້ຮັບອະນຸຍາດ ຈຳນວນ 28 ບໍລິສັດ ໃນນັ້ນ 11 ບໍລິສັດນຳເຂົ້າ ແລະອີກ 17 ບໍລິສັດແມ່ນຈຳໜ່າຍພາຍໃນ.

    ຢ່າງໃດກໍຕາມແຕ່ຜ່ານມາມີບາງອັນຍັງບໍ່ສາມາດຈັດຕັ້ງປະຕິບັດໄດ້ດີ ຫຼືເວົ້າໄດ້ວ່າຍັງບໍ່ສາມາດປະຕິບັດໄດ້ຍ້ອນສະພາບຕົວຈິງແມ່ນຍັງພົບຄວາມຫຍຸ້ງຍາກ, ໃນນັ້ນສາເຫດທີ່ເກີດຂຶ້ນນຳພາກລັດກໍຄືການຄຸ້ມຄອງຕິດຕາມຍັງບໍ່ເຂັ້ມງວດ, ການປະສານສົມທົບກັບພາກສ່ວນທີ່ກ່ຽວຂ້ອງກໍຍັງເຮັດບໍ່ໄດ້ດີ ແລະການນຳໃຊ້ມາດຕະການຍັງບໍ່ຮັດກຸມ, ສຳລັບສາເຫດທີ່ເກີດຂຶ້ນນຳພາກທຸລະກິດແມ່ນພົບເຫັນບາງຜູ້ປະກອບການທຸລະກິດນໍ້າມັນເຊື້ອໄຟມີການລັກລອບການນຳເຂົ້າເຄື່ອນຍ້າຍ-ຈຳໜ່າຍທີ່ບໍ່ຖືກ ຕ້ອງ, ການກວດກາບົດລາຍງານການເງິນປະຈຳປີຍັງມີຕົວເລກຜິດດ່ຽງຈາກການແຈ້ງຫຼາຍ ແລະມອບພັນທະບໍ່ຄົບຖ້ວນນີ້ແມ່ນປາກົດການຕົວຈິງ.

  ສະນັ້ນກອງປະຊຸມໃນຄັ້ງນີ້, ຈຶ່ງມີຄວາມສໍາຄັນຫຼາຍເພື່ອຈະມາພ້ອມກັນປຶກສາຫາລືເນັ້ນໃສ່ປັບປຸງຄືນໃໝ່ດ້ວຍການກໍານົດຫຼັກການ, ວິທີການໃນການຕິດຕາມ,ກວດກາ ແລະມາດຕະການໃຫ້ເຂັ້ມງວດຂຶ້ນຕື່ມໂດຍສະເພາະຂອດການແຈ້ງເອກະສານຂອດນຳເຂົ້າ, ການກວດກາຂອງເຈົ້າໜ້າທີ່ພາສີ,ການຄຸ້ມຄອງສາງ (ພາຍໃນ) ຂອງເຈົ້າໜ້າທີ່ສ່ວຍສາອາກອນ, ການສ້າງກົນໄກອຳນວຍຄວາມສະດວກໃຫ້ພາກທຸລະກິດ,ການກຳນົດມາດຕະການຕໍ່ເຈົ້າໜ້າທີ່ ແລະພາກທຸລະກິດເພື່ອຊອກຫາວິທີແກ້ໄຂການ ສວຍໃຊ້ຊ່ອງວ່າງໃນການຄຸ້ມຄອງ ແລະພຶດຕິກຳຕ່າງໆທັງຈາກເຈົ້າໜ້າທີ່ ແລະພາກທຸລະກິດ.

   ໃນຕອນທ້າຍກອງປະຊຸມ, ຍັງໄດ້ໃຫ້ບັນດາພາກສ່ວນຕ່າງໆໄດ້ປະກອບຄໍາເຫັນຕໍ່ກັບ (ຮ່າງ) ແຈ້ງການຄຸ້ມຄອງການແຈ້ງພາສີ, ກວດກາການນໍາເຂົ້ານໍ້າມັນເຊື້ອໄຟ ແລະອາຍແກ໊ສ, ການກວດກາລົງສາງບໍລິສັດ ແລະການເຄື່ອນຍ້າຍພາຍໃນອີກດ້ວຍ.

แชร์