ກຳປູເຈຍ ເລີ່ມສັກວັກແຊງເຂັມທຳອິດໃຫ້ເດັກອາຍຸ 12-17 ປີ

  ລັດຖະບານກຳປູເຈຍໄດ້ຈັດຊື້ວັກແຊງປ້ອງກັນໂຄວິດ -19 ເພີ່ມ 5 ລ້ານໂດສ ຈາກປະເທດຈີນເພື່ອສັກໃຫ້ກຸ່ມອາຍຸລະຫວ່າງ 12-17 ປີ ໂດຍແນໃສ່ກຽມເປີດການຮຽນ-ການສອນຄືນໃໝ່, ຄາດວ່າຈະມີການຈັດສົ່ງວັກແຊງດັ່ງກ່າວໃນເດືອນສິງຫາ ແລະກັນຍາ.

  ຕາມຂ່າວຕ່າງປະເທດລາຍງານວ່າ ທ່ານ ນາງ ຢອກ ແຊມບັດ, ລັດຖະມົນຕີກະຊວງສາທາລະນະສຸກກຳປູເຈຍກ່າວວ່າ: ທາງການຈີນຈະມີການຈັດສົ່ງວັກແຊງຊີໂນຟາມຈຳນວນ 3 ລ້ານ ໂດສ ມາຍັງກຳປູເຈຍພາຍໃນເດືອນນີ້ ແລະອີກ 2 ລ້ານໂດສ ແມ່ນຈະຈັດສົ່ງໃນເດືອນກັນຍາຊຶ່ງຈະນຳມາສັກໃຫ້ເດັກໃນກຸ່ມອາຍຸ 12-17 ປີຈຳນວນ 2 ລ້ານກວ່າຄົນ, ຂະນະທີ່ປະຈຸບັນທາງຄະນະກຳມະການສັກວັກແຊງໂຄວິດ-19 ແຫ່ງຊາດກຳລັງປຶກສາຫາລື ແລະວາງແຜນ  ກ່ຽວກັບການຈັດຕັ້ງປະຕິບັດໃນການສັກວັກແຊງສຳລັບກຸ່ມອາຍຸດັ່ງກ່າວ “ມາຮອດທ້າຍເດືອນກໍລະກົດ, ພວກເຮົາໄດ້ສັກວັກແຊງໃຫ້ປະຊາຊົນພາຍໃນປະ ເທດແລ້ວ 6 ລ້ານກວ່າຄົນ ແລະພວກເຮົາກໍ່ມີວັກແຊງພຽງພໍສຳລັບພົນລະເມືອງລວມທັງກຸ່ມເດັກນ້ອຍຂະນະທີ່ລັດຖະບານກໍ່ໄດ້ພະຍາຍາມຢ່າງເຕັມທີ່ໃນການຈັດຫາວັກແຊງໃຫ້ກັບປະຊາຊົນຂອງຕົນ” ທ່ານ ນາງ ຢອກ ແຊມບັດ ກ່າວ.

  ກຳປູເຈຍ ຍັງຈະໄດ້ຮັບວັກແຊງ Johnson & Johnson ຈຳນວນ 1 ລ້ານໂດສ ຜ່ານໂຄງການ Covax, ຊຶ່ງການຈັດສົ່ງວັກແຊງດັ່ງກ່າວແມ່ນຍັງບໍ່ມີການກຳນົດເວລາທີ່ແນ່ນອນ.

----

ໜັງສືພິມ ເສດຖະກິດ-ສັງຄົມ

แชร์